સુરતના ડીંડોલી વિસ્તારમાં સુરત મહાનગરપાલિકા (SMC)ની ગંભીર બેદરકારી સામે આવી છે. વરસાદની શરૂઆત પહેલા જ ન્યૂ ડીંડોલી જવાના રોડ પર એક ડમ્પર ધસી પડ્યું હતું, જેના કારણે રોડની ગુણવત્તા અને પાલિકાની પ્રિ-મોન્સુન કામગીરી પર ગંભીર સવાલો ઊભા થયા છે.

સુરત શહેરની સચિન પોલીસે દેવીપૂજક ગેંગ સાથે સંકળાયેલા એક વોન્ટેડ આરોપીની ધરપકડ કરી છે. આ આરોપી 4,34,300 રૂપિયાની ચોરીના કેસમાં વોન્ટેડ હતો, જે અંગે પોલીસે કાર્યવાહી કરી તેને ઝડપી પાડ્યો છે.

સુરત જિલ્લાના ચલથાણ ખાતેથી પસાર થતી કેનાલમાં એક કાર અનિયંત્રિત થઈને ખાબકી હોવાનું જાણવા મળ્યું છે.

રાજ્ય સરકારની જનકલ્યાણલક્ષી યોજનાઓનો લાભ સમાજના છેવાડાના વ્યક્તિ સુધી સરળતાથી પહોંચાડવાના હેતુથી પલસાણા તાલુકામાં 'જન કલ્યાણ શિબિર'નું આયોજન કરવામાં આવ્યું છે. આ શિબિરો દરમિયાન વિવિધ સરકારી વિભાગોના અધિકારીઓ દ્વારા નાગરિકોને યોજનાઓ અંગે માર્ગદર્શન પૂરું પાડવામાં આવી રહ્યું છે, સાથે જ સ્થળ પર જ અરજીઓ સ્વીકારી લાભાર્થીઓને જરૂરી સહાય પણ પૂરી પાડવામાં આવી રહી છે. પલસાણા તાલુકામાં કુલ ત્રણ સ્થળોએ આ જન કલ્યાણ શિબિર યોજવાનું આયોજન કરાયું છે. પલસાણાના મામલતદાર મુકેશ પટેલે માહિતી આપતા જણાવ્યું કે, પ્રથમ શિબિર કારેલી ગામે સફળતાપૂર્વક યોજાઈ હતી. બીજી શિબિર 18 જૂનના રોજ પલસાણા પ્રાથમિક શાળામાં યોજાશે, અને ત્રીજી તથા અંતિમ શિબિર 20 જૂનના રોજ વરેલી પ્રાથમિક શાળામાં યોજાશે. તેમણે ઉમેર્યું હતું કે શિબિરોમાં અધિકારીઓ અને કર્મચારીઓ ઉપસ્થિત રહી સરકારની વિવિધ કલ્યાણકારી યોજનાઓ અંગે વિગતવાર માહિતી આપે છે, અને જરૂરી દસ્તાવેજોની ચકાસણી કરીને પાત્ર લાભાર્થીઓને યોજનાઓનો લાભ મળે તે માટે કામગીરી થઈ રહી છે. મામલતદાર મુકેશ પટેલે ગ્રામજનોને જરૂરી દસ્તાવેજો સાથે ઉપસ્થિત રહી યોજનાઓનો લાભ લેવા અપીલ કરી હતી. પલસાણા તાલુકા પંચાયતના પ્રમુખ અશ્વિનીબેન નિકુંજસિંહ વાંસીયાએ જણાવ્યું હતું કે, આ જન કલ્યાણ શિબિર અંતર્ગત તાલુકાના કુલ 18 ગામોને આવરી લેવામાં આવ્યા છે. કારેલી ગામે યોજાયેલી પ્રથમ શિબિરમાં સરકારની 57થી વધુ વિવિધ કલ્યાણકારી યોજનાઓ અંગે માહિતી આપવામાં આવી હતી અને પાત્ર લાભાર્થીઓને સ્થળ પર જ લાભ મળે તે માટે વ્યવસ્થા કરાઈ હતી. શિબિર દરમિયાન આવકના દાખલા, જાતિના દાખલા, આધાર આધારિત સેવાઓ, સામાજિક સુરક્ષા યોજનાઓ, મહિલા અને બાળ વિકાસ, કૃષિ, આરોગ્ય, શિક્ષણ, પેન્શન સહિત વિવિધ વિભાગોની યોજનાઓ અંગે માહિતી આપવામાં આવી હતી. કારેલી ખાતે યોજાયેલી પ્રથમ શિબિરમાં મોટી સંખ્યામાં ગ્રામજનોએ ઉપસ્થિત રહી યોજનાઓની માહિતી મેળવી ઉત્સાહપૂર્વક અરજી પ્રક્રિયામાં ભાગ લીધો હતો. આયોજકો દ્વારા આગામી શિબિરોમાં પણ વધુમાં વધુ લોકો હાજરી આપે તેવી અપીલ કરવામાં આવી છે. આ શિબિરમાં પલસાણા મામલતદાર મુકેશભાઈ વી. પટેલ, તાલુકા વિકાસ અધિકારી ભાવસિંહભાઈ બી. પરમાર, સી.ડી.પી.ઓ. સેજલબેન ઇટાલીયા, જિલ્લા પંચાયત સભ્ય, જિલ્લા સંગઠન ઉપપ્રમુખ મોહનભાઈ આહીર, તાલુકા સંગઠન પ્રમુખ કૃણાલભાઈ પટેલ, ઉપપ્રમુખ શૈલેષભાઈ પટેલ, પલસાણા તાલુકા પંચાયત પ્રમુખ અશ્વિનીબેન નિકુંજસિંહ વાંસીયા સહિત અનેક આગેવાનો અને અધિકારીઓ ઉપસ્થિત રહ્યા હતા.

સુરત શહેરના સ્પેશિયલ ઓપરેશન ગ્રુપ (SOG) એ પાંડેસરા પોલીસ સ્ટેશનમાં નોંધાયેલા NDPS (નાર્કોટિક્સ) કેસમાં લાંબા સમયથી ફરાર આરોપીને ઝડપી પાડ્યો છે. ગુપ્ત બાતમીના આધારે પોલીસે આરોપી ઇમરાન ઉર્ફે ઇમને સલાબતપુરા વિસ્તારમાંથી પકડ્યો હતો. તે પાંડેસરા પોલીસ સ્ટેશનમાં નોંધાયેલા MD ડ્રગ્સ (મેફેડ્રોન) કેસમાં વોન્ટેડ હતો અને ધરપકડથી બચવા માટે સતત ફરાર હતો. પોલીસ તપાસમાં સામે આવ્યું છે કે, આરોપી વિરુદ્ધ અગાઉ પણ અનેક ગુનાહિત કેસ નોંધાયેલા છે. આ કાર્યવાહી સુરત પોલીસની "નો ડ્રગ્સ ઇન સુરત સિટી" ઝુંબેશ હેઠળ કરવામાં આવી છે, જેનો ઉદ્દેશ્ય શહેરમાંથી નશીલા પદાર્થોના વ્યવસાયને નાબૂદ કરવાનો છે. પોલીસે આરોપીની ધરપકડ કરીને આગળની કાયદેસરની કાર્યવાહી હાથ ધરી છે.

સુરત મહાનગરપાલિકા પરિસરમાં બોમ્બ મૂકવામાં આવ્યો હોવાના ધમકીભર્યા ઈ-મેઇલ મળતાં ખળભળાટ મચી ગયો છે. ઘટનાની જાણ થતાં જ સુરત પોલીસના ઉચ્ચ અધિકારીઓ તાત્કાલિક સ્થળ પર પહોંચી ગયા હતા. સુરક્ષા વ્યવસ્થાના ભાગરૂપે ડોગ સ્ક્વોડ અને બોમ્બ સ્ક્વોડની ટીમોને પણ બોલાવવામાં આવી છે, અને હાલ સમગ્ર મહાનગરપાલિકા પરિસરમાં સઘન તપાસ અને ચેકિંગ હાથ ધરવામાં આવી રહ્યું છે. જોકે, હાલ સુધી કોઈ શંકાસ્પદ વસ્તુ મળી આવી હોવાની સત્તાવાર માહિતી સામે આવી નથી. બોમ્બ મૂકવામાં આવ્યો છે કે નહીં તે અંગે સ્પષ્ટતા કરવા માટે ઉચ્ચ કક્ષાના અધિકારીઓ સ્થળ પર હાજર રહી તપાસની કામગીરીનું નિરીક્ષણ કરી રહ્યા છે. આ ઉપરાંત, પોલીસે ધમકીભર્યા ઈ-મેઇલના સ્ત્રોત અંગે પણ તપાસ શરૂ કરી છે. તપાસ પૂર્ણ થયા બાદ જ સમગ્ર મામલે વધુ વિગતો સ્પષ્ટ થઈ શકશે.

સુરતમાં શિક્ષણના ધામ ગણાતી એક શાળામાં ચોંકાવનારી ઘટના સામે આવી છે, જ્યાં 11 વર્ષના એક વિદ્યાર્થીએ તેના ક્લાસમેટ પર જીવલેણ હુમલો કર્યો હતો. વર્ગખંડમાં થયેલી સામાન્ય બોલાચાલી બાદ આ ઝઘડો લોહિયાળ બન્યો હતો. શાળા છૂટ્યા બાદ એક વિદ્યાર્થીએ બીજા વિદ્યાર્થીને ચપ્પુના ઘા માર્યા હતા. આ આઘાતજનક ઘટના સુરત મહાનગરપાલિકા સંચાલિત શાળામાં બની હતી. હુમલામાં ગંભીર રીતે ઘાયલ થયેલા વિદ્યાર્થીને તાત્કાલિક સિવિલ હોસ્પિટલમાં દાખલ કરવામાં આવ્યો છે.

સુરત LCB પોલીસે એક આરોપીને ઝડપી પાડ્યો છે, જે પ્રોહિબિશન કેસમાં છેલ્લા પાંચ મહિનાથી ફરાર હતો. પોલીસ દ્વારા તેની ધરપકડ કરવામાં આવી છે.

સુરત શહેરને નશામુક્ત બનાવવાના “NO DRUGS IN SURAT CITY” અભિયાન હેઠળ સચિન GIDC પોલીસને NDPS એક્ટના એક કેસમાં ફરાર ચાલી રહેલા આરોપીને પકડવામાં સફળતા મળી છે. પોલીસે આરોપીની ધરપકડ કરીને વધુ કાયદેસરની કાર્યવાહી હાથ ધરી છે.

સુરત જિલ્લાના ચલથાણ ગામમાં એક નહેર અચાનક આફતરૂપ બની ગઈ હતી, જ્યાં એક કાર નહેરમાં ડૂબી જતાં ભારે હડકંપ મચી ગયો હતો. આ ઘટનાને પગલે આસપાસના વિસ્તારમાં ભય અને અફરાતફરીનો માહોલ સર્જાયો હતો.