Post by Rohit kirtanbhai

પંચમહાલ જિલ્લાના ગોધરા તાલુકાના રતનપુર ગામમાં આવેલા નદી વાળું ફડિયું છેલ્લાં 30 વર્ષથી વિકાસથી વંચિત હોવાનો ગ્રામજનોએ આક્રોશ વ્યક્ત કર્યો છે. ગ્રામજનોના જણાવ્યા અનુસાર, આ ફડિયું આવાસ યોજના, રોડ રસ્તા અને અન્ય કોઈ સુવિધાના અભાવે ન્યાયથી વંચિત રહ્યું છે, જેને કારણે ગ્રામજનોમાં ભારે અસંતોષ પ્રવર્તી રહ્યો છે. આ સ્થિતિ માટે ગ્રામજનોએ તલાટી શ્રી અને સરપંચ શ્રી પર કોઈ વિકાસના કામો ન કરાયા હોવાનો સીધો આરોપ લગાવ્યો છે અને તેઓ આ બાબતે ઉગ્ર વિરોધ કરી રહ્યા છે. ગ્રામજનોએ ઉચ્ચ અધિકારી શ્રી કલેક્ટર સાહેબને નમ્ર વિનંતી કરી છે કે રતનપુર ગામમાં તાત્કાલિક ધોરણે પગલાં લેવામાં આવે અને વિકાસના કામો શરૂ કરવામાં આવે. ગ્રામજનોએ અંતમાં ચેતવણીભર્યો સૂર વ્યક્ત કરતાં જણાવ્યું છે કે, જો આ બાબતે તાત્કાલિક પગલાં લેવામાં નહીં આવે, તો પછી 'તેરી બિ ચુપ ઓર મેરી બી ચુપ, પબ્લીક જાય તેલ લેને' જેવી પરિસ્થિતિ સર્જાશે.

આજે વહેલી સવારે હાલોલ-વડોદરા હાઈવે પર કોટંબી સ્ટેડિયમ નજીક એક ગોઝારો અકસ્માત સર્જાયો હતો. હાલોલથી વડોદરા તરફ આવી રહેલી એક લકઝરી બસ પૂર ઝડપે રસ્તા પર ઊભેલી ટ્રકની પાછળ ધડાકાભેર ઘૂસી જતાં આ ગંભીર ઘટના બની હતી. અકસ્માત સમયે બસમાં સવાર તમામ મુસાફરો ઘોર નિંદ્રામાં હતા. આ અકસ્માત એટલો ભયાનક હતો કે લકઝરી બસનું આખું કેબિન ટ્રકમાં ઘૂસી ગયું હતું. અકસ્માત સર્જાતાની સાથે જ આસપાસના સ્થાનિક લોકો તાત્કાલિક ઘટના સ્થળે દોડી આવ્યા હતા. હાલમાં, રેસ્ક્યુ કામગીરી માટે NDRFની મદદ લેવામાં આવી રહી છે. કટર મશીનની મદદથી બસનું પતરું કાપીને મૃતદેહો અને ઇજાગ્રસ્તોને બહાર કાઢવામાં આવી રહ્યા છે. અત્યાર સુધીમાં, આ અકસ્માતમાં 26 જેટલા ઇજાગ્રસ્ત મુસાફરોને વડોદરાની સયાજી હોસ્પિટલમાં ખસેડવામાં આવ્યા છે. આ ગંભીર અકસ્માતમાં પાંચથી વધુ લોકોના મોત નીપજ્યા હોવાનું જાણવા મળી રહ્યું છે, જોકે તંત્ર દ્વારા મૃત્યુઆંક અંગે હજી સુધી કોઈ સત્તાવાર જાણકારી આપવામાં આવી નથી.

મહીસાગર જિલ્લાના વિરપુર તાલુકાના કોયલા ગામની એક મહિલાએ કુટુંબ નિયોજનના બે ઓપરેશન નિષ્ફળ જતાં સરકાર તરફથી સહાયની માંગ સાથે વિરપુરના તાલુકા હેલ્થ ઓફિસરને રજુઆત કરી છે. આ પ્રસંગે માનવ અધિકાર સુરક્ષા ગુજરાત પ્રદેશ મહિલા સેલના ઉપપ્રમુખ રેખાબેન રોહિત હાજર રહ્યા હતા. મહિલાના જણાવ્યા અનુસાર, વર્ષ 2020માં કરાયેલું પહેલું કુટુંબ નિયોજન ઓપરેશન નિષ્ફળ ગયું હતું. ત્યારબાદ, 15 ઓક્ટોબર 2024ના રોજ તેમને ફરી ઓપરેશન કરાવવું પડ્યું હતું, પરંતુ બીજી વખતનું આ ઓપરેશન પણ નિષ્ફળ ગયું અને 26 ઓક્ટોબર 2025ના રોજ એક દિકરીનો જન્મ થયો હતો. મહિલાનો આક્ષેપ છે કે ઓપરેશન નિષ્ફળ જવાના કિસ્સામાં સરકાર દ્વારા મળતી સહાય માટેના જરૂરી દસ્તાવેજો જમા કરાવ્યા હોવા છતાં, આજદિન સુધી તેમને કોઈ સહાય મળી નથી. અતિપછાત નાયક સમાજની આ મહિલાએ પોતાની કફોડી આર્થિક સ્થિતિનો ઉલ્લેખ કરતાં જણાવ્યું કે તેઓને દિકરીના ભરણપોષણ, શિક્ષણ અને ભવિષ્યના ખર્ચની ભારે ચિંતા સતાવી રહી છે. વધુમાં, બે વખત ઓપરેશન કરાવવાને કારણે તેમના સ્વાસ્થ્ય પર પણ નકારાત્મક અસર થઈ હોવાનું તેમણે જણાવ્યું છે.

વડોદરાના આજવા રોડ પરથી નશાકારક કફ સીરપ (કોડીન) વેચતા સતનામસિંહ સીકલીગર નામના શખસને SOGએ ઝડપી પાડ્યો છે. પોલીસે દરોડો પાડી ₹96,141 નો મુદ્દામાલ જપ્ત કર્યો હતો. આ કેસમાં ફરાર સહ-આરોપી હિરવ પંડ્યાને પોલીસે વોન્ટેડ જાહેર કરી તેની શોધખોળ અને વધુ તપાસ હાથ ધરી છે.

વડોદરાના કોટંબી નજીક એક ગમખ્વાર અકસ્માત થયો હતો, જેમાં એક લક્ઝરી બસ ઊભેલી ટ્રકમાં ઘૂસી ગઈ હતી. આ ભયાનક દુર્ઘટનામાં ડ્રાઇવર સહિત કુલ સાત લોકોનાં મોત થયા હતા, જ્યારે અન્ય છવીસ લોકો ઘાયલ થયા હતા.

આજ રોજ હાલોલના સાર્વજનિક બગીચા ખાતે એક ભવ્ય 'જન કલ્યાણ શિબિર'નું આયોજન કરવામાં આવ્યું હતું. આ શિબિર પ્રધાનમંત્રી નરેન્દ્રભાઈ મોદીના નેતૃત્વવાળી કેન્દ્ર સરકારના "૧૨ વર્ષ - વિશ્વાસના, વિકાસના, જનકલ્યાણના" પૂર્ણ થવાના અવસરે હાલોલ નગરપાલિકા દ્વારા યોજવામાં આવી હતી. આ કાર્યક્રમમાં મોટી સંખ્યામાં સ્થાનિક નાગરિકો અને લાભાર્થીઓ ઉપસ્થિત રહ્યા હતા. કાર્યક્રમમાં મુખ્ય અતિથિ વિશેષ તરીકે હાલોલના ધારાસભ્ય જયદ્રથસિંહ પરમાર હાજર રહ્યા હતા. તેમણે પ્રધાનમંત્રીના કાર્યકાળના સફળ ૧૨ વર્ષની સિદ્ધિઓની સરાહના કરી હતી અને સરકાર દ્વારા ચલાવવામાં આવતી વિવિધ જનકલ્યાણકારી યોજનાઓ વિશે લાભાર્થીઓને વિસ્તૃત માહિતી આપી હતી. આ અવસરે મંચ પર હાલોલ નગરપાલિકા પ્રમુખ નિશાબેન દેસાઈ, કારોબારી અધ્યક્ષ પ્રમોદસિંહ રાઠોડ, હાલોલ મામલતદાર સંદીપ રૈયાણી, નગરપાલિકા ચીફ ઓફિસર ગૌરાંગ પટેલ, હાલોલ શહેર ભાજપા પ્રમુખ હરીશભાઈ ભરવાડ સહિત અન્ય ભાજપાના વરિષ્ઠ અગ્રણીઓ અને વહીવટી તંત્રના અધિકારીઓ પણ ઉપસ્થિત રહ્યા હતા. આ તમામ અગ્રણીઓ અને અધિકારીઓએ જનલક્ષી કાર્યો અને યોજનાઓને સમાજના છેવાડાના માનવી સુધી પહોંચાડવા માટેની કટિબદ્ધતા વ્યક્ત કરી હતી. આ શિબિરનો મુખ્ય ઉદ્દેશ્ય સામાન્ય જનતાને સરકારી યોજનાઓથી માહિતગાર કરી તેમને સીધો લાભ અપાવવાનો હતો. સમગ્ર કાર્યક્રમમાં હાલોલના નાગરિકો અને વિવિધ યોજનાઓના લાભાર્થીઓએ ખૂબ જ ઉત્સાહપૂર્વક ભાગ લીધો હતો.

વડોદરા નજીક કોટબી ગામ પાસે વહેલી સવારે એક ગંભીર માર્ગ અકસ્માત સર્જાયો હતો. બાંસવાડાથી સુરત તરફ જઈ રહેલી એક લકઝરી બસ રોડ પર ઊભેલી ટ્રક સાથે ધડાકાભેર ભટકાઈ હતી. આ ભયાનક દુર્ઘટનામાં અંદાજિત 10 લોકોના મોત થયા હોવાનું પ્રાથમિક અહેવાલો દર્શાવે છે.