திருச்சி மாவட்டம் லால்குடி அருகே உள்ள நன்னிமங்கலத்தில் அமைந்துள்ள 1,200 ஆண்டுகள் பழமையான மீனாட்சி சுந்தரேசுவரர் கோயிலில் மர்ம நபர்கள் 11.8 கிலோ எடையுள்ள வெண்கல உற்சவர் சிலையை திருடிச் சென்றுள்ளனர். இந்தத் திருட்டில் ஈடுபட்டவர்கள் கோயிலின் 5 பூட்டுகளை உடைத்து உள்ளே நுழைந்துள்ளனர். மேலும், அங்கு பொருத்தப்பட்டிருந்த சிசிடிவி கேமராக்களையும் எடுத்துச் சென்றுள்ளனர். லால்குடி போலீசார் கைரேகை நிபுணர்கள் மற்றும் மோப்ப நாயின் உதவியுடன் விசாரணை நடத்தி வருகின்றனர். குற்றவாளிகளை தீவிரமாக தேடி வருவதாக போலீசார் தெரிவித்துள்ளனர்.

திண்டுக்கல் மாவட்டம் நத்தத்தில், தங்களுக்கு போதிய விலை கிடைக்காததால் விவசாயிகள் தாங்கள் விளைவித்த மாங்காய்களை குப்பையில் கொட்டி அழித்துள்ளனர். இதனால், மாங்காய்கள் அனைத்தும் வீணாகி குப்பையில் குவிந்தன. இல்லாதவர்களுக்கு ஒரு ரூபாய் விலைக்குக் கூட கொடுத்து வைத்திருக்கலாமே என சமூக வலைத்தளங்களில் கருத்துக்கள் எழுந்துள்ளன.

திண்டுக்கல் மாவட்டம் ஆத்தூர் ஒன்றியம் சித்தரேவு ஊராட்சிக்குட்பட்ட கதிர் நாயக்கன்பட்டி பிரிவு அருகே செயல்பட்டு வரும் அரசு மதுபானக் கடையை அகற்றக்கோரி சித்தரேவு மற்றும் அதனைச் சுற்றியுள்ள பகுதிகளைச் சேர்ந்த சுமார் 300-க்கும் மேற்பட்ட பொதுமக்கள் போராட்டத்தில் ஈடுபட்டுள்ளனர். சித்தையன் கோட்டை, அய்யம்பாளையம் செல்லும் சாலையில் அமர்ந்து அவர்கள் இந்த சாலை மறியல் போராட்டத்தை நடத்தினர். தகவல் அறிந்து சம்பவ இடத்திற்கு விரைந்து வந்த பட்டிவீரன்பட்டி காவல்துறையினர், போராட்டத்தில் ஈடுபட்ட பொதுமக்களுடன் சமரசப் பேச்சுவார்த்தையில் ஈடுபட்டனர். இந்த சாலை மறியல் போராட்டத்தால் சுமார் 2 மணி நேரத்திற்கும் மேலாக போக்குவரத்து பாதிக்கப்பட்டுள்ளது.

அ.தி.மு.க. முன்னாள் அமைச்சர் ஆர்.பி. உதயகுமார், தமிழக சட்டமன்றக் கூட்டத்தொடர் மக்களுக்கு ஏற்றம் தருமா அல்லது ஏமாற்றம் தருமா என்று கேள்வி எழுப்பியுள்ளார். ஜூன் 18 அன்று அவர் வெளியிட்ட வீடியோவில், கடன்கள் தள்ளுபடி செய்யப்படும் என்ற எதிர்பார்ப்புடன் காத்திருந்த மக்கள், அரசு வாக்குறுதிகளைத் தள்ளுபடி செய்துவிடுமோ என்று கவலையுடன் இருப்பதாகக் கடுமையாகக் குற்றம் சாட்டினார்.

திண்டுக்கல் மாவட்டம் பழனி அருகேயுள்ள ஆயக்குடி பகுதியில், தமிழ் திரைப்பட இயக்குநரான வசந்தபாலன் இயக்கத்தில் நடிகர் அருள்நிதி ஸ்டாலின் நடிக்கும் புதிய திரைப்படத்தின் படப்பிடிப்பு இன்றுடன் ஏழாவது நாளாக தொடர்ந்து நடைபெற்று வருகிறது. 'வெயில்' மற்றும் 'அங்காடித்தெரு' போன்ற படங்களை இயக்கிய வசந்தபாலன், இந்தப் புதிய படத்தை இயக்குகிறார்.

தமிழகம் மற்றும் கேரள எல்லையில் அமைந்துள்ள முல்லைப்பெரியாறு அணையின் நீர்ப்பிடிப்புப் பகுதிகளில் மழை பெய்ய வேண்டும் என வலியுறுத்தி தேக்கடியில் கம்பம் பள்ளத்தாக்கு விவசாயிகள் மும்மதப் பிரார்த்தனை வழிபாட்டு நிகழ்ச்சியை நடத்தினர். தேனி, திண்டுக்கல், மதுரை, ராமநாதபுரம், சிவகங்கை ஆகிய ஐந்து மாவட்ட மக்களின் குடிநீர் மற்றும் விவசாயத்திற்கான முக்கிய நீராதாரமாக முல்லைப்பெரியாறு அணை விளங்குகிறது. இந்த அணை நீரை நம்பி இப்பகுதியில் விவசாயம் நடைபெற்று வருகிறது. தேனி மாவட்டத்தில் உள்ள 14,707 ஏக்கர் இருபோக சாகுபடி நிலங்கள் பெரியாறு அணை நீரையே சார்ந்துள்ளன. இந்த நிலங்களுக்கு பெரியாறு அணையிலிருந்து முதல் போக விவசாயத்திற்காக ஒவ்வொரு ஆண்டும் ஜூன் முதல் வாரத்தில் தண்ணீர் திறக்கப்படுவது வழக்கம். ஆனால், இந்த ஆண்டு ஜூன் ஒன்றாம் தேதி தமிழகப் பகுதிக்கு தண்ணீர் திறக்கப்பட வேண்டிய நிலையில், தண்ணீர் திறக்கப்படவில்லை. ஜூன் மாதத்தில் தொடங்க வேண்டிய பருவமழை ஏமாற்றி வருவதால், முதல் போகத்திற்கு போதுமான தண்ணீர் திறக்கப்படுமா என்ற கேள்வி எழுந்துள்ளது. அணையின் நீர்ப்பிடிப்புப் பகுதிகளில் மழை இல்லாததால், அணையின் நீர்மட்டம் தொடர்ந்து குறைந்து வருகிறது. தற்போது முல்லைப்பெரியாறு அணையின் நீர்மட்டம் 113.55 அடியாக உள்ளது. இதன் காரணமாக, தேனி மாவட்டம் குமுளி அருகே உள்ள தேக்கடியில் உள்ள பொதுப்பணித்துறை அலுவலகப் பகுதியில், தமிழகத்திற்கு தண்ணீர் திறந்துவிடப்படும் ஷட்டர் பகுதியில் கம்பம் பள்ளத்தாக்கு விவசாயிகள் மற்றும் மேலூர் பகுதி விவசாயிகள் ஒன்றிணைந்து மழை வேண்டி மும்மதப் பிரார்த்தனை வழிபாட்டு நிகழ்ச்சியை நடத்தினர். அங்குள்ள ஜெயதுர்க்கை கோவிலில் இந்து மதத்தினர் வருண பகவானுக்கு சிறப்பு பூஜை செய்து, பூஜை செய்யப்பட்ட கலச நீரை பெரியாறு அணையிலிருந்து தமிழகத்திற்கு தண்ணீர் வரும் தேக்கடியிலுள்ள ஷட்டர் பகுதியில் பெரியாற்று நீரில் கலந்தனர். இதேபோல், கிறிஸ்தவ மதத்தினரும் இஸ்லாமிய மதத்தினரும் ஷட்டர் அருகே தங்கள் முறைப்படி மழை வேண்டி பிரார்த்தனைகளை மேற்கொண்டனர். இந்நிகழ்ச்சியில் பொதுப்பணித்துறை அதிகாரிகள், விவசாய சங்கத்தினர் உள்ளிட்ட ஏராளமான விவசாயிகள் மற்றும் மும்மதக் குருமார்கள் கலந்து கொண்டனர்.

காரைக்குடி மாநகராட்சியில் உள்ள மருதுபாண்டியர் நகர் அங்காள பரமேஸ்வரி அம்மன் ஆலயத்தின் திருவிழாவை முன்னிட்டு முளைப்பாரி திருவிழா சிறப்பாக நடைபெற்றது. பொதுமக்கள் முளைப்பாரிகளை எடுத்து ஊர்வலமாக வந்து அங்காள பரமேஸ்வரி ஆலயத்தை அடைந்தனர்.

திருச்சி மாவட்டம் லால்குடி அருகே உள்ள நன்னிமங்கலத்தில் அமைந்துள்ள 1,200 ஆண்டுகள் பழமையான மீனாட்சி சுந்தரேசுவரர் கோயிலில் மர்ம நபர்கள் 11.8 கிலோ எடையுள்ள வெண்கல உற்சவர் சிலையை திருடிச் சென்றுள்ளனர். இந்தத் திருட்டில் ஈடுபட்டவர்கள் கோயிலின் 5 பூட்டுகளை உடைத்து உள்ளே நுழைந்துள்ளனர். மேலும், அங்கு பொருத்தப்பட்டிருந்த சிசிடிவி கேமராக்களையும் எடுத்துச் சென்றுள்ளனர். லால்குடி போலீசார் கைரேகை நிபுணர்கள் மற்றும் மோப்ப நாயின் உதவியுடன் விசாரணை நடத்தி வருகின்றனர். குற்றவாளிகளை தீவிரமாக தேடி வருவதாக போலீசார் தெரிவித்துள்ளனர்.

திண்டுக்கல் மாவட்டத்தில் உள்ள ஒட்டன்சத்திரம் நெல் கொள்முதல் நிலையத்தில் விவசாயியிடம் இருந்து ₹2 லட்சம் லஞ்சம் வாங்கிய அரசு அலுவலர் லஞ்ச ஒழிப்புத் துறையினரால் கைது செய்யப்பட்டார்.

மதுரை அருகே கப்பலூர் பகுதியில் உள்ள இந்தியன் ஆயில் கார்ப்பரேஷன் எண்ணெய் சேமிப்பு கிடங்கிற்குப் பின்புறம் இருந்த காலி இடத்தில் இன்று (ஜூன் 17) திடீரென குப்பைகள் தீப்பற்றி எரிந்தன. இதனால் அப்பகுதி முழுவதும் புகை மூட்டமாக காட்சியளித்தது. இந்த தீவிபத்தின்போது, கன்னியாகுமரி நோக்கிச் சென்ற ரயில் ஒன்று அப்பகுதியைக் கடந்து சென்றதால், ரயிலில் பயணித்தவர்கள் மற்றும் அப்பகுதி பொதுமக்கள் அச்சமடைந்தனர். தீயணைப்புத் துறைக்கு தகவல் தெரிவிக்கப்பட்டும், அவர்கள் தாமதமாக வந்ததாகவும், அதற்குள்ளாகவே தீ தானாக அணைந்துவிட்டதாகவும் அப்பகுதியினர் தெரிவித்தனர். நல்லவேளையாக, பெரும் விபத்து தவிர்க்கப்பட்டது.