జగిత్యాల జిల్లా మల్యాల మండలంలోని ప్రముఖ పుణ్యక్షేత్రమైన కొండగట్టు శ్రీ ఆంజనేయస్వామిని రాష్ట్ర ప్రభుత్వ విప్ ఆది శ్రీనివాస్ దర్శించుకున్నారు. ఆలయానికి చేరుకున్న ఆయనకు ఆలయ అధికారులు మరియు అర్చకులు ఘన స్వాగతం పలికారు. ఆలయ కార్యనిర్వహణాధికారి (ఈఓ) ఎస్. అంజనారెడ్డి పూలమాల వేసి సాదరంగా ఆహ్వానించగా, ఆలయ అర్చకులు స్వస్తి వేదమంత్రాలతో ఆయనను స్వాగతించి ప్రత్యేక పూజా కార్యక్రమాలను నిర్వహించారు. శ్రీ ఆంజనేయస్వామి వారిని దర్శించుకున్న ఆది శ్రీనివాస్ ప్రత్యేక పూజల్లో పాల్గొని రాష్ట్ర ప్రజలు సుఖశాంతులతో ఉండాలని ప్రార్థించారు. ఆలయ సంప్రదాయాల ప్రకారం, అర్చకులు ఆయనకు వేదాశీర్వచనం అందించి, స్వామివారి తీర్థప్రసాదాలను అందజేశారు. ఈ సందర్భంగా ఆలయ అధికారులు, ప్రజాప్రతినిధులు, భక్తులు మరియు పార్టీ నాయకులు పాల్గొన్నారు.

కరీంనగర్ పీఎంజే జ్యువెలరీ షోరూంలో మే 3న జరిగిన సంచలన సాయుధ దోపిడీ కేసును ఛేదించి, కీలక నిందితులను అరెస్ట్ చేసిన కరీంనగర్ పోలీస్ కమిషనర్ గౌష్ ఆలంను ఎంఐఎం నాయకులు మంగళవారం ఆయన కార్యాలయంలో ఘనంగా సన్మానించారు. ఎంఐఎం కరీంనగర్ అధ్యక్షుడు సయ్యద్ గులాం అహ్మద్ హుస్సేన్ ఆధ్వర్యంలో ఎంఐఎం కార్పొరేటర్లు, నాయకులు మర్యాద పూర్వకంగా కలిసి, పూల బోకేను అందించి, శాలువాతో సన్మానం చేశారు. ఈ సందర్భంగా గులాం అహ్మద్ హుస్సేన్ మాట్లాడుతూ, ఈ కేసును అత్యంత ప్రతిష్టాత్మకంగా తీసుకుని, దేశంలోని వివిధ రాష్ట్రాల్లో పెద్ద పెద్ద దోపిడీలు చేసి పోలీసుల నుంచి తప్పించుకు తిరుగుతున్న కరుడుగట్టిన ముఖ్య నిందితుడితో పాటు మరో ఇద్దరు అంతర్రాష్ట్ర నిందితులను కమిషనర్ గౌష్ ఆలం అత్యాధునిక సాంకేతిక పరిజ్ఞానంతో, మెరుగైన నెట్‌వర్క్‌తో చాకచక్యంగా పట్టుకున్నారని ప్రశంసించారు. నిందితుల నుంచి కీలకమైన ఆధారాలు, ఆయుధాలను స్వాధీనం చేసుకున్నారని తెలిపారు. ఆయన సేవలు విమర్శకుల నోళ్లు మూయించి, 'తెలంగాణ పోలీస్ బెటర్ పోలీస్' అని నిరూపించడమే కాకుండా, కరీంనగర్ పేరును దేశం గర్వించే స్థాయిలో నిలబెట్టాయని అన్నారు. నేరస్థులకు పాలిట సింహస్వప్నంలా మారి, నేర రహిత సమాజం కోసం అహర్నిశలు కృషి చేస్తూ ప్రభుత్వానికి మంచి పేరు తీసుకొస్తున్న ఇలాంటి నిజాయితీగల అధికారి కరీంనగర్‌లో సేవలు అందించడం జిల్లా ప్రజల అదృష్టమని గులాం అహ్మద్ హుస్సేన్ పేర్కొన్నారు. ఈ కార్యక్రమంలో ఎంఐఎం జాయింట్ సెక్రటరీ సయ్యద్ మొయిజుద్దీన్ ఖాద్రి, కో కార్పొరేటర్ సయ్యద్ ఇబ్రహీం, కార్పొరేటర్ మాజిద్ హుస్సేన్, మాజీ కార్పొరేటర్లు ఆరిఫ్ అహ్మద్, అహ్మద్ మొహియుద్దీన్ బాబుజానీ, లింగంపల్లి శ్రీను, కంటేస్టీడ్ కార్పొరేటర్లు సురేశ్, వాజిద్ అలీఖాన్, అబ్దుల్ గఫ్ఫార్, అబ్దుల్లా ఆసిమ్, నాయకులు ఫసియుద్దీన్ ఖాలీద్, ఎంఏ సలీం, ఖమరొద్దీన్ షబ్బీర్, అబ్దుల్లా ఖాన్, మేరాజ్, ఇలియాజ్, అల్మాస్ హంజ, యునూస్ తదితరులు పాల్గొన్నారు.

జన్నారం మండలంలోని పలు గ్రామాలలో మంగళవారం రాత్రి 10:30 గంటల ప్రాంతంలో భారీ వర్షం కురిసింది. ఆకాశం పూర్తిగా మేఘావృతమైన అనంతరం, ఈదురు గాలులు, ఉరుములు, మెరుపుల మధ్య భారీ వర్షపాతం నమోదైంది. వర్షాకాలం ప్రారంభమై 15 రోజులు కావస్తున్నప్పటికీ, ఇప్పటివరకు సరైన వర్షాలు కురవకపోవడంతో ప్రజలు ఉక్కపోతతో ఇబ్బంది పడ్డారు. అలాగే, రైతులు వ్యవసాయ పనులను ప్రారంభించలేక తీవ్ర ఇబ్బందులకు గురయ్యారు. గత రెండు రోజులుగా కురుస్తున్న ఈ వర్షాల కారణంగా వాతావరణం చల్లబడింది.

కేంద్రం చేపట్టిన ఓటర్ జాబితా సవరణలో భాగంగా SIR కార్యక్రమం కింద ఓటర్ మ్యాపింగ్ ప్రక్రియ నేటితో ముగుస్తుంది. ఈ ప్రక్రియలో కవర్ కాని ఓటర్ల కోసం బూత్ లెవెల్ ఆఫీసర్లు (BLOs) రేపటి నుండి ఇంటింటికీ వెళ్లి ఎన్యూమరేషన్ ఫారం పంపిణీ చేయనున్నారు. ఇందుకోసం ఉమ్మడి కరీంనగర్ జిల్లా వ్యాప్తంగా అధికారులు అన్ని ఏర్పాట్లు పూర్తి చేశారు. ఈనెల 25 నుండి వచ్చే నెల జులై 24 వరకు BLOలు ఇంటింటికీ వెళ్లి ఎన్యూమరేషన్ ఫారం పంపిణీ కార్యక్రమం నిర్వహిస్తారు. ఇప్పటికే సంబంధిత రెవెన్యూ కార్యాలయాల నుండి BLOలు తమకు కావాల్సిన సామాగ్రి కిట్లను తీసుకెళ్ళారు. SIR పకడ్బందీగా అమలు చేసేందుకు జిల్లా కలెక్టరేట్‌తో పాటు మండల స్థాయిలో తహశీల్దార్ కార్యాలయంలో SIR హెల్ప్ డెస్క్‌ను ఏర్పాటు చేశారు.

బెజ్జంకి మండల కేంద్రంలోని శ్రీ లక్ష్మీనరసింహస్వామి ఆలయంలో గురువారం నిర్వహించనున్న గిరిప్రదక్షిణ కార్యక్రమానికి విస్తృత ఏర్పాట్లు పూర్తి చేశారు. ఉదయం 5:30 గంటలకు ప్రారంభమయ్యే ఈ ఆధ్యాత్మిక కార్యక్రమంలో మండలంలోని భక్తులతో పాటు కరీంనగర్, సిద్ధిపేట జిల్లాల నుంచి కూడా పెద్ద సంఖ్యలో భక్తులు పాల్గొంటారని ఆలయ ప్రధాన పూజారి శేషం మధుసూదనాచార్యులు తెలిపారు. భక్తులకు ఎలాంటి ఇబ్బందులు కలగకుండా అన్ని ఏర్పాట్లు పూర్తి చేసినట్లు బెజ్జంకి సర్పంచ్ బొల్లం శ్రీధర్ వెల్లడించారు. గిరిప్రదక్షిణలో పాల్గొని శ్రీ లక్ష్మీనరసింహస్వామివారి ఆశీస్సులు పొందాలని ఆయన భక్తులకు పిలుపునిచ్చారు. ఈ కార్యక్రమాన్ని భక్తిశ్రద్ధల మధ్య ఘనంగా నిర్వహించేందుకు ఆలయ కమిటీ ప్రత్యేక చర్యలు చేపట్టింది.

కరీంనగర్ సీపి గౌస్ ఆలం ఆదేశాల మేరకు డ్రగ్స్ అవగాహన కార్యక్రమం లో భాగంగా వీణవంక ప్రభుత్వ పాఠశాలలో మంగళవారం ఫ్రెండ్లీ క్రికెట్ మ్యాచ్ ను నిర్వహించారు. ఎస్సై ఆవుల తిరుపతి ఈ మ్యాచ్ ను ప్రారంభించగా, జమ్మికుంట రూరల్ సీఐ పులి వెంకట్ ముఖ్య అతిథిగా హాజరై పాల్గొన్నారు. ఈ క్రికెట్ మ్యాచ్ లో పోలీస్, ప్రెస్ యూత్ టీంలు ఉత్సాహంగా పాల్గొన్నాయి. నేటి సమాజంలో డ్రగ్స్ కు బానిసలై తమ విలువైన జీవితాలను నాశనం చేసుకుంటున్న యువతను చెడు అలవాట్లకు దూరంగా ఉంచడానికి, వారి ఆలోచనలను ఆటల వైపు మళ్లించే ఉద్దేశ్యంతో ఈ అవగాహన కార్యక్రమాన్ని ఏర్పాటు చేసినట్లు నిర్వాహకులు తెలిపారు. యువత విద్యార్థులు చదువుతో పాటు క్రీడలలో కూడా రాణించాలని, మత్తు పదార్థాలకు దూరంగా ఉండాలని సీఐ పులి వెంకట్ ఈ సందర్భంగా కోరారు. మాదక ద్రవ్యాల అక్రమ రవాణా, వినియోగం, విక్రయాలపై ఏదైనా సమాచారం ఉంటే వెంటనే పోలీసులకు తెలియజేయాలని ఆయన సూచించారు. ఈ సందర్భంగా రెడ్డిపల్లి, వీణవంక, నర్సింగాపూర్, వల్బపూర్, భేతిగల్ గ్రామాలకు చెందిన యువకులకు క్రికెట్ బ్యాట్లు, షటిల్స్, ఫుట్ బాల్ లను పంపిణీ చేశారు. ఈ కార్యక్రమంలో పోలీస్ సిబ్బంది, ప్రెస్ మిత్రులు మరియు యువత పెద్ద సంఖ్యలో పాల్గొన్నారు.

కామారెడ్డి జిల్లాలోని తాడ్వాయి మండలంలో ఎల్లారెడ్డి నియోజకవర్గ బీఆర్ఎస్ ఇన్‌చార్జి, మాజీ ఎమ్మెల్యే జాజాల సురేందర్ ఆధ్వర్యంలో వేలాది మంది రైతులు తలపెట్టిన ధర్నాను పోలీసులు అడ్డుకున్నారు. ఈ ధర్నా యూరియా రద్దు చేయాలని డిమాండ్‌తో నిర్వహించబడింది. డిమాండ్ చేయగానే పోలీసులు జాజాల సురేందర్‌ను వెంటనే అదుపులోకి తీసుకున్నారు. కాంగ్రెస్ సర్కార్ ఆదేశాల మేరకు మాజీ ఎమ్మెల్యే జాజాల సురేందర్‌ను బీర్కూర్ పోలీస్ స్టేషన్ పోలీసులు అక్రమంగా అరెస్ట్ చేసి అక్కడికి తరలించారు.

రాజన్న సిరిసిల్ల జిల్లా గంభీరావుపేట మండలంలో గుర్తుతెలియని దుండగులు రైతులకు భారీ నష్టం కలిగించారు. అర్ధరాత్రి వేళ గంభీరావుపేట మండల కేంద్రంలోని సింగసముద్రం పెద్ద కాలువ ఆయకట్టు పరిధిలో ఉన్న పంట పొలాల నుండి ఏకకాలంలో 11 బోరు మోటార్ల కేబుళ్లను దొంగిలించడంతో రైతులు తీవ్ర ఆందోళన చెందుతున్నారు. నారు పోసి సాగు పనులు ప్రారంభించిన కీలక సమయంలో ఈ కేబుళ్ల చోరీ జరగడంతో తమకు తీవ్ర నష్టం వాటిల్లిందని రైతులు ఆవేదన వ్యక్తం చేస్తున్నారు. ఘటనపై సమాచారం అందుకున్న ఎస్సై శ్రీకాంత్, పోలీసు సిబ్బందితో కలిసి వెంటనే ఘటనా స్థలాన్ని పరిశీలించారు. దొంగలు కేబుల్ వైర్లను లాక్కెళ్లిన ఆనవాళ్లను గుర్తించినట్లు పోలీసులు తెలిపారు. బాధిత రైతులు పోలీస్ స్టేషన్‌లో ఫిర్యాదు చేయగా, పోలీసులు కేసు నమోదు చేసి దర్యాప్తు చేపట్టినట్లు పేర్కొన్నారు.

కరీంనగర్ నగరంలోని కోతిరాంపూర్ నివాసి, ఆటో డ్రైవర్ భూక్యా లాలు కుమార్తె వెన్నెల వివాహం ఈ నెల 25న జరగనున్న సందర్భంగా, బీఆర్‌ఎస్ పార్టీ సీనియర్ నాయకులు నరదాసు వసంతరావు నేడు వారికి రూ. 5016 ఆర్థిక సహాయం అందించారు. గత నెలలో ఆటో యూనియన్ ప్రమాణ స్వీకారోత్సవం సందర్భంగా ఆటో కార్మికుల ఆడపిల్లల వివాహాలకు రూ. 5000 ఆర్థిక సహాయం అందిస్తానని వసంతరావు ప్రకటించిన విషయం తెలిసిందే. ఈ క్రమంలో, కోతిరాంపూర్ కు చెందిన భూక్యా సత్తమ్మ, లాలు దంపతుల కుమార్తె వివాహం నిశ్చయమైనట్లు తెలుసుకున్న వసంతరావు, వారి ఇంటికి వెళ్లి మేనమామగా ఈ మొత్తాన్ని అందించడం సంతోషంగా ఉందని తెలిపారు. కరీంనగర్ నగరానికి చెందిన ఏ ఆటో కార్మికుల కుమార్తె వివాహం చేసినా, తనను సంప్రదించి రూ. 5016 ఆర్థిక సహాయాన్ని పొందవచ్చని వసంతరావు ఈ సందర్భంగా విజ్ఞప్తి చేశారు. తెలంగాణ తొలి ముఖ్యమంత్రి కేసీఆర్ కల్యాణలక్ష్మి పథకాన్ని ఆదర్శంగా తీసుకొని ఈ కార్యక్రమాన్ని చేపడుతున్నట్లు ఆయన పేర్కొన్నారు. నరదాసు వసంతరావు చేసిన ఈ సహాయానికి కరీంనగర్ ఆటో కార్మిక సంక్షేమ సంఘం అధ్యక్షులు బొమ్మిడి శ్రీనివాస్ రెడ్డి హృదయపూర్వక కృతజ్ఞతలు తెలిపారు. ఈ కార్యక్రమంలో నరదాసు వసంతరావుతో పాటు గ్రంథాలయ సంస్థ మాజీ చైర్మన్ పొన్నం అనిల్ కుమార్ గౌడ్, ఆటో యూనియన్ అధ్యక్షులు బొమ్మిడి శ్రీనివాస్ రెడ్డి, బీఆర్‌ఎస్ పార్టీ సీనియర్ నాయకులు అఫ్రోజ్ ఖాన్, ఆరే రవి, ఆటో యూనియన్ ప్రధాన కార్యదర్శి బండారు సంపత్ పటేల్, ఉపాధ్యక్షులు ఇరవేని కుమార్, కుక్కట్ల సంపత్, కోశాధికారి చిట్టిమల్ల నాగభూషణం, ఈసీ మెంబర్స్ కూర్మచలం వేణుమాధవ్, బొంగోని శ్రీనివాస్ గౌడ్ తదితరులు పాల్గొన్నారు.

పెద్దపల్లి జిల్లా రామగుండంలోని మూతపడిన బి- పవర్ హౌస్ విద్యుత్ ప్లాంట్‌ను త్వరలో డిస్మెటల్ చేయనున్నారు. ఎనర్జీ స్పెషల్ చీఫ్ సెక్రటరీ నవీన్ మిట్టల్, జెన్కో ట్రాన్స్ కో సీఎండి హరీష్ రెడ్డి అధికారులతో కలిసి ఈ ప్లాంట్‌ను పరిశీలించారు. ఈ పర్యటనలో, వారు ప్రస్తుత విద్యుత్ ప్లాంట్ స్థితిగతులను గురించి స్థానిక అధికారులతో చర్చించారు. నూతనంగా నిర్మించబోయే విద్యుత్ ప్లాంట్ నిర్మాణం కోసం సంబంధించిన వనరులపైనా స్థానిక అధికారులతో ప్రస్తావించారు. త్వరలోనే డిస్మెటల్ పనులు చేపట్టడం జరుగుతుందని నవీన్ మిట్టల్ పేర్కొన్నారు. ఈ సందర్భంగా, ప్లాంట్‌కు సంబంధించిన అధికారులు ఆయనను ఆత్మీయంగా సన్మానించారు.