पाणीटंचाईचे संकट गडद; नगर परिषद कार्यालयात पाणीटंचाईच्या पार्श्वभूमीवर उपजिल्हाधिकाऱ्यांच्या उपस्थितीत महत्त्वपूर्ण बैठक* *पाणीटंचाईचे संकट गडद; नगर परिषद कार्यालयात पाणीटंचाईच्या पार्श्वभूमीवर उपजिल्हाधिकाऱ्यांच्या उपस्थितीत महत्त्वपूर्ण बैठक* *“पाण्याचा अपव्यय टाळा, उपलब्ध पाणी साठा जपून वापरा- उपजिल्हाधिकारी अरविंद लाटकर* *पाणीटंचाईच्या पार्श्वभूमीवर “वेस्टेज पाणी नाल्यात सोडू नका; पुनर्वापर करा- नगरपरिषदेचे मुख्याधिकारी त्र्यंबक कांबळे* *पाण्याचा प्रत्येक थेंब जपा!पाण्यासाठी काटकसरीचा वापर करा- उपमुख्यधिकारी संतोष रोडे* परळी वैजनाथ (प्रतिनिधी) :- “परळी शहरासह तालुक्यात अत्यल्प पावसामुळे दुष्काळसदृश परिस्थिती निर्माण झाली आहे. वाण धरणात सध्या १९.७२ टक्के पाणीसाठा शिल्लक असल्याने उपलब्ध पाण्याचा काटकसरीने वापर करणे अत्यंत गरजेचे आहे. जार व्यावसायिक, वॉशिंग सेंटर चालक आणि नागरिकांनी पाण्याचा अपव्यय टाळावा. वेस्टेज पाणी नाल्यात न सोडता त्याचा पुनर्वापर किंवा पुनर्भरण करावे. तीव्र पाणीटंचाईच्या काळात खासगी बोअरचे अधिग्रहण करण्याची आवश्यकता भासू शकते. त्यामुळे नागरिकांनी प्रशासनाला सहकार्य करून पाण्याचा प्रत्येक थेंब जपावा असे आवाहन अरविंद लाटकर, उपजिल्हाधिकारी, परळी वैजनाथ यांनी केले आहे. “वेस्टेज पाणी नाल्यात सोडू नका; पुनर्वापर करा” असे आवाहन नगरपरिषदेचे मुख्याधिकारी त्र्यंबक कांबळे यांनी केले आहे.पाण्याचा प्रत्येक थेंब जपा!पाण्यासाठी काटकसरीचा वापर करा असे नागरिकांना उपमुख्यधिकारी संतोष रोडे यांनी आवाहन केले. पाणी वापर व अपव्ययावर नियंत्रणासाठी जार व्यावसायिक, वॉशिंग सेंटर चालकांची उपजिल्हाधिकारी यांच्या उपस्थितीत बैठक पार पडली. परळी नगर परिषद सभागृहात शहरातील जार विक्री करणारे व्यावसायिक तसेच चारचाकी व दुचाकी वॉशिंग सेंटर चालकांची पाणीटंचाईच्या अनुषंगाने आढावा बैठक उपजिल्हाधिकारी अरविंद लाटकर यांच्या उपस्थितीत पार पडली. यावेळी नगरपरिषदेचे मुख्याधिकारी त्र्यंबक कांबळे, नगर परिषद उपमुख्याधिकारी संतोष रोडे, पाणीपुरवठा प्रमुख किरण उपाडे तसेच जार प्लांट व्यावसायिक उपस्थित होते. अत्यल्प पावसामुळे परळी वैजनाथ तालुक्यात दुष्काळसदृश परिस्थिती निर्माण झाली असून, आगामी काळातील पिण्याच्या पाण्याची गरज लक्षात घेता उपलब्ध पाण्याचा काटकसरीने वापर करणे आणि पाण्याचा अपव्यय रोखणे अत्यावश्यक आहे,असे प्रतिपादन उपजिल्हाधिकारी अरविंद लाटकर यांनी केले. शहरातील जार व्यावसायिक, वॉशिंग सेंटर चालक तसेच संबंधित व्यावसायिकांनी पाण्याचा वापर व वेस्टेजवर नियंत्रण ठेवावे, असे आवाहनही त्यांनी केले. परळी शहराला सध्या नागापूर येथील वाण मध्यम प्रकल्पातून पाणीपुरवठा होत असून, धरणात केवळ १९.७२ टक्के उपयुक्त पाणीसाठा शिल्लक आहे. त्यामुळे भविष्यातील पाणीटंचाईची तीव्रता लक्षात घेऊन पाण्याचा प्रत्येक थेंब जपणे गरजेचे असल्याचे उपजिल्हाधिकारी लाटकर यांनी स्पष्ट केले. नगर परिषदेकडे सार्वजनिक वापरासाठी सुमारे अंदाजे १००० ते ११०० बोअर असून, या जलस्रोतांवर नियंत्रण ठेवून आवश्यक तेवढेच पाणी वापरावे. बोअरमधून अतिरिक्त पाणी उपसा होत असल्यास त्यावर तात्काळ उपाययोजना करावी . अन्यथा अतिरिक्त पाणी नाल्यांमधून वाहून जाऊन त्याचा अपव्यय होऊ शकतो, असे त्यांनी सांगितले. शहरात जार व्यावसायिकांचे १०० हून अधिक खासगी बोअर असल्याचे सांगून, व्यावसायिकांनी आपल्या व्यवसायाच्या ठिकाणी पाण्याची टाकी ठेवावी. वेस्टेज होणारे पाणी नाल्यात सोडण्याऐवजी त्याचा पुनर्वापर करावा किंवा नागरिकांना सांडपाणी वापरासाठी उपलब्ध करून द्यावे. शक्य असल्यास अशा पाण्याचे पुनर्भरण करावे, अशा सूचना बैठकीत देण्यात आल्या. असेही उपजिल्हाधिकारी लाटकर यांनी स्पष्ट केले. सार्वजनिक बोअरचे पाणी अथवा नगर परिषद पाणीपुरवठ्याची पाइपलाइन थेट घरात नेऊन अनधिकृत वापर होत असल्यास कारवाई करण्याच्या सूचना देण्यात आल्या. तसेच नळाचे पाणी घरासमोर पाइपद्वारे सोडणे, वाहन धुण्यासाठी मोठ्या प्रमाणात पाणी वापरणे टाळावे, अन्यथा संबंधितांवर कारवाई केली जाईल, असा इशाराही देण्यात आला. पाणीटंचाईची तीव्रता वाढल्यास गरजेनुसार खासगी बोअर अधिग्रहित करण्याची कार्यवाही करण्यात येणार असल्याचे प्रशासनाने स्पष्ट केले. खासगी बोअरधारकांकडे पाणी उपलब्ध असल्यास त्यांनी आजूबाजूच्या कुटुंबांना पाणी देऊन सहकार्य करावे, तसेच पाणीटंचाईच्या काळात शक्य ती मदत करावी, असे आवाहन उपजिल्हाधिकारी अरविंद लाटकर यांनी केले. परळी तालुक्यात दुष्काळाची तीव्रता वाढत असून प्रमुख जलसाठ्यांमधील पाणी झपाट्याने कमी होत आहे. वाण मध्यम प्रकल्पात १९.७२ टक्के पाणीसाठा शिल्लक असल्याने जलसाठ्याच्या संरक्षणासाठी प्रशासनाने २४ तास पहारा तैनात केला आहे. अनधिकृत पाणी उपसा रोखणे आणि उपलब्ध पाण्याला पिण्यासाठी सर्वोच्च प्राधान्य देण्याचे नियोजन करण्यात आले आहे. नागरिकांनीही पाण्याचा काटकसरीने वापर करावा, नळांना तोट्या लावाव्यात, पाण्याचा अपव्यय टाळावा तसेच कुठेही पाणीगळती किंवा तांत्रिक अडचण आढळल्यास तातडीने नगर परिषदेला कळवावे, असे आवाहन प्रशासनाने केले आहे. बैठकीचे सूत्रसंचालन व आभार उपमुख्याधिकारी संतोष रोडे यांनी केले.

M. p. gitte

परळी, बीड, महाराष्ट्र•

19 hrs ago