मनसेचे तालुका अध्यक्ष मल्लिकार्जुन पाटील यांनी दिलेल्या माहितीनुसार, अक्कलकोट तालुक्यातील शेतकऱ्यांना पीक विमा मिळावा या मागणीसाठी अक्कलकोटच्या तहसीलदारांना एक निवेदन सादर करण्यात आले आहे. हे निवेदन देताना मनसेचे अन्य पदाधिकारीही उपस्थित होते.

आज, मंगळवार, २६ मे २०२६ रोजी महाराष्ट्राचे माजी मुख्यमंत्री आणि माजी केंद्रीय मंत्री लोकनेते आदरणीय विलासरावजी देशमुख साहेब यांच्या ८१ व्या जयंतीनिमित्त बाभळगाव येथील विलासबाग येथे सार्वजनिक आदरांजली कार्यक्रमाचे आयोजन करण्यात आले होते. देशमुख कुटुंबाच्या वतीने आयोजित या कार्यक्रमात विलासरावजी देशमुख साहेब यांच्या पवित्र स्मृतींना विनम्र अभिवादन करण्यात आले आणि त्यांना उजाळा देण्यात आला. या प्रसंगी सुप्रसिद्ध शास्त्रीय संगीत गायक हेमंत पेंडसे यांच्या भाव स्वरांजली कार्यक्रमाचेही आयोजन करण्यात आले होते. लोकनेते आदरणीय विलासराव देशमुख साहेब हे महाराष्ट्राच्या राजकारणातील एक अत्यंत लोकप्रिय, सुसंस्कृत आणि प्रसन्न व्यक्तिमत्त्व म्हणून ओळखले जात होते. त्यांचा राजकीय प्रवास बाभळगावचे सरपंच, जिल्हा परिषद सदस्य ते राज्याचे दोनदा मुख्यमंत्री आणि केंद्रीय मंत्री असा संघर्षमय व यशस्वी राहिला आहे. आपल्या अमोघ वक्तृत्वाने आणि हजरजवाबीपणाने त्यांनी जनतेच्या मनावर अधिराज्य गाजवले. त्यांचे कार्य केवळ राजकारणापुरते मर्यादित नव्हते, तर उद्योग, सहकार, क्रीडा, साहित्य, संगीत आणि कला अशा विविध क्षेत्रांतही त्यांचा सहज वावर होता. ग्रामीण महाराष्ट्राच्या विकासाचे मोठे श्रेय त्यांना दिले जाते. विशेषतः लातूरच्या विकासाचा ध्यास घेतलेल्या विलासरावजी देशमुख साहेब यांनी मांजरा नदीवर बॅरेजेसची साखळी निर्माण करून शेतकऱ्यांना बारमाही पाणी मिळवून दिले. आपल्या दिलदार आणि संवेदनशील स्वभावाने विरोधकांनाही आपलेसे करणारे आदरणीय विलासरावजी देशमुख साहेब आजही खऱ्या अर्थाने सर्वसामान्यांचे नेते आणि युवकांचे प्रेरणास्थान म्हणून ओळखले जातात.

राज्यात खळबळ उडवून देणाऱ्या दहा वर्षीय चिमुकलीच्या हत्या प्रकरणात पोलिसांनी आरोपीला अटक केल्यानंतर एका नव्या वादाला तोंड फुटले आहे. या गंभीर आणि संवेदनशील प्रकरणात, पत्रकार परिषदेदरम्यान काही अधिकारी हसत-खिदळत बोलताना दिसल्याचा व्हिडिओ मोठ्या प्रमाणात सोशल मीडियावर व्हायरल झाला असून त्यामुळे नागरिकांमध्ये तीव्र संताप व्यक्त होत आहे. या प्रकरणामुळे आधीच जनतेत संतापाची लाट असताना, पोलिस अधिकाऱ्यांचे कथित हलकेफुलके वर्तन पाहून अनेकांनी प्रशासनावर प्रश्नचिन्ह उपस्थित केले आहे. सोशल मीडियावरून 'एका निष्पाप मुलीचा जीव गेला आणि अधिकारी मात्र हसत आहेत का?' असा सवाल विचारला जात आहे. व्हायरल व्हिडिओमध्ये अधिकारी पत्रकार परिषद सुरू असताना परस्परांशी हसत बोलताना दिसत असल्याचा दावा केला जात आहे. हा व्हिडिओ समोर आल्यानंतर फेसबुक, इंस्टाग्राम आणि एक्स (ट्विटर) वर नागरिकांनी तीव्र प्रतिक्रिया दिल्या आहेत. या घटनेची चौकशी करून संबंधितांवर कारवाई करण्याची मागणी अनेक सामाजिक संघटना व बालहक्क कार्यकर्त्यांनी केली आहे. दरम्यान, पोलिस विभागाकडून या व्हिडिओबाबत अद्याप अधिकृत स्पष्टीकरण आलेले नसले तरी, प्रकरणाची गंभीरता लक्षात घेता वरिष्ठ स्तरावरून माहिती घेतली जात असल्याची चर्चा आहे. दहा वर्षीय मुलीच्या निर्घृण हत्येने समाजमन आधीच हेलावले असताना, आता या व्हायरल व्हिडिओमुळे नागरिकांचा रोष आणखी वाढला असून संवेदनशील प्रकरणांमध्ये जबाबदारीने वागण्याची गरज पुन्हा अधोरेखित झाली आहे.

परळी शहरातील श्री पद्मावती शिक्षण संस्था संचालित संस्कार प्राथमिक शाळेच्या १९९९-२००० या शैक्षणिक वर्षातील सातवी उत्तीर्ण माजी विद्यार्थ्यांचा भव्य स्नेहमेळावा पद्मावती विभागामध्ये उत्साहात आणि भावनिक वातावरणात नुकताच पार पडला. आजवर दहावी-बारावीच्या माजी विद्यार्थ्यांचे स्नेहमेळावे मोठ्या उत्साहात साजरे झाल्याचे पाहायला मिळाले असले तरी, संस्कार प्राथमिक शाळेच्या सातवीच्या माजी विद्यार्थ्यांनी तब्बल २५ वर्षांनंतर एकत्र येऊन स्नेहमेळाव्याचे आयोजन करत एक आगळावेगळा उपक्रम राबवला. या सोहळ्यात अनेक वर्षांनंतर भेटलेल्या मित्रांनी शालेय जीवनातील सुवर्णक्षणांना उजाळा दिला, ज्यामुळे बालपणीच्या आठवणी पुन्हा जिवंत झाल्या. कार्यक्रमस्थळी दाखल होताच जुन्या मित्रांच्या चेहऱ्यावरील आनंद, शिक्षकांविषयी व्यक्त झालेला आदर आणि बालपणीच्या आठवणींमध्ये हरवून गेलेले भावनिक क्षण उपस्थितांच्या मनाला भिडले. यावेळी शाळेत पुन्हा एकदा १९९९-२००० चा काळ अवतरल्याचे दृश्य पाहायला मिळाले. या विशेष स्नेहमेळाव्यासाठी संस्थेचे अध्यक्ष श्री कैलास तांदळे अध्यक्षस्थानी होते, तर सचिव श्री दीपक तांदळे, सहसचिव श्रीमती प्रेमिलाताई तांदळे मॅडम, मुख्याध्यापिका सौ. माधुरीताई तांदळे, श्री कराड सर, श्री पाचांगे सर, श्री अनकाडे सर, पर्यवेक्षक श्री इंगळे सर, श्रीम.रणखांब मॅडम, श्री गित्ते सर, श्रीम. साळुंके मॅडम आणि श्री दैठणेकर सर यांची प्रमुख उपस्थिती लाभली. यावेळी दिपक ढाकणे, राज रत्नपारखे, अमोल धुमाळ, गणेश टाक, राजेश देशमाने, शैलेश चांडक, सागर टाक, अमोल राजूरकर, धीरज काळे, विपुल बियाणी, वैभव घोडके, श्रीकांत बाहेती, श्रीकांत शर्मा, धनराज स्वामी, प्रताप सोनवणे, भगवान कराळे, उदय पेंटेवार, विशाल आडेपवार, दिलीप खोशे, अशोक कराळे, मनोज मोरे, अमजद पठाण, संभाजी काटे, उमेश फुलझळके, आनंद रेळेकर, दिपाली आघाव, गौतमी भद्रे, पूजा चांडक, स्वाती, मनीषा, श्वेता दीक्षित, गीता काबरा, दिपाली दहातोंडे, पल्लवी हुलगुंडे, वर्षा अदोडे, चंद्रमणी वाघमारे, गंगाधर रायभोळे, श्रीकांत काकडे, अमोल मुळे, पवन भोयटे आदी माजी विद्यार्थी मोठ्या संख्येने उपस्थित होते. मान्यवरांनी विद्यार्थ्यांच्या यशस्वी वाटचालीचे कौतुक करत “संस्कार प्राथमिक शाळा ही केवळ शिक्षण देणारी शाळा नसून विद्यार्थ्यांच्या जीवनाला योग्य दिशा देणारे संस्कार मंदिर आहे,” असे गौरवोद्गार काढले. १९९९-२००० मध्ये सातवी उत्तीर्ण झालेले हे विद्यार्थी आज डॉक्टर, शिक्षक, अभियंते, उद्योजक, शासकीय अधिकारी, सामाजिक कार्यकर्ते अशा विविध प्रतिष्ठित पदांवर कार्यरत असून आपापल्या क्षेत्रात यशाचे शिखर गाठले आहे. त्यांच्या बोलण्यातून शाळेप्रती असलेले प्रेम आणि गुरुजनांविषयीची कृतज्ञता प्रकर्षाने जाणवत होती. कार्यक्रमादरम्यान जुन्या आठवणींना उजाळा देताना वातावरण अनेकदा भावुक झाले. वर्गातील गंमती-जमती, शाळेतील सहली, सांस्कृतिक कार्यक्रम, मधल्या सुट्टीतील धम्माल, शिक्षकांचा धाक आणि मित्रांसोबतचे अविस्मरणीय क्षण आठवून अनेकांच्या डोळ्यांत आनंदाश्रू तरळले. “मोठी पदे मिळाली, आयुष्य पुढे गेले; पण शाळेतील मैत्री आणि शिक्षकांचे संस्कार हेच आमच्या आयुष्याचे खरे भांडवल आहे,” अशा भावना अनेक माजी विद्यार्थ्यांनी व्यक्त केल्या. या स्नेहमेळाव्यात माजी विद्यार्थ्यांनी आपल्या गुरुजनांचा सत्कार करून कृतज्ञता व्यक्त केली. जुन्या आठवणींना उजाळा देणारे फोटो, संवाद, हास्यकल्लोळ आणि मैत्रीचा उत्स्फूर्त आनंद यामुळे संपूर्ण परिसर भारला होता. अनेक विद्यार्थ्यांनी शाळेच्या विकासासाठी भविष्यात विविध सामाजिक व शैक्षणिक उपक्रम राबविण्याचा संकल्पही यावेळी व्यक्त केला. “एक शाळा... एक संस्कार... आणि आयुष्यभर साथ देणारी मैत्री,” अशी भावना व्यक्त करत सर्व माजी विद्यार्थ्यांनी पुन्हा भेटण्याचा निर्धार केला. शाळेने आणि माजी विद्यार्थ्यांनी या कार्यक्रमाच्या यशस्वी आयोजनासाठी विशेष परिश्रम घेतले. शेवटी, सर्वांनी एकत्र येऊन ‘संस्कार’च्या आठवणी कायम जपण्याचा संकल्प करत भावपूर्ण वातावरणात कार्यक्रमाचा समारोप केला.

पाटोदा येथील तहसील कार्यालयात हिंदू आणि मुस्लिम समाज बांधवांच्या वतीने गायीला राष्ट्रीय पशू म्हणून घोषित करण्याची मागणी करत एक निवेदन सादर करण्यात आले. या निवेदनानुसार, गाय ही हिंदू धर्मात श्रद्धेचे स्थान मानली जाते, तसेच दोन समाजांमधील सलोखा, देशातील एकोपा, सुख आणि समृद्धी कायम राहावी या हेतूने हे पाऊल उचलण्यात आले आहे. मुस्लिम धर्मगुरु मौलाना अर्शद मदनी साहेबांनी घेतलेल्या निर्णयानंतर आणि त्यांच्या आदेशानुसार, भारतात प्रत्येक ठिकाणी अशा प्रकारचे निवेदन सादर केले जात आहे. याच मालिकेचा भाग म्हणून पाटोदा येथील सर्व समाजसेवक, मौलाना, सामान्य नागरिक, पत्रकार आणि राजकीय पुढारी यांच्या उपस्थितीत तहसीलदारांमार्फत हे निवेदन महाराष्ट्र राज्याच्या माननीय मुख्यमंत्र्यांपर्यंत पोहोचवण्यात आले आहे. निवेदनात, सरकारने या मागणीवर त्वरित निर्णय घ्यावा अशी विनंती करण्यात आली आहे.

महाराष्ट्र सरकारच्या प्रस्तावित “महाराष्ट्र देवस्थान इनाम निर्मूलन अधिनियम २०२६” या कायद्याविरोधात मंगळवारी (दि. २६) बीड शहरात सकल वारकरी समाज व मंदिर संरक्षण समितीने जोरदार आंदोलन छेडले. वारकरी, भाविक, श्रद्धाळू आणि हिंदू धर्मप्रेमींनी छत्रपती शिवाजी महाराज चौक ते जिल्हाधिकारी कार्यालय अशी भव्य वारकरी दिंडी काढत, हा प्रस्तावित कायदा तात्काळ रद्द करण्याची प्रमुख मागणी केली. या दिंडीनंतर बीड जिल्हाधिकारी यांच्यामार्फत मुख्यमंत्री देवेंद्र फडणवीस यांना निवेदन सादर करण्यात आले. आंदोलनकर्त्यांनी आरोप केला की, हा प्रस्तावित कायदा हिंदू धर्मातील पुरातन मंदिरे, देवस्थान, मठ, गड आणि संस्थानांच्या जमिनी संपुष्टात आणण्याचा सरकारचा डाव आहे. त्यांनी स्पष्ट केले की, देवस्थान इनाम जमिनी केवळ मालमत्ता नसून त्या धार्मिक, सामाजिक व ऐतिहासिक व्यवस्थेचा आधारस्तंभ आहेत. देवस्थाने ही केवळ पूजा-अर्चा करण्याची ठिकाणे नसून धर्मप्रसार, संस्कृती संवर्धन, समाजजागृती आणि सामाजिक एकात्मतेची केंद्रे आहेत. प्रस्तावित अधिनियमामुळे देवस्थानांच्या मालमत्तेवर अतिक्रमण, अनाधिकृत हस्तांतरण आणि व्यापारीकरण वाढण्याची शक्यता असून भविष्यात प्रभावशाली पुढारी व धनदांडग्यांच्या ताब्यात या जमिनी जाण्याचा धोका असल्याचेही यावेळी नमूद करण्यात आले. टाळ-मृदुंगाच्या गजरात आणि विठ्ठल नामाच्या जयघोषात निघालेल्या या दिंडीने शहराचे वातावरण भक्तिमय झाले होते. आंदोलनकर्त्यांनी “देवस्थान जमीन वाचवा” आणि “हिंदू धर्मावरील अन्याय बंद करा” अशा घोषणा देत शासनाचा निषेध नोंदवला. या वेळी सादर केलेल्या निवेदनात “महाराष्ट्र देवस्थान इनाम निर्मूलन अधिनियम २०२६” हा प्रस्तावित कायदा तात्काळ मागे घेण्याची, पुरातन मंदिरे, देवस्थान, मठ, गड आणि संस्थानांच्या जमिनींचे संरक्षण करण्याची, देवस्थान जमिनींचे डिजिटल अभिलेखीकरण करण्याची, तसेच इनामी आणि देवस्थान जमिनींवरील अतिक्रमण हटवण्यासाठी विशेष मोहीम राबवण्याची मागणी करण्यात आली. याव्यतिरिक्त, देवस्थानांच्या पारदर्शक व्यवस्थापनासाठी आणि उत्पन्नवाढीसाठी स्वतंत्र धोरण राबवावे आणि देवस्थान जमिनींसंदर्भात कोणताही निर्णय घेण्यापूर्वी भाविक, विश्वस्त आणि पुजारी यांची सुनावणी घ्यावी, अशा मागण्याही आंदोलनकर्त्यांनी शासनाकडे केल्या. या वारकरी दिंडीत महंत ह.भ.प. लक्ष्मण महाराज मेंगडे (बंकट स्वामी संस्थान, नेकनूर आळंदी पंढरपुरी), महंत ह.भ.प. संभाजी महाराज (उत्तराधिकारी, श्रीक्षेत्र नारायणगड), महंत ह.भ.प. तुकाराम महाराज भारती (बेलेश्वर संस्थान, बेलगाव), रामायणाचार्य ह.भ.प. नाना महाराज कदम, ह.भ.प. सुरेश महाराज जाधव, ह.भ.प. त्रिंबक महाराज मातकर, ह.भ.प. रामेश्वर महाराज जाधव, ह.भ.प. श्रीकृष्ण महाराज उबाळे, ह.भ.प. गोकुळ महाराज उबाळे यांसारख्या अनेक महंतांची लक्षणीय उपस्थिती होती. त्यांच्यासह पांडुरंग महाराज शिंदे, लोखंडे महाराज, ओमतात्या खवतड, सिताराम महाराज, गजानन जोशी, मुकुंदराव खडकीकर, रविंद्र कुलकर्णी, शरद कुलकर्णी, प्रणव राखे, स्वामी महाराज हातळे, श्रीकृष्ण खोसे, महेश मुळीक, जनार्दन महाराज ढेरे, विष्णु घोलप, सुंदर नांगरे, रामहरी घोडके, लग्न महाराज गाडे, अक्षय महाराज मस्के, शरद घोलप, सामाजिक कार्यकर्ते गणेश ढवळे, रामनाथ खोड, शेख युनुस, बाजीराव ढाकणे, राजेंद्र आमटे, संजय शिंदे यांच्यासह मोठ्या संख्येने वारकरी, हिंदू प्रेमी, श्रद्धाळू आणि भाविक सहभागी झाले होते.

देव, धर्म आणि देवस्थानांच्या पवित्र जमिनींचे रक्षण करण्यासाठी वारकऱ्यांनी दिंडी यात्रा आंदोलन केले. देवस्थान इनाम जमिनी वाचवण्यासाठी आणि प्रस्तावित देवस्थान इनाम निर्मूलन अधिनियम २०२६ कायद्याला विरोध दर्शवण्यासाठी हे आंदोलन जिल्हा कचेरीवर धडकले.

लातूर शहरातून धाराशिवकडे शेतीसाठी बैल खरेदी करून पायी जाणाऱ्या एका शेतकऱ्यावर थेट पोलीस गुन्हा दाखल करण्यात आला आहे. दारू पिऊन धिंगाणा घालणाऱ्या गोरक्षक आणि बजरंग दलाच्या कार्यकर्त्यांनी या शेतकऱ्याला नाहक त्रास दिल्याचा आरोप आहे. ही घटना मंगळवार, दिनांक 26 मे 2026 रोजी घडली. धाराशिव जिल्ह्यातील अरजखेडा येथील भीमराव सूर्यवंशी आणि त्यांचा मुलगा महेश सूर्यवंशी यांनी पाटोदा येथील बाजारातून शेतीसाठी बैलजोडी खरेदी केली होती. त्यांच्याकडे ग्रामपंचायतीचा अधिकृत जनावर खरेदी-विक्रीचा दाखला हातात असतानाही, खोपेगाव परिसरात बजरंग दलाच्या काही पदाधिकाऱ्यांनी त्यांना अडवून “बैल कुठे नेताय?” “कशासाठी नेताय?” अशी चौकशी करत बराच वेळ रोखून धरले. शेतकऱ्यांनी सर्व कागदपत्रे दाखवूनही त्यांना सोडण्यात आले नसल्याचे सांगितले जात आहे. यानंतर राजीव गांधी चौकात पुन्हा त्यांना अडवण्यात आले. वाढता तणाव पाहून महेश सूर्यवंशी यांनी पोलीस हेल्पलाईनला फोन केला, त्यानंतर विवेकानंद पोलीस स्टेशनचे कर्मचारी घटनास्थळी दाखल झाले. मात्र, कारवाई अडवणाऱ्यांवर न होता, पोलिसांनी बैलजोडी घेऊन जाणाऱ्या शेतकऱ्यांवरच गुन्हा दाखल केला आणि जनावरे गोरक्षणात पाठवण्यात आल्याचा आरोप करण्यात येत आहे. या घटनेमुळे “शेतीसाठी बैल खरेदी करणाऱ्या शेतकऱ्यांनाच गुन्हेगार ठरवलं जात असेल, तर सामान्य शेतकऱ्यांनी जगायचं कसं?” असा संतप्त सवाल उपस्थित होत आहे. दरम्यान, शिवसेनेचे कुलदीप सूर्यवंशी यांनी या प्रकरणावर प्रतिक्रिया दिली की, जर शेतकऱ्यांवर नाहक गोरक्षकांकडून त्रास होत असेल, तर तो सहन केला जाणार नाही आणि या प्रकरणावर आवाज उठवला जाईल.

लोकनेते गोपीनाथराव मुंडे साहेब यांच्या पुण्यतिथीच्या अनुषंगाने नामदार पंकजाताई मुंडे यांनी आवाहन केले आहे.

पेट्रोल, डिझेल आणि घरगुती गॅसच्या वाढत्या महागाई, बेरोजगारी तसेच NEET पेपरफुटी प्रकरणाविरोधात बीडमध्ये जन आक्रोश आंदोलन करण्यात आले. ऑल इंडिया पॅंथर सेनेच्या वतीने जिल्हाधिकारी कार्यालयासमोर आयोजित या आंदोलनाचे नेतृत्व महाराष्ट्र प्रवक्ता तथा बीड जिल्हाध्यक्ष नितीन सोनवणे यांनी केले. प्रशासनाने नागरिकांच्या समस्यांवर तात्काळ लक्ष द्यावे, अन्यथा आंदोलन अधिक तीव्र करण्याचा इशारा नितीन सोनवणे यांनी दिला आहे. या आंदोलनादरम्यान पेट्रोल, डिझेल व घरगुती गॅसच्या वाढत्या दरांवर आणि तुटवड्यावर तीव्र निषेध व्यक्त करण्यात आला. यासोबतच NEET पेपरफुटी प्रकरण, सुशिक्षित बेरोजगारी, शहरातील अतिक्रमणे, रस्ते विकासाचे प्रलंबित प्रश्न, मोकाट कुत्र्यांची समस्या, खाजगी कोचिंग क्लासेसचे बाजारीकरण, सोशल मीडियावरील निर्बंध आणि प्रशासनाकडे प्रलंबित असलेल्या विविध मागण्यांकडे प्रशासनाचे लक्ष वेधण्यात आले. आंदोलनकर्त्यांनी शिक्षणमंत्री धर्मेंद्र प्रधान यांच्या राजीनाम्याची मागणी केली. तसेच, बीड नगरपरिषद हद्दीतील अतिक्रमणे तात्काळ हटवावीत, छत्रपती शिवाजी महाराज चौक ते बार्शी नाका रोड चौक या मार्गावरील रस्त्याचे काम त्वरित पूर्ण करावे आणि नगरपरिषदेच्या निवृत्त कर्मचाऱ्यांना सातवा वेतन आयोग लागू करावा, अशा प्रमुख मागण्या करण्यात आल्या. याव्यतिरिक्त, NEET पेपरफुटी प्रकरणातील सूत्रधारांवर कठोर कारवाईची मागणी करण्यात आली. बीड जिल्ह्यातील शिक्षणाचे बाजारीकरण करणाऱ्या खासगी क्लासेसचे ऑडिट करून आवश्यक ती कार्यवाही करावी, अशी मागणीही करण्यात आली. तलवाडा पोलीस स्टेशनमध्ये दाखल असलेल्या POSCO आणि SC-ST कायद्यांतर्गत गुन्ह्यातील आरोपीस तात्काळ अटक करण्याची मागणीही आंदोलनकर्त्यांनी केली. या आंदोलनात युवा जिल्हाध्यक्ष सुंदर वाघमारे, जिल्हा सरचिटणीस प्रतीक वाघमारे, जिल्हा प्रवक्ता निलेश वाघमारे, शहराध्यक्ष राजेश वडमारे, शहर संघटक आनंद डोंगरे, युवा शहराध्यक्ष विकास शिंदे, भीमराव कुठे, कोंडीबा लांडगे, शशिकला लांडगे, वैष्णवी लांडगे, प्रेमकुमार कांबळे यांच्यासह मोठ्या संख्येने कार्यकर्ते सहभागी झाले होते.