ମାନ୍ୟବର ମୁଖ୍ୟମନ୍ତ୍ରୀ ଶ୍ରୀଯୁକ୍ତ ମୋହନ ଚରଣ ମାଝୀଙ୍କ ନେତୃତ୍ୱରେ ଗଠିତ ସରକାରଙ୍କ ଦୁଇ ବର୍ଷ ପୂର୍ତ୍ତି ଉପଲକ୍ଷେ ନବରଙ୍ଗପୁର ଜିଲ୍ଲାର ନବରଙ୍ଗପୁର ବ୍ଲକରେ “ବିକାଶର ଧାରା, ଓଡ଼ିଶା ସାରା” କାର୍ଯ୍ୟକ୍ରମର ତୃତୀୟ ଦିନ ଅନୁଷ୍ଠିତ ହୋଇଯାଇଛି। ଏହି କାର୍ଯ୍ୟକ୍ରମ ଜିଲ୍ଲା ସ୍ତରରେ ଆୟୋଜିତ ହୋଇଥିଲା।

କୋରାପୁଟ ଏସପି ରୋହିତ ବର୍ମା ସୂଚନା ଦେଇଛନ୍ତି ଯେ ଜଙ୍ଗଲରୁ ବିପୁଳ ପରିମାଣର ମାଓ ସାମଗ୍ରୀ ଜବତ କରାଯାଇଛି।

ନାଲକୋର ସୁରକ୍ଷା ବଳୟ ଭିତରେ ମହିଳାମାନେ ସୁରକ୍ଷିତ ନଥିବା ଅଭିଯୋଗ କରି ଦାମନଯୋଡି ନାଲକୋ ବିଶୋଧନାଗାର ଫାଟକ ଆଗରେ ଶତାଧିକ ମହିଳା ଆଜି ସକାଳୁ ପ୍ରବଳ ବର୍ଷା ସତ୍ତ୍ୱେ ବିକ୍ଷୋଭ ପ୍ରଦର୍ଶନ କରିଛନ୍ତି। ଅଭିଯୋଗ ଅନୁଯାୟୀ, ଦାମନଯୋଡି ନାଲକୋ ଟାଉନସିପ୍ ଦୁର୍ବୃତ୍ତମାନଙ୍କ ଆଡ୍ଡାସ୍ଥଳୀ ପାଲଟିଛି ଏବଂ ମହିଳା ତଥା ନାଲକୋ କର୍ମଚାରୀଙ୍କ ପିଲାମାନେ ସୁରକ୍ଷିତ ନାହାଁନ୍ତି। ସୂଚନାନୁସାରେ, ଗତ ଜୁନ୍ ୧୮ ତାରିଖ ସନ୍ଧ୍ୟା ପ୍ରାୟ ସାଢ଼େ ୭ଟା ବେଳେ ଟାଉନସିପ୍ ରାସ୍ତାରେ ଜଣେ ମହିଳା ଚାଲି ଚାଲି ଯାଉଥିବା ସମୟରେ କିଛି ଦୁର୍ବୃତ୍ତ ତାଙ୍କୁ ଅସଦାଚରଣ କରିଥିଲେ। ସୌଭାଗ୍ୟବଶତଃ ମହିଳା ଜଣକ ଦୁର୍ବୃତ୍ତଙ୍କ କବଳରୁ ଖସି ଯାଇଥିଲେ। ସେହିପରି, କିଛି ମାସ ପୂର୍ବରୁ ଅନ୍ୟ ଜଣେ ମହିଳାଙ୍କ ବେକରୁ ସୁନାଚେନ୍ ଲୁଟି ନେବାକୁ ଉଦ୍ୟମ ହୋଇଥିଲା। ଏହା ବ୍ୟତୀତ, ଟାଉନସିପ୍‌ର ପାର୍କଗୁଡ଼ିକ ଅସାମାଜିକ ବ୍ୟକ୍ତି ଓ ମଦ୍ୟପମାନଙ୍କ ଆଡ୍ଡାସ୍ଥଳୀ ପାଲଟିଥିବା ବେଳେ ଛୋଟ ପିଲାମାନଙ୍କ ପ୍ରତି ଅଶ୍ଳୀଳ ବ୍ୟବହାର କରାଯାଉଥିବା ମହିଳାମାନେ ଅଭିଯୋଗ କରିଛନ୍ତି। ଟାଉନସିପ୍‌ର ସୁରକ୍ଷା ପାଇଁ ନାଲକୋ କୋଟି କୋଟି ଟଙ୍କା ଖର୍ଚ୍ଚ କରୁଥିବା ବେଳେ ‘କରନ ସିଂ ସିକ୍ୟୁରିଟି ଏଜେନ୍ସି’ ନାମକ ଏକ ଘରୋଇ ଠିକା ସଂସ୍ଥା ନିୟୋଜିତ ହୋଇଛି। କିନ୍ତୁ, ଏହି ସିକ୍ୟୁରିଟି ସଂସ୍ଥା ମହିଳା ଓ ପିଲାମାନଙ୍କୁ ସୁରକ୍ଷା ଦେବାରେ ସମ୍ପୂର୍ଣ୍ଣ ବିଫଳ ହୋଇଛି। ମହିଳାମାନେ ଅଭିଯୋଗ କରିଛନ୍ତି ଯେ ଏହି ସଂସ୍ଥାର ସିକ୍ୟୁରିଟି ଅଧିକାରୀ କିମ୍ବା କର୍ମଚାରୀମାନେ କେବଳ ମୋବାଇଲ୍ ଦେଖିବାରେ ବ୍ୟସ୍ତ ରହୁଛନ୍ତି। ବାର୍ଷିକ କୋଟି କୋଟି ଟଙ୍କା ଲାଭ କରୁଥିବା ନାଲକୋର ଟାଉନସିପ୍ ଅଞ୍ଚଳରେ ସିସିଟିଭି ଓ ଷ୍ଟ୍ରିଟ୍ ଲାଇଟ୍ ବ୍ୟବସ୍ଥାକୁ ନେଇ ମଧ୍ୟ ପ୍ରଶ୍ନ ଉଠିଛି। ତେଣୁ, ମହିଳାମାନେ ନାଲକୋ ପକ୍ଷରୁ ତୁରନ୍ତ ସୁରକ୍ଷା ଯୋଗାଇ ଦେବାକୁ ଦାବି କରିଛନ୍ତି।

କୋରାପୁଟ ଜିଲ୍ଲାର ଲକ୍ଷ୍ମୀପୁର ବ୍ଲକ୍ ରେ ବିଭିନ୍ନ ଅନୁଷ୍ଠାନ ତରଫରୁ ବିଶ୍ୱ ଯୋଗ ଦିବସ ପାଳନ କରାଯାଇଛି।

ଓଡ଼ିଶା କ୍ରୀଡ଼ା ଜଗତ ପାଇଁ ଏକ ଅପୂରଣୀୟ କ୍ଷତି। ମାଲକାନଗିରି ମାଟିର ଗର୍ବ, ଦେଶର ପ୍ରଖ୍ୟାତ ତୀରନ୍ଦାଜ ତଥା ଦକ୍ଷ ପ୍ରଶିକ୍ଷକ ରାଜେଶ ହାସଦାକ୍‌ଙ୍କର ଗତ ଜୁନ୍ ୨୦, ୨୦୨୬ରେ ପରଲୋକ ହୋଇଯାଇଛି। ସନ୍ଥାଳ ଜନଜାତିରୁ ଆସିଥିବା ରାଜେଶ ନିଜ କଠିନ ପରିଶ୍ରମ ଓ ସଂଘର୍ଷ ବଳରେ ଆନ୍ତର୍ଜାତିକ ସ୍ତରରେ ଦେଶ ଓ ରାଜ୍ୟ ପାଇଁ ଗୌରବ ଆଣିଥିଲେ। ତାଙ୍କ ବିୟୋଗରେ ସମଗ୍ର କ୍ରୀଡ଼ା ଜଗତରେ ଶୋକର ଛାୟା ଖେଳିଯାଇଛି। ତାଙ୍କ ମରଶରୀର ମାଲକାନଗିରି ସ୍ଥିତ ଏମଭି-୨ ଗ୍ରାମରେ ପହଞ୍ଚିବା ପରେ ସେଠାରେ ଏକ ଶୋକାକୁଳ ପରିବେଶ ସୃଷ୍ଟି ହୋଇଥିଲା। ଶହ ଶହ ସ୍ଥାନୀୟ ବାସିନ୍ଦା, କ୍ରୀଡ଼ାବିତ୍ ଏବଂ ଗୁଣଗ୍ରାହୀ ତାଙ୍କର ଶେଷ ଦର୍ଶନ କରିବା ସହ ଅଶ୍ରୁଳ ବିଦାୟ ଜଣାଇଛନ୍ତି। ରାଜେଶ ହାସଦାକ୍ ନିଜ ଖେଳ ଜୀବନରେ ଅନେକ ସଫଳତାର ଶୀର୍ଷ ଛୁଇଁଥିଲେ। ୧୯୯୮ ମସିହାରେ ବ୍ୟାଙ୍କକକ୍‌ଠାରେ ଅନୁଷ୍ଠିତ ଏସିଆନ୍ ଗେମ୍ସରେ ସେ ଭାରତୀୟ ଦଳର ପ୍ରତିନିଧିତ୍ୱ କରି ଓଡ଼ିଶା ପାଇଁ ଗୌରବ ଆଣିଥିଲେ। ଏହା ସହିତ, ୨୦୦୨ରେ ଚୀନ୍‌ଠାରେ ଅନୁଷ୍ଠିତ ସେକେଣ୍ଡ ଏସିଆନ ଗ୍ରାଣ୍ଡ ପ୍ରିକ୍ସରେ ସେ ଷଷ୍ଠ ସ୍ଥାନ ହାସଲ କରିଥିଲେ। ସେ ନିଜର କ୍ରୀଡ଼ା କ୍ୟାରିୟର ମଧ୍ୟରେ ବିଭିନ୍ନ ଜାତୀୟ ଓ ଆନ୍ତର୍ଜାତିକ ପ୍ରତିଯୋଗିତାରେ ୧୩ଟି ସ୍ୱର୍ଣ୍ଣ, ୧୧ଟି ରୌପ୍ୟ ଏବଂ ୩ଟି ବ୍ରୋଞ୍ଜ ପଦକ ଜିତି ରାଜ୍ୟର ସୁନାମ ବଢ଼ାଇଥିଲେ। ଆହତ ସମସ୍ୟା ଯୋଗୁଁ ଖେଳରୁ ଅବସର ନେବା ପରେ ମଧ୍ୟ ସେ ଧନୁର୍ବିଦ୍ୟାକୁ ପ୍ରାଣ ଭରି ଭଲ ପାଉଥିଲେ। ସେ ଭୁବନେଶ୍ୱରସ୍ଥିତ ପ୍ରତିଷ୍ଠିତ କିସ୍ ଅନୁଷ୍ଠାନ ଏବଂ ଓଡ଼ିଶା ଆର୍ଚେରୀ ଦଳର ମୁଖ୍ୟ କୋଚ୍ ଭାବେ ଦାୟିତ୍ୱ ତୁଲାଇଥିଲେ। ନିଜ ଗୁରୁତ୍ୱପୂର୍ଣ୍ଣ ପ୍ରଶିକ୍ଷଣ ମାଧ୍ୟମରେ ସେ ୪୦ରୁ ଅଧିକ ଜାତୀୟ ଓ ଆନ୍ତର୍ଜାତିକ ସ୍ତରର ତୀରନ୍ଦାଜ ଗଢ଼ି ଓଡ଼ିଶାର କ୍ରୀଡ଼ା ଭିତ୍ତିଭୂମିକୁ ସୁଦୃଢ଼ କରିଥିଲେ। କ୍ରୀଡ଼ା କ୍ଷେତ୍ରରେ ତାଙ୍କର ଉଲ୍ଲେଖନୀୟ ଅବଦାନ ପାଇଁ ତାଙ୍କୁ ଏକଲବ୍ୟ ପ୍ରଶସ୍ତି ପତ୍ର, ନାଲ୍‌କୋ ସ୍ପୋର୍ଟସ ଆୱାର୍ଡ, ଅଶୋକ ପଟ୍ଟନାୟକ ମେମୋରିଆଲ ସ୍ପୋର୍ଟସ ଆୱାର୍ଡ ଶ୍ରେଷ୍ଠ କୋଚ୍, ଏବଂ ଦକ୍ଷିଣ ଓଡ଼ିଶା ଉନ୍ନୟନ ପରିଷଦ ସମ୍ମାନରେ ସମ୍ମାନିତ କରାଯାଇଥିଲା। ସେ କେବଳ ଜଣେ ଖେଳାଳି ନଥିଲେ, ବରଂ ଜନଜାତି ସମୁଦାୟ ଓ ସମଗ୍ର ଓଡ଼ିଶାର ଯୁବପିଢ଼ିଙ୍କ ପାଇଁ ଜଣେ ଆଦର୍ଶ ଏବଂ ପ୍ରେରଣାର ଉତ୍ସ ସାଜିଥିଲେ। ଓଡ଼ିଶାରେ ତୀରନ୍ଦାଜୀ ଖେଳର ଉନ୍ନତି ଓ ବିକାଶ ପାଇଁ ତାଙ୍କର ତ୍ୟାଗ, ନିଷ୍ଠା ଏବଂ ଅବଦାନ ସଦା ସର୍ବଦା ସ୍ମରଣୀୟ ରହିବ। ତାଙ୍କର ଏହି ଅକାଳ ବିୟୋଗରେ ବିଭିନ୍ନ ମହଲରୁ ଗଭୀର ଶୋକ ପ୍ରକାଶ କରାଯାଇଛି।

🌹🌹🌹🌹🌹🌹🌹🌹🌹🌹

ଗଜପତି ଜିଲ୍ଲା ସଦର ମହକୁମା ପାରଳାଖେମୁଣ୍ଡି ସ୍ଥିତ ଇଣ୍ଡୋର ଷ୍ଟାଡିୟମ୍ ଠାରେ ଜିଲ୍ଲା ପ୍ରଶାସନ ଓ ଜିଲ୍ଲା କ୍ରୀଡ଼ା ବିଭାଗ ପକ୍ଷରୁ ଜିଲ୍ଲାସ୍ତରୀୟ ଆନ୍ତର୍ଜାତୀୟ ଯୋଗ ଦିବସ ମହାସମାରୋହରେ ପାଳିତ ହୋଇଯାଇଛି। ଏହି କାର୍ଯ୍ୟକ୍ରମରେ ଜିଲ୍ଲାପାଳ ଶ୍ରୀଯୁକ୍ତ ଅକ୍ଷୟ ସୁନୀଲ ଅଗ୍ରୱାଲ ଅଧ୍ୟକ୍ଷତା କରିଥିବାବେଳେ, ପାରଳାଖେମୁଣ୍ଡିର ମାନ୍ୟବର ବିଧାୟକ ଶ୍ରୀଯୁକ୍ତ ରୂପେଶ କୁମାର ପାଣିଗ୍ରାହୀ ମୁଖ୍ୟ ଅତିଥି ଭାବେ ଯୋଗଦେଇଥିଲେ। ଅନ୍ୟ ସମ୍ମାନିତ ଅତିଥିମାନଙ୍କ ମଧ୍ୟରେ ଆରକ୍ଷୀ ଅଧିକ୍ଷକ ଶ୍ରୀ ପ୍ରହଲ୍ଲାଦ ସହାୟ ମୀନା, ବନଖଣ୍ଡ ଅଧିକାରୀ ପାରଳାଖେମୁଣ୍ଡି ଶ୍ରୀ କେ. ନାଗାରାଜୁ, ମୁଖ୍ୟ ଉନ୍ନୟନ ଅଧିକାରୀ ତଥା ନିର୍ବାହୀ ଅଧିକାରୀ ଜିଲ୍ଲାପରିଷଦ ଶ୍ରୀ ଦୟାମୟ ପାଢ଼ୀ, ପାରଳାଖେମୁଣ୍ଡି ପୌରାଧ୍ୟକ୍ଷା ଶ୍ରୀମତୀ ନିର୍ମଳା ସେଠୀ, ଅତିରିକ୍ତ ନିର୍ବାହୀ ଅଧିକାରୀ ଜିଲ୍ଲାପରିଷଦ ଶ୍ରୀ ପୃଥ୍ୱୀରାଜ ମଣ୍ଡଳ, ଜିଲ୍ଲା ଶିକ୍ଷା ଅଧିକାରୀ ଡ଼.ମାୟାଧର ସାହୁ ଏବଂ ଜିଲ୍ଲା କ୍ରୀଡ଼ା ଅଧିକାରୀ ଶ୍ରୀ ତ୍ରୀନାଥ ସାହୁ ପ୍ରମୁଖ ମଞ୍ଚାସୀନ ଥିଲେ। ଚଳିତ ବର୍ଷର ଆନ୍ତର୍ଜାତୀୟ ଯୋଗ ଦିବସର ବିଷୟବସ୍ତୁ “ସୁସ୍ଥ ବାର୍ଦ୍ଧକ୍ୟ ନିମନ୍ତେ ଯୋଗ” ଥିଲା ଏବଂ “ନିୟମିତ ଯୋଗ କରନ୍ତୁ, ସୁସ୍ଥ ରୁହନ୍ତୁ” ବାର୍ତ୍ତା ପ୍ରଦାନ କରାଯାଇଥିଲା। ଜିଲ୍ଲାପାଳ ନିଜ ବକ୍ତବ୍ୟରେ କହିଥିଲେ ଯେ, ଯୋଗ କେବଳ ଶାରୀରିକ ସୁସ୍ଥତା ନୁହେଁ ବରଂ ମାନସିକ ଓ ଆଧ୍ୟାତ୍ମିକ ବିକାଶରେ ମଧ୍ୟ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରେ। ସେ ଦୈନିକ ଯୋଗାଭ୍ୟାସ କରିବାକୁ ସମସ୍ତଙ୍କୁ ଆହ୍ୱାନ କରିବା ସହ ଶପଥ ପାଠ କରାଇଥିଲେ। ଅନ୍ୟ ଅତିଥିମାନେ ମଧ୍ୟ ଯୋଗ ଦିବସର ତାତ୍ପର୍ଯ୍ୟ ଏବଂ ଦୈନିକ ଜୀବନରେ ଯୋଗର ଆବଶ୍ୟକତା ସମ୍ପର୍କରେ ଆଲୋକପାତ କରିଥିଲେ। ଯୋଗ ପ୍ରଶିକ୍ଷକମାନଙ୍କ ନେତୃତ୍ୱରେ ଉପସ୍ଥିତ ଅତିଥି, ଲୋକପ୍ରତିନିଧି, ପ୍ରଶାସନିକ ଅଧିକାରୀ ଏବଂ ସ୍ଥାନୀୟ ଜନସାଧାରଣ ସାମୂହିକ ଯୋଗାଭ୍ୟାସରେ ଅଂଶଗ୍ରହଣ କରିଥିଲେ। ସେହିପରି ଗଜପତି ଜିଲ୍ଲାର ସମସ୍ତ ବ୍ଲକ ଓ ସହରାଞ୍ଚଳରେ ମଧ୍ୟ ଆନ୍ତର୍ଜାତୀୟ ଯୋଗ ଦିବସ ପାଳନ କରାଯାଇଛି। ଏହି କାର୍ଯ୍ୟକ୍ରମରେ ବିଭିନ୍ନ ବିଭାଗର ଜିଲ୍ଲାସ୍ତରୀୟ ଅଧିକାରୀ, ସ୍ଥାନୀୟ ଜନପ୍ରତିନିଧି, କ୍ରୀଡ଼ାବିତ, ସାମ୍ବାଦିକ ଓ ସ୍ଥାନୀୟ ଜନସାଧାରଣ ପ୍ରମୁଖ ଅଂଶଗ୍ରହଣ କରିଥିଲେ।

କୋରାପୁଟ ଜିଲ୍ଲାର କୋଟପାଡ଼ ଅଞ୍ଚଳରୁ ମୋଟ ୫ ଜଣ ପରୀକ୍ଷାର୍ଥୀ NEET ପରୀକ୍ଷାରେ ଅଂଶଗ୍ରହଣ କରିଛନ୍ତି।

ଜୀବନରେ ବୟସ ବଢ଼ିବା ସହିତ ଅନେକ ସମୟରେ ଉତ୍ସାହ କମିଯାଏ, କିନ୍ତୁ ଏ କ୍ଷେତ୍ରରେ ବୟସ ବୃଦ୍ଧି ସତ୍ତ୍ୱେ ଉତ୍ସାହରେ କୌଣସି ହ୍ରାସ ଘଟିନାହିଁ।

ପ୍ରତିବର୍ଷ ଜୁନ ୨୧ ତାରିଖକୁ ବିଶ୍ୱବାସୀଙ୍କୁ ଏକ ସୁସ୍ଥ, ଶାନ୍ତିପୂର୍ଣ୍ଣ ଏବଂ ନିରାମୟ ଜୀବନଶୈଳୀ ଆପଣାଇବାକୁ ପ୍ରେରଣା ଦେବା ଉଦ୍ଦେଶ୍ୟରେ ଆନ୍ତର୍ଜାତୀୟ ଯୋଗ ଦିବସ ରୂପେ ପାଳନ କରାଯାଏ। ନିୟମିତ ଯୋଗାଭ୍ୟାସ ଦ୍ୱାରା ମାନସିକ ଚାପ ଓ ଦୁଶ୍ଚିନ୍ତା ଦୂର ହେବା ସହ ଶରୀର ସୁସ୍ଥ ଓ ନିରୋଗ ରହିଥାଏ। ଏହା ମନରେ ଏକାଗ୍ରତା, ସକାରାତ୍ମକ ଚିନ୍ତାଧାରା ଏବଂ ଆତ୍ମବିଶ୍ୱାସ ବୃଦ୍ଧି କରି ମଣିଷ, ପ୍ରକୃତି ଓ ସମଗ୍ର ବିଶ୍ୱ ମଧ୍ୟରେ ସନ୍ତୁଳନ ଓ ଭାଇଚାରା ବଜାୟ ରଖିବାରେ ସହାୟକ ହୋଇଥାଏ। ଭାରତର ଏହି ପ୍ରାଚୀନ ପରମ୍ପରା ଓ ସଂସ୍କୃତିକୁ ବିଶ୍ୱ ଦରବାରରେ ପରିଚିତ କରାଇବା ଏବଂ ଦୈନନ୍ଦିନ ଜୀବନରେ ଏହାକୁ ସାମିଲ କରିବା ପାଇଁ ଲୋକଙ୍କୁ ଉତ୍ସାହିତ କରିବା ଉଦ୍ଦେଶ୍ୟରେ ଆଜି ସମଗ୍ର ଦେଶରେ ଆନ୍ତର୍ଜାତୀୟ ଯୋଗ ଦିବସ ପାଳନ କରାଯାଇଛି। ଏହି ଅବସରରେ ନାଲକୋ ଦାମନଯୋଡ଼ି ପକ୍ଷରୁ ଟାଉନସିପ ସ୍ଥିତ ନାଲକୋ କ୍ଲବ ପରିସରରେ ଏହି ଦିବସ ପାଳିତ ହୋଇଥିଲା, ଯେଉଁଥିରେ ନାଲକୋର ବରିଷ୍ଠ ଅଧିକାରୀ, କର୍ମଚାରୀ ଏବଂ ବିଭିନ୍ନ ସଂଗଠନର ସଦସ୍ୟମାନେ ଉପସ୍ଥିତ ରହି ଯୋଗାଭ୍ୟାସ କରିଥିଲେ। ସେହିପରି, ଦାମନଯୋଡିରେ ସ୍ଥାନୀୟ ମାଥାଲପୁଟ କଲ୍ୟାଣ ମଣ୍ଡପ, ସ୍ୱାସ୍ଥ୍ୟକେନ୍ଦ୍ର, ଶିକ୍ଷାନୁଷ୍ଠାନ ଏବଂ ପ୍ରତ୍ୟେହ ଅନୁଷ୍ଠିତ ଯୋଗ ଶିବିରମାନଙ୍କରେ ମଧ୍ୟ ଆନ୍ତର୍ଜାତୀୟ ଯୋଗ ଦିବସ ପାଳନ କରାଯାଇଛି।