सांगली जिल्हा शिवसेनाप्रमुख महेंद्र चंडाळे हे आपला वाढदिवस साजरा न करता विविध उपक्रमांद्वारे तो साजरा करणार आहेत. सांगली शहर आणि जिल्ह्याला आधार देणाऱ्या कृष्णा नदीची स्वच्छता करणे आणि मूर्तींची स्वच्छता करणे, असे विविध उपक्रम या निमित्ताने राबवले जाणार आहेत. याबाबतची माहिती शिवसेना जिल्हाप्रमुख महेंद्र चंडाळे यांनी दिली आहे.

पंढरपूर येथील आषाढी एकादशी वारीच्या निमित्ताने आयोजित शासकीय पूजा महाराष्ट्र राज्याचे प्रथम नागरिक मुख्यमंत्री देवेंद्र फडणवीस आणि त्यांच्या पत्नी अमृता फडणवीस यांच्या हस्ते संपन्न झाली आहे. या पूजेचा मान धाराशिव जिल्ह्यातील मानाचे वारकरी माने दांपत्य यांना मिळाला असून त्यांच्या हस्ते ही शासकीय पूजा पार पडली.

ऑलंपिकवीर खाशाबा जाधव यांच्या ७४ व्या पदक दिन समारंभाचे अत्यंत उत्साहात आयोजन करण्यात आले असून हा सोहळा मोठ्या उत्साही वातावरणात संपन्न झाला आहे.

फलटण-सातारा मार्गावरील तडवळे फाटा ते वाठार निंबाळकर रस्त्याचे काम गेल्या तीन ते साडेतीन वर्षांपासून अर्धवट अवस्थेत असल्याने अनेक अपघात होत आहेत. रस्त्याचे काम सुरू असतानाही अनेकांना आपला जीव गमवावा लागला आहे. त्यातच गेल्या १५ दिवसांपूर्वी कापशी आळजापूर येथील पुलाचे काम अर्धवट ठेवल्यामुळे एकाला आपला जीव गमवावा लागला आहे. या ठिकाणी जुना पूल पूर्ण न काढताच त्याच्या दोन्ही बाजूंनी वाढ करण्यात आली आहे. तसेच पुलावर कामाचा राडारोडा तसाच राहिल्याने मोठ्या प्रमाणावर खड्डे पडले आहेत. या रस्त्यावरील अर्धवट आणि धोकादायक कामे संबंधित ठेकेदाराने त्वरित पूर्ण करावीत, अशी जोरदार मागणी वाहनचालक व नागरिकांनी केली आहे.

दिल्लीमध्ये आंदोलनादरम्यान महिला आणि विद्यार्थ्यांवर झालेल्या कथित लाठीमाराच्या निषेधार्थ चिपळूण शहरात भव्य निषेध मोर्चा काढण्यात आला. हा मोर्चा गोवळकोट रोड येथून सुरू होऊन छत्रपती शिवाजी महाराज चौकापर्यंत काढण्यात आला. या मोर्चात महिला, युवक, विद्यार्थी, विविध संघटनांचे पदाधिकारी, कार्यकर्ते आणि नागरिक मोठ्या संख्येने सहभागी झाले होते. मोर्चादरम्यान महिला व विद्यार्थ्यांवरील कथित अत्याचाराचा तीव्र निषेध करण्यात आला. लोकशाही मार्गाने आंदोलन करणाऱ्यांवर बळाचा वापर थांबवावा, दोषींवर कठोर कारवाई करावी आणि महिलांच्या सुरक्षिततेची हमी द्यावी, अशी मागणी करण्यात आली. छत्रपती शिवाजी महाराज चौकात झालेल्या सभेत वक्त्यांनी अशा घटनांची निष्पक्ष चौकशी करून संबंधितांवर कठोर कारवाई करण्याची आणि महिला व विद्यार्थ्यांच्या सुरक्षिततेसाठी ठोस उपाययोजना करण्याची जोरदार मागणी केली. या निषेध मोर्चाचे आयोजन चिपळूण काँग्रेस गटनेते साजिद सरगुरोह यांच्या पुढाकाराने करण्यात आले असून, यात काँग्रेसचे पदाधिकारी आणि कार्यकर्ते मोठ्या संख्येने सामील झाले होते. सभेच्या शेवटी राष्ट्रगीताने या मोर्चाची सांगता करण्यात आली.

तासगाव येथील ज्येष्ठ पत्रकार व सामाजिक कार्यकर्ते अधिकराव लोखंडे यांच्या वाढदिवसानिमित्त त्यांचा सत्कार करण्यात आला आहे. तासगावात संपन्न झालेल्या या कार्यक्रमात पोलीस प्रशासन आणि ज्येष्ठ नेत्यांनी अधिकराव लोखंडे यांचा विशेष सत्कार केला.

कराड येथे आयोजित एकदिवसीय लाक्षणिक उपोषण आणि आंदोलनाला विद्यार्थी, पालक व नागरिकांचा अभूतपूर्व प्रतिसाद मिळाला आहे. या आंदोलनात हजारोंच्या संख्येने लोकांनी उपस्थित राहून न्याय्य मागण्यांना आपला ठाम पाठिंबा दिला. दिल्लीतील जंतर-मंतर येथे आपल्या हक्कांसाठी लढा देणाऱ्या विद्यार्थ्यांच्या मागण्यांना यावेळी खंबीर पाठिंबा व्यक्त करण्यात आला, तसेच विद्यार्थ्यांवर झालेल्या अमानुष लाठीहल्ल्याचा तीव्र शब्दांत निषेध करण्यात आला. या आंदोलनात आदिशक्ती महासंघाच्या अश्विनीताई वेताळ पाटील, कृपा हादवे, सविता काशिद व सर्व विद्यार्थी वर्ग सहभागी झाला होता.