ନୂଆପଡ଼ା -୨୨/୪- ପରିବେଶ ସୁରକ୍ଷା ଓ ସାମାଜିକ ନ୍ୟାୟ ପ୍ରଦାନ ଦିଗରେ ନୂଆପଡ଼ା ଜିଲ୍ଲା ଆଇନ ସେବା ପ୍ରାଧିକରଣ ପକ୍ଷରୁ ଏକ ବଳିଷ୍ଠ ପଦକ୍ଷେପ ଗ୍ରହଣ କରାଯାଇଛି। ବିଶ୍ୱ ପୃଥିବୀ ଦିବସ ଅବସରରେ ଟାନ୍‌ୱାଟ ସ୍ଥିତ ପଥପ୍ରାନ୍ତ ସୁବିଧା କେନ୍ଦ୍ର ସଭାଗୃହରେ “ନାଲସା (ବନ୍ୟଜନ୍ତୁ-ମନୁଷ୍ୟ ସଂଘର୍ଷ ପୀଡ଼ିତଙ୍କୁ ଆଇନ ସହାୟତା) ଯୋଜନା, ୨୦୨୫” ସମ୍ବନ୍ଧୀୟ ଏକ ଜିଲ୍ଲାସ୍ତରୀୟ ସଚେତନତା ଶିବିର ଅନୁଷ୍ଠିତ ହୋଇଯାଇଛି। ପ୍ଲାଷ୍ଟିକ ମୁକ୍ତ ହେଉ ନୂଆପଡ଼ା ଏହି କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ଯୋଗଦେଇ ଜିଲ୍ଲାପାଳ ମଧୁସୂଦନ ଦାଶ ପରିବେଶର ସନ୍ତୁଳନ ରକ୍ଷା ଉପରେ ଗୁରୁତ୍ୱାରୋପ କରିଥିଲେ। ସେ ଜିଲ୍ଲାବାସୀଙ୍କୁ ନୂଆପଡ଼ାକୁ ପ୍ଲାଷ୍ଟିକମୁକ୍ତ କରିବା ସହ ଧରିତ୍ରୀର ସୁରକ୍ଷା ପାଇଁ ସଂକଳ୍ପବଦ୍ଧ ହେବାକୁ ଆହ୍ୱାନ ଦେଇଥିଲେ। ଜିଲ୍ଲା ଆଇନ ସେବା ପ୍ରାଧିକରଣର ସଚିବ ନବନୀତା ଦାଶ କାର୍ଯ୍ୟକ୍ରମରେ ଅଧ୍ୟକ୍ଷତା କରି ନାଲସାର ନୂତନ ଯୋଜନା ‘୨୦୨୫’ ସମ୍ପର୍କରେ ବିସ୍ତୃତ ଆଲୋକପାତ କରିଥିଲେ। ବନ୍ୟଜନ୍ତୁ ଓ ମନୁଷ୍ୟ ମଧ୍ୟରେ ହେଉଥିବା ସଂଘର୍ଷ ଯୋଗୁଁ କ୍ଷତିଗ୍ରସ୍ତ ହେଉଥିବା ପରିବାର କିଭଳି ସରକାରୀ ଓ ଆଇନଗତ ସହାୟତା ପାଇପାରିବେ, ସେ ନେଇ ସେ ଉପସ୍ଥିତ ସମସ୍ତଙ୍କୁ ଅବଗତ କରାଇଥିଲେ। ସଚେତନତା ପରେ ଅତିଥି ଓ ଗ୍ରାମବାସୀଙ୍କ ଦ୍ୱାରା ପ୍ଲାଷ୍ଟିକ ସଫେଇ କରାଯାଇ ପ୍ରାୟ ୨୨ କେଜି ବର୍ଜ୍ୟବସ୍ତୁ ସଂଗ୍ରହ କରାଯାଇଥିଲା। ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡର ଆଞ୍ଚଳିକ ଅଧିକାରୀ ବବିତା ସିଂ ପୃଥିବୀକୁ ସବୁଜ ଓ ସୁନ୍ଦର ରଖିବାକୁ ଜନସାଧାରଣଙ୍କୁ ପରାମର୍ଶ ଦେଇଥିଲେ। ଏହି ଶିବିରରେ ବନ ବିଭାଗର ଏ ସି ଏଫ ମହମ୍ମଦ ସାଲେହା, ନୂଆପଡ଼ା ନଗର ପାଳିକା କାର୍ଯ୍ୟନିର୍ବାହୀ ଅଧିକାରୀ ସନ୍ଦୀପ କୁମାର ଚନ୍ଦ୍ରକାର, ବନପାଳ ଲକ୍ଷ୍ମୀଧର ଘିଭେଲା, ପି.ଇ.ଓ ଭାନୂପଲି ପଦ୍ମାବତୀ, ସରପଞ୍ଚ ଜୟରାମ ସତନାମୀ, ଓକିଲ ଅନୁପ ଶର୍ମା ଏବଂ ଟାଟା ପାୱାରର ଆଇନ ଅଧିକାରୀ ପ୍ରଜ୍ଜ୍ଵଳ ପ୍ରକାଶ ପ୍ରମୁଖ ଉପସ୍ଥିତ ରହି ନିଜ ନିଜର ମତାମତ ରଖିଥିଲେ। ଏହି ସଚେତନତା ଶିବିରରେ ସ୍ଥାନୀୟ ଗ୍ରାମବାସୀ, ବନ ବିଭାଗ କର୍ମଚାରୀ ଏବଂ 'ଅଧିକାର ମିତ୍ର'ମାନେ ବହୁ ସଂଖ୍ୟାରେ ଯୋଗଦେଇ କାର୍ଯ୍ୟକ୍ରମକୁ ସଫଳ କରିଥିଲେ। ଧରିତ୍ରୀର ସୁରକ୍ଷା ସହ ବନ୍ୟପ୍ରାଣୀ ଓ ମନୁଷ୍ୟ ମଧ୍ୟରେ ସହାବସ୍ଥାନ କିଭଳି ସମ୍ଭବ, ସେ ନେଇ ଶିବିରରେ ଏକ ସକାରାତ୍ମକ ବାର୍ତ୍ତା ପ୍ରଦାନ କରାଯାଇଛି।

Surendra Tiwari

Life Insurance Agency ନୂଆପଡା, ନୂଆପଡ଼ା, ଓଡ଼ିଶା•

3 hrs ago