GMCHত এজন ৰোগীৰ মৃত্যুৰ পিছতে এক উত্তপ্ত পৰিস্থিতিৰ সৃষ্টি হৈছে, য'ত নিশা তীব্ৰ উত্তেজনা দেখা গৈছে। চিকিৎসালয়খনত জ্বৰ আৰু কাহত ভুগি থকা বিজয় দাস নামৰ এজন যুৱকক ভৰ্তি কৰোৱা হৈছিল। বৰ্তমান এই যুৱকজনৰ মৃত্যু চিকিৎসকৰ গাফিলতিৰ বাবে হোৱা বুলি অভিযোগ উত্থাপন কৰা হৈছে।

মৰিগাঁও জিলাৰ মায়ং উন্নয়ন খণ্ডৰ অন্তৰ্গত আমকটাৰ মা আঘোৰা কালী ধামত আজিৰে পৰা দুদিনীয়া শ্ৰীশ্ৰী মা আঘোৰা কালী প্ৰাণ প্ৰতিষ্ঠা মহোৎসৱ ব্যাপক প্ৰস্তুতিৰে আৰম্ভ হৈছে। এই মহোৎসৱে সমগ্ৰ অঞ্চলটোত এক আধ্যাত্মিক পৰিৱেশ সৃষ্টি কৰিছে, য'ত ব্ৰহ্ম মূহুৰ্তত ১০৮ কলহ অভিষেক, পূজা-অৰ্চনা আৰু ধৰ্মীয় আলোচনা সভাৰে মুখৰিত হৈ পৰিব। উল্লেখ্য যে, আজি নিশা ঠিক ১১ বজাত ধাম প্ৰাংগনত শ্ৰীশ্ৰী মা আঘোৰা কালীৰ নৱ-নিৰ্মিত মূৰ্তিটো মন্ত্ৰী পীয়ুষ হাজৰিকাই আনুষ্ঠানিকভাৱে প্ৰাণ প্ৰতিষ্ঠা কৰিব।

বিশ্বনাথ চাৰিআলিত অৱস্থিত ৮৫ বছৰীয়া ঐতিহ্যমণ্ডিত চাৰিআলি উচ্চতৰ মাধ্যমিক আৰু বহুমুখী বিদ্যালয়ৰ পুৰণি গৃহটো বৰ্তমান ধ্বংসৰ দিশে গতি কৰিছে। ১৯৪১ চনত স্থাপিত হোৱা এই বিদ্যালয়খন শেহতীয়াকৈ কাষতে নিৰ্মাণ কৰা নতুন গৃহলৈ স্থায়ীভাৱে স্থানান্তৰ কৰা হৈছিল, য'ত বৰ্তমান সকলো শ্ৰেণীৰ পাঠদান চলি আছে। কিন্তু নতুন গৃহলৈ যোৱাৰ পিছৰে পৰা বিদ্যালয়ৰ ৮৫ বছৰ গৰকা পুৰণি গৃহটো ক্ৰমাৎ জহি-খহি যাবলৈ ধৰিছে। স্থানীয় ৰাইজ আৰু প্ৰাক্তন ছাত্ৰ-ছাত্ৰীসকলে অভিযোগ কৰিছে যে উচিত যত্ন আৰু সংৰক্ষণৰ অভাৱত এই ঐতিহাসিক গৃহটো সম্পূৰ্ণৰূপে ধ্বংস হোৱাৰ উপক্ৰম হৈছে। বৃহত্তৰ বিশ্বনাথ অঞ্চলৰ বহুজনৰ আৱেগ আৰু স্মৃতি জড়িত এই বিদ্যালয়খনৰ পৰা বহু ব্যক্তিয়ে শিক্ষা গ্ৰহণ কৰি নিজ নিজ কৰ্মক্ষেত্ৰত সফল হোৱাৰ লগতে অসম আৰু ভাৰতৰ নাম উজলাই তুলিছে, যাৰ বাবে ই বিশ্বনাথৰ গৌৰৱ হিচাপে পৰিচিত। এই সন্দৰ্ভত প্ৰাক্তন ছাত্ৰ আৰু স্থানীয় সচেতন মহলে পুৰণি গৃহটোক ঐতিহাসিক সমল হিচাপে সংৰক্ষণৰ দাবী জনাইছে। তেওঁলোকে ইয়াক সংগ্ৰহালয় বা গ্ৰন্থাগাৰলৈ ৰূপান্তৰ কৰি ভৱিষ্যৎ প্ৰজন্মৰ বাবে জীয়াই ৰখাৰ পৰামৰ্শ আগবঢ়াইছে, অন্যথা বিশ্বনাথ চাৰিআলিৰ এক গৌৰৱময় অধ্যায় চিৰদিনৰ বাবে হেৰাই যাব বুলি সতৰ্ক কৰি দিছে। সদৌ অসম ছাত্ৰ সন্থাৰ কেন্দ্ৰীয় কাৰ্যনিৰ্বাহক সদস্য বিক্ৰম বিকাশ বৰা আৰু অসম সেনা নেতা নিহাৰ শইকীয়াই জিলা প্ৰশাসন আৰু শিক্ষা বিভাগক এই বিষয়ত শীঘ্ৰে হস্তক্ষেপ কৰিবলৈ আহ্বান জনাইছে।

ছিপাঝাৰ আঞ্চলিক ছাত্ৰ সন্থাৰ বাৰ্ষিক অধিৱেশন আৰু এক বিশেষ অভিনন্দন অনুষ্ঠানত 'অৰণ্য মানৱ' পদ্মশ্ৰী যাদৱ পায়েঙক আদৰণি জনোৱা হয়। এই অনুষ্ঠান ছিপাঝাৰত অনুষ্ঠিত হৈছিল।

জাপানৰ প্ৰধানমন্ত্ৰীৰ অসম ভ্ৰমণ বাতিল সন্দৰ্ভত লুৰীণজ্যোতি গগৈয়ে অসম চৰকাৰলৈ প্ৰশ্ন উত্থাপন কৰি উদ্বেগ প্ৰকাশ কৰিছে। তেওঁৰ মতে, জুবিন গাৰ্গৰ ছবি মছি পেলোৱাক লৈ হোৱা প্ৰতিবাদৰ বাবে জাপানৰ প্ৰধানমন্ত্ৰীৰ অসম ভ্ৰমণ বাতিল কৰা হৈছিল। গগৈয়ে এই বিষয়ত দিল্লীৰ সৈতে তুলনা কৰিছে, য'ত 'ককৰোচ জনতা পাৰ্টী'য়ে প্ৰতিবাদ কৰি থকাৰ পিছতো জাপানৰ প্ৰধানমন্ত্ৰী দিল্লীলৈ আহিব। এই পটভূমিত, অসমত সামান্য প্ৰতিবাদৰ বাবেই ভ্ৰমণ বাতিল হোৱাটোৱে অসম চৰকাৰৰ ওপৰত প্ৰশ্ন উত্থাপন কৰিছে।

অসমৰ ইণ্ডিজিণাছ মুছলিম অৰ্গেনাইজেছন গোৰিয়া জাতীয় পৰিষদে দিছপুৰ প্ৰেছ ক্লাবত এখন সাংবাদিক সন্মিলন অনুষ্ঠিত কৰে।

ৰঙিয়াত সংঘটিত ধাৰাবাহিক চুৰিকাণ্ডই জনসাধাৰণক আতংকিত কৰি তোলাৰ লগতে আৰক্ষীৰ বাবেও এক মূৰৰ কামোৰণি হৈ পৰিছে। পূৰ্বৰ চাঞ্চল্যকৰ চুৰি কাণ্ডসমূহৰ ঢৌ মাৰ নৌযাওঁতেই যোৱানিশা পুনৰ ৰঙিয়াৰ ৫ নং ৱাৰ্ডৰ লেঞ্চকাৰ্ডৰ সমীপৰ ৰেনু শইকীয়া ডেকা নামৰ এগৰাকী মহিলাৰ ঘৰত চোৰে “চাফাই অভিযান” চলায়। ঘৰত কোনো নথকাৰ সুযোগ লৈ চোৰৰ দলে ৰডেৰে তলা ভাঙি ঘৰৰ ভিতৰত প্ৰৱেশ কৰে। ইয়াৰ পিছতে তেওঁলোকে পাচ লক্ষাধিক মূল্যৰ সোণৰ আ-অলংকাৰ, প্ৰায় ৬০ হাজাৰ টকা নগদ ধনৰ লগতে বহু মূল্যৱান কাপোৰ লুট কৰি নিৰ্বিঘ্নে পলায়ন কৰিবলৈ সক্ষম হয়। পিছত ঘৰৰ গৰাকী উপস্থিত হৈহে এই ঘটনাৰ বিষয়ে অৱগত হয়। এই সন্দৰ্ভত ৰঙিয়া আৰক্ষী থানাত খবৰ দিয়াত আৰক্ষীৰ এটা দল ঘটনাস্থলীত উপস্থিত হৈ তদন্ত আৰম্ভ কৰে যদিও এই পৰ্যন্ত এই চুৰিকাণ্ডত জড়িত কাকো আটক কৰিবলৈ সক্ষম হোৱা নাই।

বিশ্বনাথ জিলাৰ গেলাপুখুৰী অঞ্চলত ২১ বছৰীয়া কল্যাণী বড়ো নামৰ এগৰাকী যুৱতী নিৰুদ্দেশ হোৱা ঘটনাই অঞ্চলটোত তীব্ৰ চাঞ্চল্যৰ সৃষ্টি কৰিছে। নৰেন বড়ো আৰু ফুলেশ্বৰী বড়োৰ কনিষ্ঠা কন্যা কল্যাণী বড়ো যোৱা দেওবাৰে তিনিসুঁতিৰ পৰা আলহী খাই ঘৰলৈ উভতি অহাৰ পথৰ পৰাই সন্ধানহীন হৈ আছে। পৰিয়ালৰ লোকে জনোৱা অনুসৰি, আলহী খাই ঘৰলৈ ঘূৰি অহাৰ সময়ত পথ দুৰ্ঘটনা হোৱা বুলি ঘৰলৈ এটা খবৰ দিয়া হৈছিল। এই খবৰ পোৱাৰ পিছতে পৰিয়ালৰ লোক ঘটনাস্থলীত উপস্থিত হৈছিল যদিও, যুৱতীগৰাকীৰ কোনো সম্ভেদ বিচাৰি পোৱা নাছিল। ইতিমধ্যে যুৱতীগৰাকীৰ পৰিয়ালে বিশ্বনাথ সদৰ আৰক্ষী থানাত তেওঁ সন্ধানহীন হোৱাৰ সন্দৰ্ভত এক এজাহাৰ দাখিল কৰিছে, কিন্তু বৰ্তমানলৈকে তেওঁৰ কোনো তথ্য লাভ কৰা হোৱা নাই। ইফালে, পেৰেলাইছিছ ৰোগত আক্ৰান্ত কল্যাণীৰ ৰুগ্ন পিতৃৰ অৱস্থা অধিক শোচনীয় হৈ পৰিছে। এই নিৰুদ্দেশৰ ঘটনাত অতি দৰিদ্ৰ পৰিয়ালটো গভীৰ চিন্তা আৰু শংকাত ডুবি আছে। পৰিয়ালৰ লোকে জনসাধাৰণক আহ্বান জনাইছে যে যদি কোনোবাই যুৱতীগৰাকীৰ বিষয়ে কিবা তথ্য লাভ কৰে, তেন্তে ৯৯৬০১২৮২২১ নম্বৰত যোগাযোগ কৰিবলৈ।

মহানগৰীৰ হাতীগাঁৱৰ শান্তি পথত উচ্ছেদ অভিযান চলোৱা হৈছে। দিছপুৰ ৰাজহ চক্ৰ বিষয়াৰ উপস্থিতিত এই অভিযান চলি আছে, য'ত চৰকাৰী ভূমি দখল কৰি কেইবাটাও পৰিয়ালে ঘৰ নিৰ্মাণ কৰাৰ অভিযোগ উঠিছে। বিশেষকৈ PWD ৰ উন্নয়নমূলক প্ৰকল্পৰ বাবে এই উচ্ছেদ চলোৱা হৈছে। উচ্ছেদিত লোকসকলে এই সন্দৰ্ভত মুখ্যমন্ত্ৰীৰ ওচৰত ৰেহাই বিচাৰি বিননি জনাইছে। তেওঁলোকে কয় যে, 'আমি গৰীয়া মানুহ, 'মিয়া' নহয়, আমি বিজেপি কৰো, সেয়ে আমাক ৰেহাই দিয়ক। কোনোমতে ঘৰ বান্ধি পৰিয়াল চলাই আছো আৰু আমি স্থানীয় লোক।'

বৃহত্তৰ মৰঙি মৌজাত বনৰীয়া হাতীৰ উপদ্ৰৱ দিনকদিনে বৃদ্ধি পাইছে, যাৰ ফলত মৰঙীবাসীয়ে ত্ৰাহিমধুসূদন সুৱঁৰিছে। কালি নিশা মৰঙিৰ ফুলনীবাৰী আৰু বকিয়াল গাঁৱত বনৰীয়া হাতীৰ এটা জাকে উপদ্ৰৱ চলাই বহুকেইটা পৰিয়ালৰ বাসগৃহ ধ্বংস কৰে। হাতীৰ জাকটোৱে পকী ঘৰৰ দেৱাল পৰ্যন্ত ভাঙি ঘৰৰ ভিতৰত প্ৰৱেশ কৰি ঘৰৰ খাদ্য সামগ্ৰী খাই গচকি বিস্তৰ ক্ষতিসাধন কৰে। এই আক্ৰমণৰ পৰা পৰিয়ালকেইটাই কথমপি প্ৰাণ ৰক্ষা কৰিবলৈ সক্ষম হয়। ৰাইজে অভিযোগ কৰিছে যে মাত্ৰ দুই কিলোমিটাৰ নিলগত থকা বকিয়াল খণ্ড বন কাৰ্যালয়ৰ বনকৰ্মীক খবৰ দিয়াৰ পিছতো বন বিভাগে বিষয়টোত কোনো ধৰণৰ খবৰ লোৱা নাই।