పల్లె పల్లెకు పొన్నం పల్లె పల్లెలో ప్రజా పాలన కార్యక్రమానికి మంచి స్పందన హుస్నాబాద్ నియోజకవర్గంలో రాష్ట్ర మంత్రి పొన్నం ప్రభాకర్ వినూత్న కార్యక్రమం చేపట్టి ప్రజలతో మమేకం అవుతున్నారు. పల్లెపల్లె పొన్నం, పల్లె పల్లెలో ప్రజా పాలన కార్యక్రమంతో ప్రజా సమస్యల తెలుసుకొని అభివృద్ధి సంక్షేమ కార్యక్రమాలను ప్రజలకు వివరిస్తున్నారు. రాష్ట్ర మంత్రి పొన్నం ప్రభాకర్ క్షేత్రస్థాయిలో మంత్రి పర్యటిస్తుండడంతో అధికారులు అప్రమత్తమై ప్రజాసమస్యలకు పరిష్కార మార్గం చూపుతున్నారు.

కరెంటు కోతలను నిరసిస్తూ పెద్దపల్లి జిల్లాలో రోడ్డెక్కిన రైతులు... మంథని–కాటారం రోడ్డుపై బైఠాయించి కరెంట్ కష్టాలు తీర్చాలని ఎస్ఐ కాళ్ళు మొక్కిన రైతులు వర్షాభావ పరిస్థితుల నేపథ్యంలో కరెంటు కోతలు రైతన్నలను ఉక్కిరిబిక్కిరి చేస్తున్నాయి. ఎండుతున్న పంట పొలాలను చూసి అన్నదాతలు ఆవేదనతో ఆందోళన చెందుతున్నారు. కరెంటు కోతలతో పెద్దపల్లి జిల్లా మంథని మండలం ఎక్లాస్‌పూర్ వద్ద రైతులు ఆందోళనకు దిగారు. అప్రకటిత కరెంటు కోతలతో పొట్ట దశలో ఉన్న పంట పొలాలు ఎండిపోతున్నాయని రోడ్డుపై బైఠాయించి ధర్నా రాస్తారోకో చేశారు. వర్షాభావంతో నీళ్లు లేక ఉన్న కొద్దిపాటి నీళ్లతో పంటలు పండిస్తామంటే వేళాపాలలేని కరెంటు కోతలతో పంటలు ఎండిపోతున్నాయని రైతన్నలు ఆవేదన వ్యక్తం చేశారు. కోతలు లేకుండా నిరంతరాయంగా 12 గంటలు నాణ్యమైన కరెంటు, కాలువలకు సాగునీరు అందించాలని డిమాండ్ చేశారు. రైతుల రాస్తారోకోతో మంథని–కాటారం ప్రధాన రహదారిపై వాహనాల రాకపోకలకు అంతరాయం ఏర్పడింది. వెంటనే పోలీసులు అక్కడికి చేరుకుని రైతులతో మాట్లాడారు. సమస్య తీవ్రతపై రైతులు ఆవేదన వ్యక్తం చేస్తు పోలీసులు కాళ్ళు పట్టుకుని కోతలు లేకుండా కరెంట్ ఇప్పించాలని వేడుకున్నారు. అధికారుల దృష్టికి తీసుకెళ్ళి సమస్య పరిష్కరించేలా కృషి చేస్తామని హామీ ఇవ్వడంతో అన్నదాతలు ఆందోళన విరమించారు.

బస్వాపూర్ బుధవారం అంగడిలో కనీస సౌకర్యాలు,వసతులు కల్పించాలి. సిద్దిపేట జిల్లా బస్వాపూర్ లో ప్రతి బుధవారం జరుగుతుంది. ఈ అంగడిలో ఎక్కువగా కూరగాయల అమ్మకాలు, జరుగుతాయి. నాగ సముద్రాల, పోరెడ్డిపల్లి, ఆరేపల్లి, చంద్ర నాయక్ తండ, జ్యోతి రామ్ తండా, ముత్తన్నపేట, తదితర గ్రామాలకు చెందిన మహిళలు అంగడిలో కూరగాయలు, ఇతర నిత్యవసరాలను కొంటుంటారు. 5 ఏళ్లుగా అంగడి నిర్వహిస్తున్న, గ్రామపంచాయతీ ఇందుకోసం టెండర్ నిర్వహించి, ఒక వ్యక్తి నిర్ణీత రుసుము నుంచి వసూలు చేస్తాడు. అంగడిని జాతీయ రహదారి ఇరువైపులా కూరగాయ దుకాణాలు పెడుతున్నారు. గ్రామపంచాయతీ అంగడికి వచ్చేవారికోసం సౌచాలయాలు, కల్పించలేదు. ప్రస్తుత పాలకవర్గం, గ్రామ కార్యదర్శి చొరవ చూపి, అంగడి లో వసతులు ప్రజలు కోరుతున్నారు

రైతులకు నాణ్యమైన 24 గంటల ఉచిత విద్యుత్ అందించి, ఎండిపోతున్న పంటలను కాపాడాలని టీఆర్‌ఎస్ జిల్లా అధ్యక్షుడు గుంజపడుగు హరిప్రసాద్ డిమాండ్ చేశారు. కరీంనగర్ జిల్లా చొప్పదండి నియోజకవర్గం రామడుగు మండలం దత్తూజిపేటలో విద్యుత్ సరఫరా సరిగా లేక ఎండిపోతున్న వరి పంటలను ఆయన పార్టీ నాయకులతో కలిసి పరిశీలించారు విద్యుత్ సరఫరాలో అంతరాయాల కారణంగా పంటలకు నీరందక రైతులు నష్టపోతున్నారని హరిప్రసాద్ అన్నారు. ప్రభుత్వం ఇచ్చిన 24 గంటల ఉచిత విద్యుత్ హామీని అమలు చేయాలని డిమాండ్ చేశారు. పంట నష్టపోయిన రైతులను గుర్తించి పరిహారం అందించాలని కోరారు. సమస్యలు పరిష్కరించకపోతే రైతుల పక్షాన పెద్ద ఎత్తున ఉద్యమిస్తామని హెచ్చరించారు. ఈ కార్యక్రమంలో చొప్పదండి నియోజకవర్గ నాయకులు మ్యాకల తిరుపతి, మ్యాక వినోద్, శ్రీరాముల రమేష్, చంటి శ్రీనివాస్, పుల్ల మల్లేశం, నగర పార్టీ అధ్యక్షురాలు రంగరవేణి లక్ష్మణ్ తదితరులు పాల్గొన్నారు.

ఓపెన్ కాస్ట్ వల్ల రామప్ప దేవాలయానికి ముప్పు. కాకతీయ హెరిటేజ్ వారి ఆందోళన... తెలంగాణ ప్రాంతంలోని ఉమ్మడి వరంగల్ జిల్లా ములుగు వెంకటాపూర్‌ లో ప్రతిపాదిత సింగరేణి ఓపెన్‌కాస్ట్ మైనింగ్ వల్ల యునెస్కో ప్రపంచ వారసత్వ ప్రదేశమైన రామప్ప దేవాలయం మరియు రామప్ప సరస్సు వారసత్వంపై ప్రభావం చూపుతుందనీ, పలువురు ఆందోళన వ్యక్తం చేస్తున్నారు. యునెస్కో ప్రపంచ వారసత్వ ప్రదేశంగా గుర్తింపు పొందిన కాకతీయ రుద్రేశ్వర (రామప్ప) దేవాలయం వెంకటాపూర్ గ్రామంలో సింగరేణి కాలరీస్ లిమిటెడ్ ప్రతిపాదించిన సుమారు 300 మీటర్ల లోతైన ఓపెన్‌కాస్ట్ గనుల తవ్వకాల వల్ల తీవ్ర ముప్పును ఎదుర్కొంటోంది. ఈ ప్రతిపాదిత గని ప్రాంతం రామప్ప సరస్సు మరియు రామప్ప దేవాలయానికి దిగువ ప్రవాహ దిశలో సుమారు 5 కిలోమీటర్ల దూరంలో ఉంది. ఈ ప్రాంతం భౌగోళికంగా నిర్మాణాత్మకంగా అస్థిరంగా ఉంది. ఈ ప్రాంతం మొత్తం అనేక ప్రధాన, ఉప-భ్రంశాలు (Faults), అలాగే పరస్పరం దాటుకుంటూ వెళ్లే జాయింట్లు (Joints) కలిగి ఉంది. ఇక్కడి భౌగోళిక రేఖల (Lineaments) సాధారణ దిశలు NNW-SSE, E-W మరియు NE-SW గా ఉన్నాయి. అదేవిధంగా, శిలా పొరల వాలు దిశ (Dip Direction) ఈశాన్యం వైపు ఉంది. అనేక జాయింట్లు మరియు పగుళ్లు (Fractures) కూడా ఈ ప్రాంతంలో ఉన్నాయి. రామప్ప సరస్సు నీటి మట్టంపై ప్రభావం రామప్ప సరస్సులోని నీటి మట్టం, శిలా పొరల మధ్య ఉన్న జాయింట్ల ద్వారా భూగర్భజలాలు ప్రవహించే విధానాన్ని ప్రభావితం చేయవచ్చు. ఈ ప్రభావం వెంకటాపూర్ గ్రామంలో ప్రతిపాదించిన 300 మీటర్ల లోతైన ఓపెన్‌కాస్ట్ గని వరకు ఉండే అవకాశం ఉందని GSI నివేదికలో పేర్కొనబడింది. (GSI నివేదిక, పేజీ 22 ఆధారంగా). రామప్ప సరస్సు సుమారు 3 TMC నీటి నిల్వ సామర్థ్యం కలిగి ఉంది. ఇది దాదాపు 30,000 ఎకరాల భూమికి సాగునీరు అందించగలదు. రెండు కొండలను కలుపుతూ నిర్మించిన మట్టి కట్ట (Earthen Bund) ద్వారా ఈ సరస్సు ఏర్పడింది. ఈ సరస్సుకు COT (Cut Off Trench) లేకపోవడం వల్ల, రామప్ప సరస్సుకు దిగువన ప్రతిపాదించిన 300 మీటర్ల లోతైన ఓపెన్‌కాస్ట్ గని కారణంగా ఏర్పడే అధిక హైడ్రాలిక్ గ్రేడియెంట్ వల్ల భూగర్భ జలాల లీకేజీ (Seepage) వేగవంతమయ్యే ప్రమాదం ఉంది. రామప్ప దేవాలయ పునాది నిర్మాణం రామప్ప దేవాలయానికి పునాదిగా Confined Sand Box Framework (పరిమిత ఇసుక పెట్టె పునాది నిర్మాణం) ఉపయోగించారు. రామప్ప సరస్సు మరియు దేవాలయం గుండా వెళ్లే పరస్పరం అనుసంధానమైన భౌగోళిక రేఖల వెంట ఏర్పడే Piping Phenomenon (నీటి ప్రవాహం వల్ల భూగర్భంలో సొరంగం/కాలువల మాదిరి మార్గాలు ఏర్పడే ప్రక్రియ) ఈ Sand Box Framework‌ను ప్రభావితం చేసే అవకాశం ఉందని GSI నివేదిక పేర్కొంది. (GSI నివేదిక, పేజీ 21 ఆధారంగా) పేలుళ్ల వల్ల రామప్ప దేవాలయంపై ప్రభావం నివేదికల ప్రకారం రామప్ప దేవాలయంపై పేలుళ్ల (Blasting) ప్రత్యక్ష ప్రభావం ప్రస్తుతానికి తక్కువగా కనిపిస్తున్నప్పటికీ, దీర్ఘకాలంలో పునరావృతమయ్యే మరియు చక్రీయ కంపనాలు (Periodic & Cyclical Vibrations) దేవాలయంపై ప్రభావం చూపే అవకాశం ఉంది. ముఖ్యంగా దీర్ఘకాలిక కంపనాల వల్ల నిర్మాణంలో Fatigue (బలహీనత/అలసట) ఏర్పడే ప్రమాదం ఉంది. ఇప్పటికే రామప్ప దేవాలయం తీవ్రమైన నిర్మాణ సమస్యలను ఎదుర్కొంటోంది. రంగ మండపంలోని భారీ నేల దూలాల్లో పగుళ్లు (Fracturing) మరియు అసమాన కూర్చివేత (Differential Settlement)కనిపిస్తున్నాయి. కాకతీయులు రామప్ప దేవాలయాన్ని Confined Sand Box Foundation పద్ధతిలో నిర్మించారు. ఇందులో ఇసుకను సరైన సాంద్రతతో (Optimal Density) బిగించి ఉంచారు. ఇసుక ఈ పరిమిత పెట్టెలో సురక్షితంగా ఉన్నంతకాలం, దేవాలయ పై నిర్మాణం యొక్క భారాన్ని ఈ పునాది సమర్థవంతంగా మోయగలదు. ఈ ప్రత్యేక నిర్మాణ పద్ధతి కారణంగానే ఈ స్మారక చిహ్నం 800 సంవత్సరాలకు పైగా నిలిచి ఉంది. అయితే, పేలుళ్ల వల్ల ఏర్పడే కంపనాలు తక్కువ స్థాయిలో ఉన్నప్పటికీ, దీర్ఘకాలంలో దేవాలయ నిర్మాణ స్థిరత్వంపై ప్రతికూల ప్రభావం చూపే అవకాశం ఉంది. ఓపెన్‌కాస్ట్ మైనింగ్ వల్ల తీవ్రమైన ప్రమాదాలు 300 మీటర్ల లోతు వరకు ప్రతిపాదించిన ఓపెన్‌కాస్ట్ గని కారణంగా రామప్ప సరస్సు ప్రాంతంలో ఏర్పడే హైడ్రాలిక్ గ్రాడ్యుయేంట్ అలాగే పేలుళ్ల వల్ల కలిగే కంపనాలు కలిసి రామప్ప దేవాలయ స్థిరత్వంపై తీవ్రమైన ప్రభావాన్ని చూపే అవకాశం ఉంది. ఓపెన్‌కాస్ట్ మైనింగ్ వల్ల: - జీవవైవిధ్యానికి (Biodiversity) తీవ్రమైన నష్టం కలగవచ్చు. - స్థానిక ప్రజల సామాజిక-ఆర్థిక పరిస్థితులపై ప్రభావం పడవచ్చు. - సామాజిక, సాంస్కృతిక మరియు మతపరమైన అనుబంధాలపై ప్రతికూల ప్రభావం ఏర్పడవచ్చు. - రామప్ప దేవాలయం మరియు రామప్ప సరస్సు పరిసరాల్లో పర్యావరణ క్షీణత ఏర్పడవచ్చు. రామప్ప సరస్సు కట్ట తెగిపోయే ప్రమాదం చివరగా, ఓపెన్‌కాస్ట్ మైనింగ్ కారణంగా ఏర్పడే Piping Phenomenon ద్వారా రామప్ప సరస్సు నుంచి భారీ మొత్తంలో నీరు భౌగోళిక రేఖలు (Lineaments) మరియు పగుళ్ల (Fractures) ద్వారా బయటకు వెళ్లే అవకాశం ఉంది. దీని ఫలితంగా రామప్ప సరస్సు కట్ట తెగిపోవడం → భారీగా నీరు విడుదల కావడం → పరిసర గ్రామాలు నీట మునగడం → ప్రాణ, ఆస్తి నష్టం → రామప్ప దేవాలయానికి తీవ్రమైన ప్రమాదం వంటి పరిణామాలు సంభవించే అవకాశం ఉందని ఈ నివేదిక హెచ్చరిస్తోంది. ఇది ఒక సునామీ వంటి విపత్తుకు దారితీసే ప్రమాదాన్ని కలిగి ఉండవచ్చు. పై సంక్షిప్త సాంకేతిక విశ్లేషణను దృష్టిలో ఉంచుకుని, సింగరేణి కాలరీస్ సంస్థ సాంకేతిక నిపుణుల విశ్లేషణలను, అలాగే ప్రజల సామాజిక-సాంస్కృతిక భావోద్వేగాలను గౌరవించాలి. అందువల్ల,రామప్ప దేవాలయం మరియు రామప్ప సరస్సు అనే గొప్ప ప్రపంచ వారసత్వ సంపదను రక్షించేందుకు ప్రతిపాదిత ఓపెన్‌కాస్ట్ మైనింగ్ ప్రాజెక్టును ఉపసంహరించుకోవాలి. అదేవిధంగా, ఓపెన్‌కాస్ట్ బొగ్గు గనుల ద్వారా భారీ మొత్తంలో ధూళి ఉత్పత్తి కావడం వల్ల వాయు కాలుష్యం మరియు పర్యావరణ అసమతుల్యత ఏర్పడే అవకాశం ఉంది.

మహాప్రభో..! మా భూమిని కాపాడండి, భూమి ఆక్రమణపై అధికారులకు ఫిర్యాదు.. న్యాయం చేయాలని కల్వచర్ల విష్ణు వేడుకోలు జనగామ : “మహాప్రభో..! మా భూమిని కాపాడండి.. మా గోడును పట్టించుకోండి” అంటూ స్టేషన్ ఘణపూర్ మండలం రాఘవాపూర్ గ్రామ శివారులోని తమ వ్యవసాయ భూమి వివాదంపై వడ్డేపల్లికి చెందిన కల్వచర్ల విష్ణు ఆవేదన వ్యక్తం చేశారు. తమ భూమిని పక్క భూమికి చెందిన మహిళా అక్రమంగా ఆక్రమించి నిర్మాణాలు చేపడుతున్నారని ఆయన ఆరోపించారు. ఈ మేరకు సంబంధిత అధికారులకు పలుమార్లు ఫిర్యాదు చేసినట్లు తెలిపారు. తాజాగా వరంగల్‌ పోలీస్ కమిషనర్ కు ఫిర్యాదు చేసినట్లు తెలిపారు. 2011లో భూమి కొనుగోలు చేశామని వెల్లడి విష్ణు తెలిపిన వివరాల ప్రకారం.. తమ తండ్రి కల్వచర్ల మొగిలి పేరుతో ఉన్న భూమిని 2011లో కొనుగోలు చేసి రిజిస్ట్రేషన్‌ చేసుకున్నట్లు తెలిపారు. సర్వే నంబర్లు 292/సి, 292/ఏ1, 293/ఏ, 293/బి, 292/ఏ/అ, 292/ఏ/ఆలలో మొత్తం 9 ఎకరాల 29 గుంటల భూమి తమకు ఉందని చెప్పారు. తమ వ్యవసాయ భూమికి వెళ్లేందుకు ఉన్న సుమారు 16 అడుగుల దారిని పక్క భూమికి చెందిన మమతా అనే మహిళ ఆక్రమించారని ఆరోపించారు. దీంతో తమ భూమికి రాకపోకలకు ఇబ్బందులు ఏర్పడుతున్నాయని వాపోయారు. మా భూమిలో తమ వ్యవసాయ భూమిలో రిసార్ట్ కోసం అక్రమంగా నిర్మాణాలు చేపడుతున్నారని వాటర్‌ ట్యాంక్‌తో పాటు ఇతర నిర్మాణాలు చేపడుతున్నారని విష్ణు ఆరోపించారు. వాటిని అడ్డుకునేందుకు ప్రయత్నించగా దుర్భాషలాడుతూ దాడికి యత్నించారని ఫిర్యాదు చేసినట్లు తెలిపారు. ఈ విషయమై పోలీస్‌స్టేషన్‌లో ఫిర్యాదు చేసినప్పటికీ తమకు న్యాయం జరగలేదని ఆరోపించారు. పైగా తమపైనే కేసులు నమోదు చేస్తున్నారని ఆవేదన వ్యక్తం చేశారు. అధికారులకు వరుసగా ఫిర్యాదులు భూమి వివాదంపై గతంలో జూలై 22, 2026న ఆర్డీవో, కలెక్టర్‌కు ఫిర్యాదు చేయడంతో పాటు ప్రజావాణిలోనూ పలుమార్లు ఫిర్యాదులు చేసినట్లు విష్ణు తెలిపారు. సుమారు మూడు నెలల క్రితం భూమి సర్వే కోసం దరఖాస్తు చేసుకున్నప్పటికీ సర్వేయర్‌ అందుబాటులో లేరని అధికారులు తెలిపినట్లు పేర్కొన్నారు. భూమి హద్దులు, దారి హక్కు, నిర్మాణాలపై అధికారికంగా సర్వే నిర్వహించి వాస్తవాలను నిర్ధారించాలని, తమకు న్యాయం చేయాలని విష్ణు సంబంధిత అధికారులను కోరారు. తమ భూమి విషయంలో తక్షణమే చర్యలు తీసుకుని ఆక్రమణలు ఉంటే తొలగించాలని విజ్ఞప్తి చేశారు.

సిరిసిల్ల: ఎన్నికల కమిషన్ నిష్పక్షపాతంగా వ్యవహరించాలి చాడ వెంకటరెడ్డి. ఎన్నికల కమిషన్ ప్రధాని మోదీ కనుసన్నల్లో పనిచేస్తోందని సిపిఐ జాతీయ నాయకులు చాడ వెంకటరెడ్డి ఆరోపించారు. ప్రజాస్వామ్యంలో ఎన్నికలు కీలకమని, ఎన్నికల కమిషన్ నిష్పక్షపాతంగా, న్యాయబద్ధంగా వ్యవహరించాలని డిమాండ్ చేశారు. ఓటర్ల జాబితా తయారీలోనే అవకతవకలు జరుగుతున్నాయని ఆరోపిస్తూ, పశ్చిమ బెంగాల్‌లో ఓట్ల తొలగింపుపై స్పష్టత ఇవ్వాలని కోరారు. ఈవీఎంలు, ఓటర్ల జాబితా అంశాల్లో పారదర్శకత అవసరమన్నారు. ఎన్నికల కమిషనర్ జ్ఞానేశ్ కుమార్ రాజీనామా చేయాలని డిమాండ్ చేశారు. ప్రతి అర్హుడికి ఓటు హక్కు కల్పించడం ప్రభుత్వ బాధ్యత అని, స్వతంత్ర రాజ్యాంగ వ్యవస్థలు స్వతంత్రంగా పనిచేసినప్పుడే ప్రజాస్వామ్యం బలోపేతమవుతుందని పేర్కొన్నారు.

ఎన్నికలు ప్రజాస్వామ్యానికి ఆయువుపట్టని, ఎన్నికల కమిషన్‌ నిష్పక్షపాతంగా, రాజ్యాంగబద్ధంగా వ్యవహరించాలని సీపీఐ జాతీయ నాయకులు చాడ వెంకటరెడ్డి అన్నారు. ఎన్నికలు ప్రజాస్వామ్యానికి ఆయువుపట్టని, ఎన్నికల కమిషన్‌ నిష్పక్షపాతంగా, రాజ్యాంగబద్ధంగా వ్యవహరించాలని సీపీఐ జాతీయ నాయకులు చాడ వెంకటరెడ్డి అన్నారు. బుధవారం సిరిసిల్లలోని సీపీఐ కార్యాలయంలో నిర్వహించిన మీడియా సమావేశంలో ఆయన మాట్లాడారు. కేసీఆర్‌ ఫామ్‌హౌస్‌కు సంబంధించిన 425 ఎకరాల భూముల వివరాలపై ముఖ్యమంత్రి స్పష్టత ఇవ్వాలని డిమాండ్‌ చేశారు. రాష్ట్రవ్యాప్తంగా భూ రికార్డుల్లో అవకతవకలు ఉన్నాయన్న ఆరోపణల నేపథ్యంలో సర్వే నంబర్ల వారీగా సమగ్ర సర్వే నిర్వహించి, గ్రామసభల ద్వారా భూముల హద్దులను గుర్తించాలని సూచించారు. ప్రభుత్వం ఏర్పాటు చేస్తున్న కమిటీలు భూ సమస్యలను పరిష్కరించడంలో ఎందుకు విఫలమవుతున్నాయని ప్రశ్నించారు. ముస్తాబాద్‌ మండలంలో భూ సమస్యపై వచ్చిన వినతిని ప్రభుత్వం తక్షణమే పరిష్కరించాలని, లేనిపక్షంలో బాధితుడికి న్యాయం జరిగే వరకు పోరాడతామని హెచ్చరించారు. ఎన్నికల కమిషన్‌ కేంద్రంలోని మోదీ ప్రభుత్వం కనుసన్నల్లో పనిచేస్తోందని చాడ వెంకటరెడ్డి ఆరోపించారు. పశ్చిమ బెంగాల్‌లో ఓటర్ల జాబితా నుంచి పేర్లు తొలగించడం ప్రజాస్వామ్యంపై ప్రభావం చూపిందని విమర్శించారు. ఓటర్ల నమోదు ప్రక్రియ పారదర్శకంగా ఉండాలని, ప్రతి అర్హుడికి ఓటు హక్కు కల్పించడం ప్రభుత్వ బాధ్యతని పేర్కొన్నారు. ఎన్నికల కమిషనర్‌ జ్ఞానేశ్‌ కుమార్‌ రాజీనామా చేయాలని డిమాండ్‌ చేశారు. రాజ్యాంగబద్ధ సంస్థలు స్వతంత్రంగా పనిచేసినప్పుడే ప్రజాస్వామ్య వ్యవస్థ బలోపేతమవుతుందని అన్నారు. భూ సమస్యల పరిష్కారానికి ముఖ్యమంత్రి, మంత్రులు ప్రత్యేక చొరవ తీసుకోవాలని కోరారు. సమావేశంలో సిపిఐ నాయకులు పంతం రవి, గుంటి వేణు, కడారి రాములు, మంద అనిల్ తదితరులు పాల్గొన్నారు.

పల్లె పల్లెకు పొన్నం పల్లె పల్లెలో ప్రజా పాలన కార్యక్రమానికి మంచి స్పందన హుస్నాబాద్ నియోజకవర్గంలో రాష్ట్ర మంత్రి పొన్నం ప్రభాకర్ వినూత్న కార్యక్రమం చేపట్టి ప్రజలతో మమేకం అవుతున్నారు. పల్లెపల్లె పొన్నం, పల్లె పల్లెలో ప్రజా పాలన కార్యక్రమంతో ప్రజా సమస్యల తెలుసుకొని అభివృద్ధి సంక్షేమ కార్యక్రమాలను ప్రజలకు వివరిస్తున్నారు. రాష్ట్ర మంత్రి పొన్నం ప్రభాకర్ క్షేత్రస్థాయిలో మంత్రి పర్యటిస్తుండడంతో అధికారులు అప్రమత్తమై ప్రజాసమస్యలకు పరిష్కార మార్గం చూపుతున్నారు.