મહિસાગર જિલ્લામાં, ખેડા જિલ્લા પંચાયતના પૂર્વ પ્રમુખ મુકેશ શુકલના પુત્ર અને મહિસાગર જિલ્લા પંચાયત પૂર્વ શિક્ષણ સમિતિના ચેરમેન પિનાકીન શુકલ સહિત કુલ ત્રણ ઇસમો સામે ફરિયાદ નોંધવામાં આવી છે.

મહીસાગર જિલ્લાના વિરપુર પોલીસ સ્ટેશનમાં ભાજપના પૂર્વ જિલ્લા શિક્ષણ સમિતિના ચેરમેન પિનાકીન શુક્લ અને અન્ય ત્રણ વ્યક્તિઓ વિરુદ્ધ FIR દાખલ કરવામાં આવી છે. આ કાર્યવાહી વિરપુરના રહેવાસી ભદ્રેશ સુથારને રાત્રિના સમયે ફેસબુક પર સ્ટોરી અને સ્ટેટસ મૂકવા બાબતે મારપીટ કરવાના આરોપ હેઠળ કરવામાં આવી છે. વિગતવાર મળતી માહિતી મુજબ, ખેડા જિલ્લાના પૂર્વ પ્રમુખ મુકેશભાઈ શુક્લના પુત્ર પિનાકીન શુક્લએ અન્ય ત્રણ વ્યક્તિઓ સાથે મળીને ભદ્રેશ સુથારને તેમના ઘરે જઈને લોખંડની પાઇપ અને લાકડી જેવા હથિયારો વડે માર માર્યો હતો. આ ઘટના બાદ તેમના વિરુદ્ધ FIR દાખલ કરવામાં આવી છે અને મહીસાગર પોલીસ દ્વારા આ મામલે આગળની કાર્યવાહી હાથ ધરવામાં આવી છે. પ્રાપ્ત માહિતી અનુસાર, પિનાકીન શુક્લ વિરુદ્ધ અગાઉ પણ ગુનાઓ દાખલ થયેલા છે. ભારતીય જનતા પાર્ટી જ્યારે શિસ્તતાની વાત કરે છે, ત્યારે પાર્ટી દ્વારા પિનાકીન શુક્લ પર શું કાર્યવાહી કરવામાં આવશે તે જોવું રહ્યું.

આગામી પવિત્ર બકરી ઈદ (ઈદ-ઉલ-અઝહા)ના તહેવારને ધ્યાનમાં રાખીને કાલોલ શહેરમાં કાયદો અને સુવ્યવસ્થા જાળવવા તથા શાંતિપૂર્ણ માહોલ સુનિશ્ચિત કરવા માટે કાલોલ પોલીસે સઘન ફૂટ પેટ્રોલિંગ હાથ ધર્યું છે. આ કવાયતનો મુખ્ય ઉદ્દેશ તહેવાર દરમિયાન કોઈ અનિચ્છનીય ઘટના ન બને અને કોમી સૌહાર્દ જળવાઈ રહે તે સુનિશ્ચિત કરવાનો છે. આ ફૂટ પેટ્રોલિંગ કાલોલ વિભાગના ડીવાયએસપી નવીન આહિરની સીધી આગેવાની હેઠળ યોજાયું હતું. આ ફૂટ પેટ્રોલિંગમાં કાલોલ પોલીસ સ્ટેશનના સિનિયર પીઆઈ આર ડી ભરવાડ, પીએસઆઇ પી કે ક્રીશ્ચિયન, પોલીસ સ્ટાફ, મહિલા પોલીસ કર્મચારીઓ અને મોટી સંખ્યામાં પોલીસ જવાનો જોડાયા હતા. પોલીસ કાફલાએ શહેરના તમામ સંવેદનશીલ વિસ્તારો, મુખ્ય બજાર, ભીડભાડવાળા વિસ્તારો અને મુખ્ય માર્ગો પર પગપાળા કૂચ કરીને સુરક્ષા વ્યવસ્થાની સમીક્ષા કરી હતી. પેટ્રોલિંગ દરમિયાન, પોલીસ અધિકારીઓએ સ્થાનિક વેપારીઓ અને નાગરિકો સાથે સંવાદ સાધીને તેમને સોશિયલ મીડિયા પર ફેલાતી અફવાઓથી દૂર રહેવા અને તહેવારને ભાઈચારા સાથે ઉજવવા અપીલ કરી હતી. કાલોલ પોલીસના જણાવ્યા અનુસાર, બકરી ઈદના તહેવારને ધ્યાનમાં રાખીને સમગ્ર શહેરમાં ચુસ્ત પોલીસ બંદોબસ્ત તૈનાત કરવામાં આવ્યો છે અને સંવેદનશીલ પોઈન્ટ્સ પર પોલીસ વોચ ગોઠવવામાં આવી છે. પોલીસના આ સઘન અને આયોજનબદ્ધ ફૂટ પેટ્રોલિંગના પગલે સ્થાનિક નાગરિકો અને વેપારીઓમાં સુરક્ષાની એક અનોખી લાગણી જોવા મળી હતી, અને લોકોએ પોલીસની આ કામગીરીને બિરદાવી હતી. પોલીસે નાગરિકોને કોઈપણ ભય વિના, ઉત્સાહ અને શાંતિપૂર્ણ માહોલમાં તહેવારની ઉજવણી કરવા આહ્વાન કર્યું છે, સાથે જ કાયદો અને વ્યવસ્થા જાળવવા માટે પોલીસ તંત્ર સજ્જ હોવાનું પણ જણાવ્યું છે.

મુસ્લિમ સમાજના યુવા આગેવાનો દ્વારા ગાયને રાષ્ટ્રીય પશુ જાહેર કરવામાં આવે તેવી માંગ સાથે મૌન આસ્થા સન્માન કાર્યક્રમનું આયોજન કરવામાં આવ્યું હતું. આ કાર્યક્રમ બાદ, તેમણે પ્રધાનમંત્રીશ્રીને સંબોધીને એક આવેદનપત્ર મામલતદાર સાહેબને સુપરત કર્યું.

ગુજરાતના કાલોલ તાલુકાના નેસડા ગામે 'સુજલામ સુફલામ' યોજના હેઠળ આડેધડ રીતે ખોદવામાં આવેલી માટીના કારણે બનેલા ઊંડા ખાડાઓ હાલ ગ્રામજનો માટે 'મોતનો ખાડો' બનવાની શક્યતા છે, જેને કારણે લોકોમાં ભારે ભય અને આક્રોશ પ્રવર્તી રહ્યો છે. હવામાન વિભાગ દ્વારા આગામી ૧ જૂન ૨૦૨૬ સુધીમાં વરસાદ પડવાની આગાહી કરવામાં આવી છે, ત્યારે ચોમાસું નજીક હોવા છતાં સ્થાનિક વહીવટી તંત્રની ગંભીર બેદરકારી સામે આવી છે. ગ્રામજનો દ્વારા ટેલિફોનિક અને મૌખિક રીતે જાણ કરવા છતાં, વહીવટી તંત્ર દ્વારા કોઈ કાર્યવાહી કરવામાં આવી નથી. 'સુજલામ સુફલામ' યોજના હેઠળ ખોદાયેલા આ ખાડાઓને હજુ સુધી સુરક્ષિત તળાવનો આકાર આપવામાં આવ્યો નથી. વધુમાં, ગામની માટી ગામમાં જ પૂરણ કરવાના બદલે હજારો ટન માટી ગામની બહાર મોકલી દેવામાં આવી છે, જેના કારણે ગામમાં અનેક જગ્યાએ મોટા અને ઊંડા ખાડા હજુ પણ ખાલી પડ્યા છે, જેની યોગ્યતા પર સવાલો ઉઠી રહ્યા છે. જો પ્રથમ વરસાદ પહેલાં આ ખાડાઓનું યોગ્ય કામકાજ કરીને તેમને તળાવનું સ્વરૂપ નહીં અપાય, તો આગામી દિવસોમાં આજુબાજુના વિસ્તારમાં ભારે હોનારત અને મોટી મુશ્કેલીઓ ઊભી થવાની પૂરેપૂરી શક્યતા છે. ગ્રામજનો સવાલ કરી રહ્યા છે કે ચોમાસાની શરૂઆતને ગણતરીના દિવસો બાકી હોવા છતાં તંત્ર હજુ કેમ ઘોર નિદ્રામાં છે અને ગામના વિકાસ માટે બનેલી યોજના ગ્રામજનોના જીવનું જોખમ કેમ બની ગઈ છે? જો આ ચોમાસામાં કોઈ અનિચ્છનીય ઘટના ઘટશે, તો તેની જવાબદારી કોની રહેશે તેવા ગંભીર પ્રશ્નો ઊભા થયા છે.

પંચમહાલ જિલ્લાના ઉચ્ચ પોલીસ અધિકારીઓ તેમજ હાલોલ DYSP વી.જે. રાઠોડ અને હાલોલ ટાઉન પોલીસ પીઆઈ આર.કે. દેસાઈના માર્ગદર્શન હેઠળ 'તેરા તુજકો અર્પણ' અભિયાન ચલાવવામાં આવ્યું હતું. આ અભિયાન અંતર્ગત હાલોલ ટાઉન પોલીસે ગુમ થયેલા 13 મોબાઈલ ફોન શોધી કાઢ્યા, જેમની કુલ કિંમત ₹2,67,233 હતી. સર્વેલન્સ ટીમના પોલીસ કર્મચારીઓએ ગુમ થયેલી અરજીઓ પર ટેકનિકલ અને અન્ય વિવિધ પદ્ધતિઓથી તપાસ હાથ ધરી આ મોંઘા અને અનમોલ મોબાઈલ ફોન શોધી કાઢ્યા હતા. પોતાના ગુમ થયેલા મોબાઈલ ફોન પાછા મળતા અરજદારોના ચહેરા પર ખુશી છવાઈ ગઈ હતી. તેઓએ પોતાની કીમતી વસ્તુ પરત મળવાની ખુશી જાહેર કરી હતી અને હાલોલ ટાઉન પોલીસનો આભાર વ્યક્ત કર્યો હતો, સાથે જ પોલીસની કર્તવ્ય નિષ્ઠાને સલામ પણ કરી હતી. આ પ્રસંગે ગુમ થયેલા અને પરત મળેલા મોબાઈલ લેવા આવેલા અરજદારો, તેમના પરિજનો અને હાલોલ ટાઉન પોલીસ મથકના કર્મચારીઓ ઉપસ્થિત રહ્યા હતા.

જાંબુઘોડાના ડુંગરવાટ રોડ પર વીજ કંપનીની બેદરકારીના કારણે એક મોટી દુર્ઘટના થતા રહી ગઈ હતી, જ્યાં લીમડાના ઝાડની ડાળ તૂટી પડતા બે વીજપોલ ધરાશાયી થયા હતા. કુંભરવાળા પાસેના લીમડાના ઝાડને અડીને જ એમજીવીસીએલ દ્વારા વીજપોલ ઊભા કરાયા હતા, પરંતુ લાંબા સમયથી વૃક્ષોની છંટણી ન થવાને કારણે આ ઘટના બની હતી. લીમડાની મોટી ડાળ વીજલાઈન પર પડતા એમજીવીસીએલના બે વીજપોલ ધરાશાયી થયા અને ૨૪ કલાક વાહનોથી ધમધમતો ડુંગરવાટ રોડ બંને બાજુથી બ્લોક થઈ ગયો, જેનાથી વાહનવ્યવહાર ખોરવાઈ ગયો અને સ્થાનિકોમાં ભયનો માહોલ છવાઈ ગયો હતો. સ્થાનિકોના જણાવ્યા અનુસાર, પોલ ધરાશાયી થયાના ૨૦ મિનિટ બાદ પણ વીજ કંપનીનો કોઈ કર્મચારી સ્થળ પર પહોંચ્યો ન હતો, કે વીજ પુરવઠો બંધ કરવામાં આવ્યો ન હતો. રોડ પર જીવંત વીજ વાયરો તૂટીને પડ્યા હોવા છતાં કંપનીની બેદરકારીને કારણે લોકોના જીવ જોખમમાં મુકાયા હતા. આખરે, ઘટનાના ૨૦ મિનિટ બાદ વીજ કંપનીના કર્મચારીઓ પહોંચ્યા અને લાઈન બંધ કરીને કામગીરી શરૂ કરી હતી. જોકે, વીજ વાયરો કાપવાની પ્રક્રિયા દરમિયાન નજીકમાં આવેલી દુકાનો પાસેનો વધુ એક વીજપોલ પણ ધરાશાયી થયો હતો. સદનસીબે, તે સમયે ત્યાં ઊભેલી એક બાળકીએ સમયસૂચકતા વાપરી તુરંત જ ત્યાંથી ખસી જતા તે આબાદ બચી ગઈ હતી. આ ધરાશાયી થયેલો વીજપોલ દુકાન આગળ પડેલી ત્રણ બાઈકો ઉપર પડ્યો હતો, જેના કારણે બાઈકોને પણ નુકશાન થયું હતું. જો બાળકી ત્યાંથી ન હટી હોત તો મોટી જાનહાની થવાની પૂરેપૂરી શક્યતા હતી. વારંવારની રજૂઆત છતાં વીજપોલ પાસે આવેલા વૃક્ષોની છંટણી ન કરવા અને તંત્રની આ ઢીલી કામગીરીને લઈને સ્થાનિક રહીશોમાં ભારે આક્રોશ જોવા મળી રહ્યો છે.

Post by Rathod Sandip sinh

મહિસાગર જિલ્લામાં, ખેડા જિલ્લા પંચાયતના પૂર્વ પ્રમુખ મુકેશ શુકલના પુત્ર અને મહિસાગર જિલ્લા પંચાયત પૂર્વ શિક્ષણ સમિતિના ચેરમેન પિનાકીન શુકલ સહિત કુલ ત્રણ ઇસમો સામે ફરિયાદ નોંધવામાં આવી છે.