आंदोलनात सहभागी झालेल्या विद्यार्थ्यांना खोट्या ड्रग्ज प्रकरणात अडकवण्याची धमकी देणाऱ्या एका मुंबई पोलिसाचा व्हिडिओ सोशल मीडियावर प्रचंड व्हायरल होत आहे. आंदोलनात पुन्हा दिसल्यास "५० ग्रॅम पावडर टाकून देईन", अशा शब्दांत या पोलिसाने आंदोलक विद्यार्थ्यांना थेट धमकी दिली असल्याचे व्हिडिओमध्ये दिसत आहे. पोलीस अधिकाऱ्याने वापरलेल्या या 'पावडर' या शब्दाचा नेमका अर्थ काय, असा गंभीर सवाल आता उपस्थित केला जात आहे. पोलिसांच्या अशा प्रकारच्या थेट धमकीमुळे तीव्र संताप व्यक्त केला जात असून, या व्हायरल व्हिडिओवरून सोशल मीडियावर मोठी खळबळ उडाली आहे.

देशातील लाखो विद्यार्थ्यांचे भविष्य अंधारात ढकलणाऱ्या नीट परीक्षा पेपरफुटी प्रकरणाचा तीव्र निषेध करण्यासाठी आणि दिल्लीत आंदोलनाला बसलेले प्रख्यात शिक्षणतज्ज्ञ सोनम वांगचुक यांच्या लढ्याला जाहीर पाठिंबा देण्यासाठी आज कुंभार पिंपळगाव शहर कडकडीत बंद पाळण्यात आले. ग्रामस्थांनी आणि स्थानिक व्यापारी संघटनांनी पुकारलेल्या या 'गाव बंद'च्या हाकेला संपूर्ण गावातून १०० टक्के उत्स्फूर्त प्रतिसाद मिळाला. सकाळपासूनच मुख्य बाजारपेठ, सर्व लहान-मोठी दुकाने, हॉटेल्स, चहाच्या टपऱ्या आणि व्यापाऱ्यांनी स्वतःहून व्यवहार बंद ठेवले. वैद्यकीय सेवा आणि औषधांची दुकाने यांसारख्या अत्यावश्यक सेवा वगळता गावात सर्वत्र कडकडीत बंद पाळण्यात आला असून नेहमी गजबजणाऱ्या मुख्य चौकांमध्ये आज पूर्णपणे शुकशुकाट पाहायला मिळाला. पेपरफुटीच्या तीव्र निषेधार्थ आणि सोनम वांगचुक यांच्या समर्थनार्थ कुंभार पिंपळगावची संपूर्ण बाजारपेठ पूर्णपणे बंद राहिली.

दिल्लीतील जंतर-मंतर येथे उपोषणाला बसलेल्या विद्यार्थ्यांवर, महिलांवर आणि चिमुकल्या मुलांवर झालेला लाठीहल्ला अत्यंत अमानुष व संविधानविरोधी असल्याचा आरोप करत जालन्यातील सामाजिक कार्यकर्ते साद बीन मुबारक व त्यांच्या सहकाऱ्यांनी जिल्हाधिकाऱ्यांना निवेदन सादर केले आहे. गुरुवारी, 23 जुलै रोजी दुपारी सादर केलेल्या या निवेदनाद्वारे पीडितांना तात्काळ न्याय मिळवून देण्याची मागणी करण्यात आली आहे. निवेदनात दिलेल्या माहितीनुसार, जंतर-मंतर येथे गेल्या काही दिवसांपासून विद्यार्थ्यांचे उपोषण सुरू होते. हे उपोषण मोडून काढण्यासाठी पोलीस प्रशासनाकडून बळाचा वापर करत उपोषणकर्त्यांवर अमानुषपणे लाठीहल्ला करण्यात आला तसेच अश्रूधुराच्या नळकांड्या फोडण्यात आल्या. आंदोलकांच्या रास्त मागण्यांवर तोडगा काढण्याऐवजी त्यांना मारहाण करण्यात आली, ही खेदाची बाब आहे. एकीकडे शासन 'बेटी बचाव, बेटी पढाओ'चा नारा देते आणि दुसरीकडे आंदोलन करणाऱ्या महिला व विद्यार्थ्यांना पोलिसांच्या उपस्थितीत मारहाण केली जाते, ज्यावेळी पोलिसांनी केवळ प्रेक्षकाची भूमिका घेतली असा गंभीर आरोपही करण्यात आला आहे. या घटनेमुळे देशभरात संतापाची लाट पसरली असून प्रशासनाकडे काही प्रमुख मागण्या करण्यात आल्या आहेत. जंतर-मंतर येथील पीडित महिला, मुले व उपोषणकर्त्यांना शासनाने त्वरित न्याय द्यावा, लोकशाही मार्गाने आंदोलन करणाऱ्यांवर होणारे अत्याचार थांबवावेत आणि देशातील वातावरण पूर्ववत करून कायदा व सुव्यवस्था सुरळीत करावी, अशी मागणी करण्यात आली आहे. या निवेदनावर साद बीन मुबारक, मोईज अन्सारी, मोहसीन अफजल खान व अन्य सामाजिक कार्यकर्त्यांच्या स्वाक्षऱ्या आहेत.

दिल्लीतील जंतर-मंतर येथे आपल्या मागण्यांसाठी आंदोलन करणाऱ्या निर्दोष विद्यार्थ्यांवर पोलिसांनी केलेल्या अमानुष लाठीहल्ल्याच्या आणि राहुल गांधींवरील अटकेच्या कारवाईच्या निषेधार्थ आज जालन्यात काँग्रेस पक्षाच्या वतीने तीव्र निदर्शने करण्यात आली. शहरातील महात्मा गांधी चौक येथे काँग्रेसचे पदाधिकारी आणि कार्यकर्ते मोठ्या संख्येने एकत्र आले असून त्यांनी या कारवाईविरोधात जोरदार धरणे आंदोलन छेडले आहे.

मंठ्यामध्ये वंचित बहुजन आघाडीने पुकारलेल्या महाराष्ट्र बंदला उत्स्फूर्त प्रतिसाद मिळाला आहे. जालना जिल्ह्यातील मंठ्यात या बंद आंदोलनाला उत्स्फूर्त पाठिंबा मिळाल्याचे दिसून आले आहे.

बदनापूर शहरात पोटाची खळगी भरण्यासाठी आणि आपल्या कुटुंबाचा उदरनिर्वाह करण्यासाठी रस्त्यांवर व चौकांमध्ये दोरीवरची कसरत करणाऱ्या अवघ्या ५ ते ७ वर्षांच्या चिमुकलीचे दृश्य अतिशय वेदनादायक आणि वास्तववादी ठरत आहे. ही लहान मुलगी भीक न मागता आपली कला लोकांसमोर सादर करून चार पैसे कमवण्याचा प्रामाणिक प्रयत्न करत आहे. रस्त्यावरून ये-जा करणारे अनेक नागरिक या चिमुकलीच्या कलेचे कौतुक करून तिला काही पैसे देतात आणि मिळणाऱ्या या अत्यल्प पैशांवरच तिच्या संपूर्ण कुटुंबाचा उदरनिर्वाह चालतो. भीक न मागता स्वतःच्या कलेच्या जोरावर चार पैसे मिळवण्याची ही धडपड असली, तरी गरिबीच्या गर्तेत अशा प्रकारे बालपण हरवून जाणे ही एक मोठी सामाजिक शोकांतिका आहे.

परिवाराच्या साथीने यशाचे शिखर गाठत ज्योती पवार यांची मुंबई पोलीस दलात निवड झाली आहे. या यशाबद्दल स्वामी विवेकानंद स्पर्धा परीक्षा प्रबोधिनीच्या वतीने त्यांचा सत्कार करण्यात आला आहे. स्पर्धा परीक्षा क्षेत्रात या प्रबोधिनीने आतापर्यंत ६५० हून अधिक विद्यार्थ्यांना यशाची दिशा दाखवली आहे.

पालघर जिल्ह्यात मुसळधार पावसाने जोरदार कहर केला असून अनेक मार्गांवर पाणी साचल्यामुळे अनेक रस्ते वाहतुकीसाठी बंद करण्यात आले आहेत. या परिस्थितीचा आणि अचानक उद्भवणाऱ्या आपत्कालीन प्रसंगांचा सामना करण्यासाठी NDRF ची पथके तैनात करण्यात आली असून प्रशासनाच्या विविध यंत्रणांना सज्ज ठेवण्यात आले आहे. पावसाचा जोर पाहता जिल्हा प्रशासन पूर्णपणे सतर्क झाले असून जिल्हाधिकारी डॉ. इंदू राणी जाखड यांच्या मार्गदर्शनाखाली जिल्ह्यातील सर्व धरणे, नद्या, पूरप्रवण क्षेत्रे तसेच लघुपाटबंधारे प्रकल्पांवर चोवीस तास बारकाईने लक्ष ठेवले जात आहे.

आंदोलनात सहभागी झालेल्या विद्यार्थ्यांना खोट्या ड्रग्ज प्रकरणात अडकवण्याची धमकी देणाऱ्या एका मुंबई पोलिसाचा व्हिडिओ सोशल मीडियावर प्रचंड व्हायरल होत आहे. आंदोलनात पुन्हा दिसल्यास "५० ग्रॅम पावडर टाकून देईन", अशा शब्दांत या पोलिसाने आंदोलक विद्यार्थ्यांना थेट धमकी दिली असल्याचे व्हिडिओमध्ये दिसत आहे. पोलीस अधिकाऱ्याने वापरलेल्या या 'पावडर' या शब्दाचा नेमका अर्थ काय, असा गंभीर सवाल आता उपस्थित केला जात आहे. पोलिसांच्या अशा प्रकारच्या थेट धमकीमुळे तीव्र संताप व्यक्त केला जात असून, या व्हायरल व्हिडिओवरून सोशल मीडियावर मोठी खळबळ उडाली आहे.