ଅଭିଯୋଗ ପାଇ ଘଟଣା ସ୍ଥଳରେ ପହଞ୍ଚିଲା ଖଣି ବିଭାଗ, ୩ଘଣ୍ଟା ଧରି ଖଣି ଅଧିକାରୀଙ୍କୁ ଅଟକ ରଖିଲେ ମାଟି ମାଫିଆ। ବଜ୍ରପାତ ଉପରେ ପ୍ରତିବନ୍ଧକ ସାଜିବା ପାଇଁ ସରକାର ତାଳଗଛ ଲଗାଇବା ପାଇଁ କହୁଥିବା ବେଳେ ମାଫିଆ ମାନେ ତାକୁ କାଟି ପକାଉଛନ୍ତି। ରେଳବାଇ କାମ ବାହାନାରେ ସରକାରୀ ଜାଗାରେ ଲାଗିଥିବା ତାଳଗଛ କାଟି ଦେଇ ମାଲେମାଲ ହେଉଛନ୍ତି ମାଫିଆ। ଘରୋଇ ଜମି ସହିତ ଜଙ୍ଗଲ ଜମି ଓ ସରକାରୀ ଜାଗାରୁ କୋଟି କୋଟି ଟଙ୍କାର ମାଟି ଲୁଟ କରି ଆଖପାଖ କରୁଛନ୍ତି ଚୋରା ଚାଲାଣ। ଏହା ସହିତ ଦିନରାତି ମାଟି ଚାଲାଣରେ ଲିଗିଥିବା ଡମ୍ପର ଏବଂ ହାଇୱ୍ବା ଗାଡି ଗୋଡିକରେ କୈାଣସି କାଗଜପତ୍ର ନଥିବାରୁ ବେଆଇନ ଭାବରେ ଦୃତ ଗତିରେ ଯାତାୟତ କରୁଥିବା ଯୋଗୁଁ ପ୍ରତ୍ୟେକ ଦିନ ଦୁର୍ଘଟଣା ଘଟିବା ସହ ଧୂଳି ଧୂଆଁରେ ଲୋକେ ଅତିଷ୍ଠ ହୋଇ ପଡ଼ୁଛନ୍ତି। ବାରମ୍ବାର କହିବା ପରେ ଚାଳକ ଏବଂ ମାଫିଆ ମାନେ ନାଲି ଆଖି ଦେଖାଉଥିବା ଅଭିଯୋଗ ହେଉଛି। ବାଲେଶ୍ବର ଜିଲ୍ଲା ବସ୍ତା ତହସିଲ ତଥା ବାହାର୍ଦ୍ଦା ପଞ୍ଚାୟତ ଅନ୍ତର୍ଗତ ବାରିଦା, ସଦାନନ୍ଦପୁର ପଞ୍ଚାୟତ ଅନ୍ତର୍ଗତ ଟିକରପଡ଼ା ଏବଂ ଜଳକା ନଦୀ ପାର୍ଶ୍ୱବର୍ତ୍ତୀ ଅଞ୍ଚଳର ପାଖା ପାଖି ୭୦ ଏକର ସରକାରୀ ଜମି, ଜଙ୍ଗଲ ଜମି ଏବଂ ଘରୋଇ ଜମି ଆଦିରୁ ମାଟି ଲୁଟ କରି ମାଫିଆ ମାନେ ରାଜସ୍ୱ ବିଭାଗ, ପୁଲିସ ପ୍ରଶାସନ, ଖଣି ବିଭାଗ ଆଖିରେ ଧୂଳି ଦେଇ ବେଆଇନ ଭାବରେ ଡମ୍ପର, ହାଇୱ୍ବା, ଟ୍ରାକ୍ଟର ସାହାଯ୍ୟରେ ବେଆଇନ ଭାବେ ମାଟି ପରିବହନ କରିବା ସହ ଚାଲାଣ କରୁଛନ୍ତି। ଏହି ଅଞ୍ଚଳରେ ମାଟି ଉତ୍ତୋଳନ କରି ଚାଲାଣ ହେଉଥିବା ସମୟରେ ଆମେ ଘଟଣା ସ୍ଥଳରେ ପହଞ୍ଚିବାରୁ ଜେସିବି ଏବଂ ଟ୍ରାକ୍ଟର ସେଠାରୁ ଚମ୍ପଟ ମାରୁଥିବା ଦେଖିବାକୁ ମିଳିଥିଲା। ମାତ୍ର ସେଠାରେ ପହଞ୍ଚିବା ବେଳକୁ ଯାହା ଦେଖିବାକୁ ମିଳିଥିଲା ତାହା ସମସ୍ତଙ୍କୁ ଆଶ୍ଚର୍ଯ୍ୟ ଚକିତ କରିଥିଲା। ମାଫିଆ ମାନେ ଏହି ମାଟି ଉତ୍ତୋଳନ ବେଳେ ବିଲ ମଧ୍ୟ ଦେଇ ଯାଇଥିବା ବିଶାଳକାୟ ତାଳ ଗଛକୁ ଗଣ୍ଡିରୁ ଅଲଗା କରିବା ସହ କିଛି ସ୍ଥାନରେ ତାଳଗଛଟି ମାଟି ଉପରେ ଦଣ୍ଡାୟମାନ ହେବା ପାଇଁ ଯେତକ ସ୍ଥାନ ଦରକାର ତାକୁ ଛାଡ଼ି ଅର୍ଥାତ୍ ମୂଳକୁ ଛାଡ଼ି ସମ୍ପୂର୍ଣ୍ଣ ରୂପେ ଖୋଳ କରିଦେଇଥିଲେ। ସେହିଭଳି ମାଟି ଉତ୍ତୋଳନ ସ୍ଥାନ ଅନତି ଦୂରରେ ବହୁ ଗାଁ, ଜନବସତି ବସବାସ କରୁଛନ୍ତି। ସେମାନଙ୍କୁ ବିଦ୍ୟୁତ ଯୋଗାଇବା ପାଇଁ ବିଭାଗ ପକ୍ଷରୁ ଉକ୍ତ ବିଲ ଦେଇ ଖୁଣ୍ଟ ପୋତି ୩୩କେଭି ତାର ସଂଯୋଗ କରାଯାଇଛି। ମାତ୍ର ମାଫିଆ ମାନେ ତାଳଗଛ କ୍ଷେତ୍ରରେ ଯାହା କରିଥିଲେ ବିଦ୍ୟୁତ ଖୁଣ୍ଟ କ୍ଷେତ୍ରରେ ମଧ୍ୟ ସମାନ ଢଙ୍ଗ ଆପଣାଇ କେବଳ ଖୁଣ୍ଟକୁ ଛାଡ଼ି ଦେଇ ମୂଳରୁ ମାଟି ତାଡ଼ି ନେଇଥିଲେ। ଫଳରେ ବର୍ଷା ଓ ପବନ ହେଲେ ଖୁଣ୍ଟ ଓଲଟିବା ଯୋଗୁ ଗ୍ରାମବାସୀ ବିଦ୍ୟୁତ ସରବରାହରୁ ବଞ୍ଚିତ ରହିବେ ବୋଲି ଆଶଙ୍କା ପ୍ରକାଶ ପାଇଥିଲା। ଘଟଣା ସମ୍ପର୍କରେ ମଙ୍ଗଳବାର ସାମାଜିକ ଗଣମାଧ୍ୟମରେ ଖବର ପରିବେଷଣ ହେବା ପରେ ଅପରାହ୍ଣରେ କନିଷ୍ଠ ଖଣି ଅଧିକାରୀ ତାପସ ବେହେରା ସଦଳବଳେ ଘଟଣା ସ୍ଥଳକୁ ଯାଇଥିଲେ। ତେବେ ଦୂରରୁ ଖଣି ଅଧିକାରୀଙ୍କୁ ଦେଖି ମାଫିଆ ମାନେ ଟ୍ରାକ୍ଟର ଗୁଡ଼ିକ ଖସାଇ ନେବାରେ ସକ୍ଷମ ହୋଇଥିବା ବେଳେ ଗୋଟାଏ ଟ୍ରାକ୍ଟରକୁ ବିଭାଗ ଜବତ କରିଥିଲା। ମାତ୍ର ଟ୍ରାକ୍ଟରଟିରେ ମାଟି ନଥିବାରୁ ମାଫିଆ ମାନେ ତାହାକୁ ଖସାଇ ନେବା ପାଇଁ ଜିଦରେ ଅଡ଼ି ବସି ଖଣି ଅଧିକାରୀଙ୍କୁ ୩ଘଣ୍ଟାରୁ ଉର୍ଦ୍ଧ୍ବ ସମୟ ପର୍ଯ୍ୟନ୍ତ ଅଟକ ରଖିଥିଲେ। ସେହିଭଳି ଘଟଣା ସ୍ଥଳଟି ରାସଗୋବିନ୍ଦପୁର ଥାନା ଅଞ୍ଚଳର ବୋଲି ମାଫିଆ ମାନେ ଦାବି କରିଥିଲେ। ଖବର ପାଇ ରାସଗୋବିନ୍ଦପୁର ଥାନା ପୁଲିସ, ବସ୍ତା ଥାନା ସବ ଇନ୍ସପେକ୍ଟର ବିଜୟ କୁମାର ବାରିକ, ତହସିଲଦାର ସୁଶାନ୍ତ କୁମାର ପଟ୍ଟନାୟକ ପହଞ୍ଚି ଘଟଣାର ଅନୁଧ୍ୟାନ କରିଥିଲେ। ମାତ୍ର ଘଟଣା ସ୍ଥଳଟି ବସ୍ତା ଥାନା ଅଞ୍ଚଳର ବୋଲି ଜଣା ପଡ଼ିବା ପରେ ପୁଲିସ ଟ୍ରାକ୍ଟରଟିକୁ ଜବତ୍ କରି ଥାନାକୁ ଆଣିଛି। ତେବେ ଯେଉଁ ଭଳି ମାଟି ଚାଲାଣ ହେଉଛି ଆଗାମୀ କିଛିବର୍ଷ ମଧ୍ୟରେ ଜଙ୍ଗଲ ଜମି ସବୁ ଜଳାଶୟରେ ପରିଣତ ହୋଇଯିବା ସହିତ ଅସମୟରେ ବଜ୍ରାଘାତ ପରି ପ୍ରାକୃତିକ ବିପର୍ଯ୍ୟୟ ଯୋଗୁଁ ଅନେକଙ଼କ ଜୀବନ ଯିବା ସମ୍ଭାବନାକୁ ଏଡ଼ାଇ ଦିଆଯାଇ ନପାରେ। ତେଣୁ ଏହି ଚୋରା ଚାଲାଣ ଉପରେ ପଦକ୍ଷେପ ଗ୍ରହଣ କରିବା ଦାବି ହୋଇଛି।

Sk Ajaruddin

Local News Reporter ବାସ୍ତା, ବାଲେଶ୍ୱର, ଓଡ଼ିଶା•

40 min ago

ବାରିପଦା -ପଣ୍ଡିତ ଦିନଦୟାଲ ଉପାଧ୍ୟାୟଙ୍କ ପୁଣ୍ୟ ତିଥିକୁ ମୟୁରଭଞ୍ଜ ବିଜେପି ପାଳନ କଲା ସହିଦ ସ୍ମୃତି ଭାବନାରେ