अजित पवार यांच्या निमित्ताने विद्यार्थ्यांना सॅकचे वाटप करण्यात आले आहे. या कार्यक्रमादरम्यान उपस्थित विद्यार्थ्यांना सॅक देण्यात आल्या.

दिवंगत उपमुख्यमंत्री अजितदादा पवार यांना आज जयंतीनिमित्त राज्यभरात अभिवादन करण्यात आले आहे. बारामती तालुक्यातील सुपे येथील विद्या प्रतिष्ठान इंग्लिश मिडीयम स्कूलकडून अनोख्या पद्धतीने अभिवादन करत अजितदादांच्या आठवणींना उजाळा देण्यात आला.

अजित पवार यांच्या निमित्ताने विद्यार्थ्यांना सॅकचे वाटप करण्यात आले आहे. या कार्यक्रमादरम्यान उपस्थित विद्यार्थ्यांना सॅक देण्यात आल्या.

राष्ट्रवादी काँग्रेसचे ज्येष्ठ नेते तथा महाराष्ट्राचे उपमुख्यमंत्री अजित पवार यांच्या जयंतीनिमित्त शिरूर शहरात त्यांना अभिवादन करण्यात आले. शहरातील पक्ष कार्यालयात तसेच शिरूर नगरपरिषदेमध्ये नगराध्यक्षा ऐश्वर्या अभिजीत पाचर्णे यांनी अजित पवार यांच्या प्रतिमेस पुष्पहार अर्पण केला. अजित पवार यांच्या दूरदृष्टीतून अनेक विकास प्रकल्प साकार झाले असून त्यांनी सर्वसामान्य माणसासाठी विविध जनकल्याणाच्या योजना मार्गी लावल्याचे सांगत पाचर्णे यांनी आदरांजली वाहिली. या प्रसंगी नगरपालिकेचे सभापती स्वाती साठे, सभापती सुनील जाधव, एजाज बागवान, उपसभापती आयेशा सय्यद, माजी उपनगराध्यक्ष जाकीरखान पठाण, नगरसेविका संगीता मल्लाव, नगरसेवक अभिजित पाचर्णे, राष्ट्रवादी काँग्रेस महिला आघाडीच्या श्रुतिका झांबरे, शहराध्यक्ष शरद कालेवार, माजी सभापती संतोष शितोळे आणि रंजन झांबरे यांसह अनेक पदाधिकारी व कार्यकर्ते उपस्थित होते. याच जयंतीचे औचित्य साधून शिरूर-हवेली मतदारसंघात 'जनसेवा सप्ताह' अंतर्गत नागरिकांसाठी मोफत आरोग्य तपासणी शिबिरांचे आयोजन करण्यात आले आहे. आमदार ज्ञानेश्वर (आबा) कटके यांच्या पुढाकारातून तालुक्यातील तीन ग्रामीण रुग्णालयांमध्ये ही शिबिरे सकाळी १० ते दुपारी ५ या वेळेत होतील. वेळापत्रकानुसार, शिरूर ग्रामीण रुग्णालयात २३ जुलै, शिक्रापूर ग्रामीण रुग्णालयात २४ जुलै आणि न्हावरे ग्रामीण रुग्णालयात २६ जुलै रोजी या शिबिरांचे आयोजन करण्यात आले आहे. या मोफत आरोग्य शिबिरांमध्ये रक्तगट व रक्तशर्करा तपासणी, हिमोग्लोबिन तपासणी, माता व बाल आरोग्य सेवा, असंसर्गजन्य आजार (एनसीडी) तपासणी, गरजेनुसार मोफत औषध वाटप, आरोग्य जनजागृती व समुपदेशन तसेच गंभीर रुग्णांना पुढील उच्चस्तरीय उपचारासाठी संदर्भ (रेफरल) सेवा पुरवण्यात येणार आहे. आमदार ज्ञानेश्वर कटके यांनी ग्रामीण भागातील सर्व नागरिकांना स्वतःसह कुटुंबीयांची आरोग्य तपासणी करून या मोफत उपक्रमाचा लाभ घेण्याचे आवाहन केले आहे.

पुण्यातील लोहगाव चौकातील मुख्य रस्त्यावर ड्रेनेज चेंबरचे झाकण तुटून अनेक दिवसांपासून उघडे पडले आहे. यामुळे त्या ठिकाणी मोठा जीवघेणा खड्डा निर्माण झाला असून दुचाकीस्वार, चारचाकी चालक तसेच पादचाऱ्यांच्या जीविताला गंभीर धोका निर्माण झाला आहे. स्थानिक नागरिकांच्या म्हणण्यानुसार, चेंबरचे तुटलेले झाकण बाजूला पडून असून त्यावर केवळ तात्पुरता पत्रा ठेवण्यात आला आहे. मात्र तो अपुरा ठरत असल्याने कधीही मोठा अपघात होण्याची शक्यता आहे. दररोज या मार्गावरून हजारो वाहनांची वर्दळ असतानाही संबंधित प्रशासनाने अद्याप दुरुस्ती केलेली नाही. नागरिकांनी अनेक वेळा तक्रारी करूनही पुणे महानगरपालिकेच्या नगर रोड क्षेत्रीय कार्यालयाने याकडे दुर्लक्ष केल्याचा आरोप केला आहे. एखादा गंभीर अपघात झाल्यानंतरच प्रशासन जागे होणार का, असा संतप्त सवाल नागरिक उपस्थित करत आहेत. त्यामुळे संबंधित विभागाने तातडीने चेंबरची दुरुस्ती करून हा जीवघेणा खड्डा कायमस्वरूपी बुजवावा, तसेच जबाबदार अधिकाऱ्यांवर कारवाई करावी, अशी मागणी स्थानिक नागरिकांनी केली आहे.

पुण्यातील हडपसर साडेसतरानळी येथील छत्रपती शिवाजी महाराज चौक ते अमनोरा पार्क आणि मुंढवा या मुख्य रस्त्याची अत्यंत दुरवस्था झाली असून मोठमोठ्या खड्ड्यांमुळे नागरिकांना जीव मुठीत धरून प्रवास करावा लागत आहे. वारंवार तक्रारी करूनही प्रशासनाकडून या समस्येकडे कोणतीही दखल घेतली जात नसल्याचा आरोप नागरिकांनी केला आहे. प्रशासनाच्या या भूमिकेविरोधात क्रांती शेतकरी संघटनेचे संस्थापक अध्यक्ष अमोल नाना तुपे यांच्या नेतृत्वाखाली नागरिकांनी रस्त्यातील खड्ड्यांमध्ये झाडे लावून अनोखे आंदोलन केले. या वेळी प्रशासन व लोकप्रतिनिधींचा निषेध नोंदवण्यात आला असून, हा रस्ता तातडीने दुरुस्त न केल्यास आंदोलन अधिक तीव्र करण्याचा इशारा देण्यात आला आहे.

फलटण तालुक्यातील मंडलनिहाय अहवालानुसार जून महिन्यापासून आतापर्यंत तालुक्यात एकूण सरासरी ८५ मिमी पावसाची नोंद झाली आहे. या कालावधीत संपूर्ण तालुक्यात तरडगाव मंडलात सर्वाधिक १८९ मिमी पावसाची नोंद करण्यात आली आहे. तालुक्यातील इतर मंडळांमधील पावसाची आकडेवारी पाहता, आदर्की मंडलात ११३.७ मिमी, होळ येथे १०९.९ मिमी, वाठार निंबाळकर येथे ८९.८ मिमी, कोळकी येथे ७५.५ मिमी, फलटण मंडलात ६२.२ मिमी, बर्ड येथे ६०.७ मिमी, गिरवी येथे ५१.८ मिमी, राजाळे येथे ५१.६ मिमी आणि आसू मंडलात ४४.५ मिमी पावसाची नोंद झाली आहे.

भोर शहरातील महाडनाका परिसरात ठेकेदाराच्या हलगर्जीपणामुळे पाणीपुरवठ्याची मुख्य पाईपलाईन पुन्हा फुटल्याची घटना घडली आहे. या घटनेमुळे हजारो लिटर पाणी वाया गेले असून परिसरातील अनेक नागरिकांच्या घरांमध्ये पाणी शिरले आहे. एकीकडे नागरिकांना पिण्याच्या पाण्यासाठी संघर्ष करावा लागत असताना दुसरीकडे होत असलेल्या पाण्याच्या या नासाडीमुळे नगरपालिका प्रशासनाविरोधात तीव्र संताप व्यक्त केला जात आहे. प्रशासनाने तातडीने दुरुस्तीचे काम हाती घेऊन यावर कायमस्वरूपी उपाययोजना करावी, अशी ठाम मागणी नागरिकांकडून केली जात आहे.

आज अजितदादा यांच्या जयंतीनिमित्त त्यांच्या विशेष कार्यपद्धतीला आणि नेतृत्वाला विनम्र अभिवादन करण्यात येत आहे. प्रशासनावर असणारी मजबूत पकड, विविध विषयांचा अभ्यास आणि हाती घेतलेले काम पूर्ण होईपर्यंत त्याचा सातत्याने केला जाणारा पाठपुरावा ही दादांच्या कार्यशैलीची अत्यंत महत्त्वाची वैशिष्ट्ये मानली जातात. महाराष्ट्राने काय गमावले याचा उल्लेख करत, प्रशासनावर पकड असणाऱ्या या नेतृत्वाच्या आठवणींना उजाळा देण्यात आला असून दादा सदैव आठवणीत राहतील अशी भावना व्यक्त करण्यात आली आहे.