গোলাঘাট জিলাৰ দৰিয়া চাহ বাগিচাত শ্ৰমিকসকলৰ বিভিন্ন সমস্যা সমাধানৰ দাবীত এক ঘণ্টীয়া ধৰ্ণা কাৰ্যসূচী অনুষ্ঠিত কৰা হয়। এই কাৰ্যসূচীৰ জৰিয়তে চাহ বাগিচাৰ শ্ৰমিক ৰাইজৰ দীৰ্ঘদিনীয়া সমস্যাসমূহৰ শীঘ্ৰে সমাধানৰ দাবী জনোৱা হৈছিল। এই ধৰ্ণা কাৰ্যসূচী অসম চাহ জনজাতি ছাত্ৰ সন্থা, দৰিয়া উপশাখা আৰু দৰিয়া প্ৰাথমিক গোটৰ উদ্যোগত অনুষ্ঠিত হৈছিল। লগতে, দৰিয়া বাগিচা সংঘ আৰু সমূহ দৰিয়াবাসী ৰাইজে এই শ্ৰমিকৰ হিতাধিকাৰী কাৰ্যসূচীত সহযোগ আগবঢ়ায়।

গোলাঘাট জিলাৰ সৰুপথাৰৰ ছেৱাগুৰি অঞ্চলত এক নৃশংস হত্যাকাণ্ড সংঘটিত হৈছে। এক চাঞ্চল্যকৰ খবৰ অনুসৰি, এই ঘটনাত শাহুৱেকে নিজৰ বোৱাৰীয়েকক কাটি হত্যা কৰিছে। এই ঘটনাই সমগ্ৰ সৰুপথাৰ অঞ্চলত ব্যাপক চাঞ্চল্যৰ সৃষ্টি কৰিছে।

ৰাজ্যত চাৰিবছৰীয়া স্নাতক পাঠ্যক্ৰম (FYUGP) ৰূপায়ণক কেন্দ্ৰ কৰি সৃষ্টি হোৱা অচলাৱস্থা সন্দৰ্ভত আজি শিক্ষামন্ত্ৰীৰ সৈতে সদৌ অসম ছাত্ৰ সন্থা (আছু)ৰ এক গুৰুত্বপূৰ্ণ বৈঠক অনুষ্ঠিত হয়। এই বৈঠকৰ অন্তত 'আছু'ৰ নেতৃত্বই সংবাদ মাধ্যমৰ আগত নিজৰ প্ৰতিক্ৰিয়া ব্যক্ত কৰে। ছাত্ৰ সন্থাই অভিযোগ কৰিছে যে পৰ্যাপ্ত আন্তঃগাঁথনি আৰু শিক্ষক অবিহনে এই পাঠ্যক্ৰম আৰম্ভ কৰাৰ ফলত লাখ লাখ শিক্ষাৰ্থীয়ে চৰম বিভ্ৰাটৰ সন্মুখীন হ'বলগীয়া হৈছে। আলোচনাত 'আছু'ৱে কলেজসমূহৰ আন্তঃগাঁথনি উন্নয়ন আৰু খালী হৈ থকা অধ্যাপকৰ পদসমূহ শীঘ্ৰে পূৰণ কৰিবলৈ চৰকাৰক দাবী জনায়। শিক্ষামন্ত্ৰীগৰাকীয়ে এই সমস্যাসমূহ গুৰুত্বসহকাৰে লৈ অতি সোনকালে সমাধান কৰাৰ আশ্বাস প্ৰদান কৰে। ইয়াৰ প্ৰতি সঁহাৰি জনাই ছাত্ৰ সন্থাই স্পষ্ট কৰি দিয়ে যে যদি চৰকাৰে জৰুৰী পদক্ষেপ গ্ৰহণ নকৰে, তেন্তে ছাত্ৰ সমাজে এক তীব্ৰ আন্দোলন গঢ়ি তুলিব।

বিশ্বনাথ চাৰিআলি, চতিয়া আৰু জামুগুৰিহাটৰ একমাত্ৰ ৰক্ষাকৱচস্বৰূপ বিশ্বনাথ পানপুৰ মথাউৰিত ব্ৰহ্মপুত্ৰৰ তীব্ৰ গৰাখহনীয়াই ভয়ংকৰ ভাবুকি কঢ়িয়াই আনিছে, যি পৰিস্থিতিয়ে নৈপৰীয়া ৰাইজৰ নিদ্ৰাহৰণ কৰিছে। এই সংকটময় পৰিস্থিতিৰ বুজ ল’বলৈ ন-দুৱাৰ সমষ্টিৰ বিধায়ক পদ্ম হাজৰিকাই বিশ্বনাথ পাণপুৰ মথাউৰিৰ তেৱাৰিপাল তিনিআলিৰ গৰাখহনীয়াগ্ৰস্ত অঞ্চল পৰিদৰ্শন কৰে। উল্লেখ্য যে, ১৯৯১ চনৰে পৰা চতিয়াৰ দক্ষিণ অঞ্চলত বিশ্বনাথ পানপুৰ মথাউৰি গৰাখহনীয়াৰ কবলত পৰি আহিছে। বৰ্তমান সময়ত বিশেষকৈ কলাকাটি গাঁৱত গৰাখহনীয়াই এক ভয়াবহ ৰূপ লৈছে। ব্ৰহ্মপুত্ৰ নদীয়ে বিশ্বনাথ পানপুৰ মথাউৰি স্পৰ্শ কৰিবলৈ মাত্ৰ ২০ মিটাৰ দূৰত্ব বাকী আছে। পৰিদৰ্শনকালত বিধায়ক পদ্ম হাজৰিকাই কয় যে বৰ্তমান অসম চৰকাৰে গৰাখহনীয়া প্ৰতিৰোধৰ বাবে ৬০ কোটি টকা আৱণ্টন দিছে আৰু এই প্ৰতিৰোধৰ কাম তীব্ৰ গতিত চলি আছে। তেওঁ দৃঢ়তাৰে কয় যে যি কোনো প্ৰকাৰে বিশ্বনাথ পানপুৰ মথাউৰি ৰক্ষা কৰিবই লাগিব। ২০১২ চনৰ বানপানীত এই অঞ্চলত যি বৃহৎ ক্ষতি হৈছিল, তাৰ যাতে পুনৰাবৃত্তি নহয় তাৰ বাবে বিভাগীয় বিষয়া-কৰ্মচাৰীসকলে ব্যৱস্থা হাতত লৈছে বুলিও তেওঁ মন্তব্য কৰে।

শিৱসাগৰ আৰু চৰাইদেউ জিলাৰ সীমাৰ, লগতে দুয়োখন জিলাৰ জনসাধাৰণৰ বাবে অতি প্ৰয়োজনীয় ব্যস্ততাপূৰ্ণ চেপন চূণপোৰা পথত ঠিকাদাৰৰ দায়িত্বহীনতা আৰু গাফিলতিৰ ফলত দৈনিক দুৰ্ঘটনা সংঘটিত হৈ আহিছে। পথটোৰ চাইভ বাম নিৰ্মাণৰ দায়িত্ব পোৱা ঠিকাদাৰ প্ৰতিষ্ঠানৰ বিৰুদ্ধে গুৰুত্বপূৰ্ণ অভিযোগ উত্থাপন হৈছে যে তেওঁলোকে পথ নিৰ্মাণৰ সমান্তৰালভাৱে পথৰ কাষৰ চাইড বামবোৰ দকৈ খান্দি দীৰ্ঘদিন ধৰি পেলাই থৈছে। ইয়াৰ ফলত বৰষুণৰ পানী জমা হৈ চাইড বামত সোমাই দৈনিক দুৰ্ঘটনা সংঘটিত হৈছে। ঠিকাদাৰৰ এই গাফিলতিৰ বাবে স্থানীয় ৰাইজৰ লগতে আটাছু সৰৱ হৈ পৰিছে। তেওঁলোকে প্ৰশাসনক উপযুক্ত ব্যৱস্থা গ্ৰহণৰ আহ্বান জনাইছে আৰু আটাছুৱে অতি শীঘ্ৰেই চেপন চূণপোৰা পথৰ কাম সম্পূৰ্ণ কৰাৰ দাবী উত্থাপন কৰিছে।

চৰাইদেউ জিলাৰ ৰতনপুৰ চাহ বাগিচাৰ ফেক্টৰীটো মঙলবাৰে স্থানীয় প্ৰশাসনৰ উপস্থিতিত কানাড়া বেংক কৰ্তৃপক্ষই ছীল কৰি দিয়ে। বাগিচা কৰ্তৃপক্ষই কানাড়া বেংকৰ পৰা লোৱা কেইবা লক্ষাধিক টকাৰ ঋণ পৰিশোধ নকৰাৰ বাবে এই পদক্ষেপ লোৱা হয়। উল্লেখ্য যে, ফেক্টৰীটো ২০২৫ চনৰ নৱেম্বৰ মাহৰপৰা বন্ধ হৈ আছিল। ফেক্টৰীত কৰ্মৰত শ্ৰমিকসকলক পাৰিশ্ৰমিক নিদিয়াকৈ বাগিচাখনৰ স্বত্বাধিকাৰী ডেনিছ কুকুৰাচোৱা পলায়ন কৰাৰ অভিযোগ উত্থাপিত হৈছিল, যাৰ ফলত বহু শ্ৰমিক আৰু তেওঁলোকৰ পৰিয়াল আৰ্থিক সংকটৰ সন্মুখীন হৈছিল। দীৰ্ঘদিন ধৰি ঋণ পৰিশোধ নোহোৱাত বেংক কৰ্তৃপক্ষই আইনী প্ৰক্ৰিয়া অনুসৰি ব্যৱস্থা গ্ৰহণ কৰে। মঙলবাৰে স্থানীয় প্ৰশাসনৰ বিষয়া, বেংকৰ প্ৰতিনিধি আৰু নিৰাপত্তাৰক্ষীৰ উপস্থিতিত ফেক্টৰীটোৰ মূল প্ৰৱেশদ্বাৰত ছীল লগাই সম্পূৰ্ণৰূপে বন্ধ কৰি দিয়া হয়।

বিতৰ্কিত কংগ্ৰেছী নেতা নূৰুল আমিন চৌধুৰীয়ে অৱশেষত নিজৰ ভুল স্বীকাৰ কৰিছে। তেওঁ সংবাদ কৰ্মীসকলৰ বিৰুদ্ধে দিয়া গোচৰ উঠাই লোৱা বুলি মন্তব্য কৰিছে।

অসমৰ বাবে এক গৌৰৱময় খবৰ কঢ়িয়াই জনঞ্জয় জ্যোতি হাজৰিকা নামৰ উদীয়মান সাঁতোৰবিদে ১০০ মিটাৰ বাটাৰফ্লাই প্ৰতিযোগিতাত ব্ৰঞ্জ পদক লাভ কৰি তৃতীয় স্থান অধিকাৰ কৰিছে। তেওঁ এই কৃতিত্ব মাত্ৰ ৫৪.৫২ ছেকেণ্ড সময়ত অৰ্জন কৰে। জনঞ্জয় জ্যোতি হাজৰিকাৰ এই অসাধাৰণ সাফল্যত সমগ্ৰ অসমে গৌৰৱবোধ কৰিছে। তেওঁৰ এই কৃতিত্বক স্বীকৃতি জনাই গোলাঘাট সাঁতোৰ সন্থাই এক সৌজন্যমূলক সাক্ষাৎ কৰি তেওঁক সম্বৰ্ধনা জ্ঞাপন কৰে।

অসম-নাগালেণ্ড সীমান্তত নগাৰ সন্ত্ৰাস ক্ৰমাৎ বৃদ্ধি পোৱাৰ লগতে আগ্ৰাসী নগাই অসমৰ ভূমিত অসমীয়াক ভাবুকি প্ৰদান কৰি পথ নিৰ্মাণৰ কাম বন্ধ কৰিছে বুলি অভিযোগ উত্থাপন হৈছে। এই সন্দৰ্ভত অসম প্ৰশাসনে নীৰৱ দৰ্শকৰ ভূমিকা পালন কৰিছে বুলি কোৱা হৈছে। এই নগা সন্ত্ৰাস বন্ধ কৰাৰ দাবীত আজি অসম চাহ জনজাতি ছাত্ৰ সন্থাই (আটছা) নিউ সোনোৱালত মৰিয়নি-মোককচাং পথ অৱৰোধ কৰি এক উত্তাল প্ৰতিবাদ সাব্যস্ত কৰে। প্ৰতিবাদকাৰীসকলে অসম চৰকাৰৰ নীৰৱ ভূমিকাক কঠোৰ সমালোচনা কৰাৰ লগতে স্থানীয় বিধায়ক ৰূপজ্যোতি কুৰ্মীক মুৰ্দাবাদ ধ্বনিৰে ৰাজপথ উত্তাল কৰি তোলে।

অল ইণ্ডিয়া জাৰ্নেলিষ্ট ইউনিয়নৰ বঁটা প্ৰদানৰ এক অনুষ্ঠান অনুষ্ঠিত কৰা হয়। এই অনুষ্ঠানত মটক স্বায়ত্ব শাসিত পৰিষদৰ CME ডেভিদ চেতিয়াক সন্মানিত কৰা হয়। তেওঁৰ লগতে সমাজৰ হকে কাম কৰা আন বহুতো ব্যক্তিকো বঁটা প্ৰদান কৰা হয়।