श्री क्षेत्र वैष्णव गडावर भक्तीचा महासागर पाहायला मिळाला आहे. या भक्तिमय वातावरणात लाखो भाविकांनी उपस्थित राहून पांडुरंगाचे दर्शन घेतले.

श्री क्षेत्र वैष्णव गडावर भक्तीचा महासागर पाहायला मिळाला आहे. या भक्तिमय वातावरणात लाखो भाविकांनी उपस्थित राहून पांडुरंगाचे दर्शन घेतले.

नैसर्गिक संकटाला तोंड देत उत्पन्न घेण्यासाठी जिवाचे रान करणाऱ्या शेतकऱ्यांना आता वन्यप्राण्यांच्या त्रासाला सामोरे जावे लागत आहे. वाशीम जिल्ह्यातील रिसोड तालुक्यातील वाडीरायताळ, देगाव, लिंगापेन आणि किनखेडा या परिसरात जंगली रोहींनी धुडगूस घालून सोयाबीन पिकांची मोठी नासाडी केली आहे. खरिपातील सोयाबीनची पेरणी झाल्यानंतर शेतात अंकुर उगवून पीक उत्तम बहरलेले असतानाच रोहींच्या हैदोसामुळे पिकांचे अतोनात नुकसान होत आहे. विशेषतः लिंगापेन आणि परिसरात जंगली रोहींचे अनेक कळप वावरत असून एका एका कळपात ३० ते ५० रोही आहेत. हे रोही पिकांवर ताव मारण्यापेक्षा शेतात धुडगूस घालून पिकांचे अधिक नुकसान करत आहेत, ज्यामुळे शेतकऱ्यांचे हजारो रुपयांचे नुकसान झाले आहे. वन्यप्राण्यांच्या या उपद्रवामुळे शेतकरी कमालीचे त्रस्त झाले असून वन विभागाने या रोही प्राण्यांचा तात्काळ बंदोबस्त करावा, अशी जोरदार मागणी शेतकऱ्यांच्या वतीने करण्यात येत आहे.

जालना जिल्ह्यातील मंठा येथील विवेकानंद सेवा केंद्र शाळेच्या वतीने आषाढी एकादशीनिमित्त भक्तीमय दिंडीचे आयोजन करण्यात आले. या दिंडीच्या माध्यमातून वारकरी संस्कृतीचा उत्साहात जागर करण्यात आला.

साहित्यरत्न डॉ. अण्णाभाऊ साठे यांच्या १०६ व्या जयंतीनिमित्त १ ऑगस्ट रोजी जालन्यात विविध सामाजिक, शैक्षणिक व जनजागृतीपर कार्यक्रमांचे आयोजन करण्यात आले आहे. आधुनिक लहुजी सेना, जालना जिल्ह्याच्या वतीने या कार्यक्रमांचे नियोजन करण्यात आले असून, भाजप नगरसेवक अक्षय गोरंट्याल यांनी रविवारी पत्रकार परिषदेत या सर्व आयोजनाची माहिती दिली. या जयंती महोत्सवानिमित्त शहरात रक्तदान शिबिर, शैक्षणिक साहित्य वाटप आणि भव्य मोटारसायकल रॅली यांसारख्या विविध उपक्रमांचे आयोजन करण्यात येणार आहे. १ ऑगस्ट रोजी हे सर्व कार्यक्रम उत्साहात पार पडणार असल्याची माहिती पत्रकार परिषदेत देण्यात आली.

केंद्रीय अर्थमंत्री निर्मला सीतारामन यांनी केलेल्या वादग्रस्त वक्तव्यावर शिवसेना उद्धव बाळासाहेब ठाकरे पक्षाच्या प्रवक्ता जयश्रीताई शेळके यांनी बुलढाणा येथे अत्यंत आक्रमक भूमिका घेतली आहे. अर्थमंत्र्यांच्या या विधानाचा जोरदार समाचार घेताना 'हा प्रकार म्हणजे चोराच्या उलट्या बोंबा आहेत' असा थेट हल्लाबोल जयश्रीताई शेळके यांनी केला आहे.

परभणी महानगरपालिकेतील अधिकारी आणि कर्मचारी आपल्या प्रलंबित मागण्यांसाठी आक्रमक झाले आहेत. वाढीव अनुदानासह विविध प्रलंबित मागण्यांवर राज्य शासनाने तातडीने निर्णय घ्यावा, अशी ठाम मागणी परभणी महानगरपालिका अधिकारी-कर्मचारी संघटनेने केली आहे. राज्य शासनाने या मागण्यांवर वेळेत सकारात्मक निर्णय न घेतल्यास १० ऑगस्टपासून कामबंद आंदोलन छेडण्याचा थेट इशारा संघटनेने दिला आहे.

२४ जुलैच्या मध्यरात्री शेगाव-खामगाव मार्गावर गस्त घालत असताना खामगाव वनपरिक्षेत्र कार्यालयाच्या (संरक्षण) पथकाला अवैध लाकूड वाहतुकीची गुप्त माहिती मिळाली. त्या आधारे माउली अभियांत्रिकी कॉलेजजवळ एम.पी. ०९ एचजी ०२७५ क्रमांकाचा ट्रक थांबवून तपासणी केली असता, त्यात ११ घनमीटर जळाऊ लाकूड आढळून आले. लाकूड वाहतुकीचा कोणताही वैध परवाना न आढळल्याने सिंधीपुरा, बुऱ्हाणपूर (मध्य प्रदेश) येथील ३२ वर्षीय ट्रक चालक मोहम्मद मोसीन मोहम्मद यासीन याच्यावर वनगुन्हा दाखल करण्यात आला आहे. या कारवाईत वनविभागाने १३ हजार ९३७ रुपयांचे जळाऊ लाकूड आणि ५ लाख ५० हजार रुपयांचा ट्रक असा एकूण ५ लाख ६३ हजार ९३७ रुपयांचा मुद्देमाल जप्त केला आहे. ही कारवाई उपवनसंरक्षक जमीर शेख, विभागीय वनाधिकारी (दक्षता) कमलेश पाटील आणि सहायक वनसंरक्षक वैभव काकडे यांच्या मार्गदर्शनाखाली वनविभागाच्या पथकाने केली. वनविभागाने अवैध वृक्षतोड आणि लाकूड वाहतुकीविरोधात कारवाईचा बडगा उगारल्याने संबंधितांमध्ये खळबळ उडाली असून या प्रकरणाचा पुढील तपास सुरू आहे.

जालना शहरातील झोपडपट्टीधारकांना पीआर कार्ड (प्रमाणपत्र) मिळवून देण्याचे दिलेले आश्वासन अखेर पूर्ण झाले आहे. मुक्तेश्वर येथे आयोजित 'छत्रपती शिवाजी महाराज समाधान शिबिर' अभियानात मोठ्या संख्येने लाभार्थ्यांना पीआर कार्डांचे वितरण करण्यात आले. हे पीआर कार्ड वाटप शिवसेना उपनेते तथा आमदार अर्जुनराव खोतकर यांच्या हस्ते पार पडले. आमदार अर्जुनराव खोतकर यांनी केलेल्या सातत्यपूर्ण पाठपुराव्यामुळेच या प्रयत्नांना यश आले असून त्यांनी दिलेला शब्द अखेर पूर्ण केला आहे. रविवारी दिनांक २६ रोजी दुपारी ४ वाजेच्या सुमारास मिळालेल्या माहितीनुसार, या समाधान शिबिरादरम्यान उपस्थित असलेल्या लाभार्थ्यांना अधिकृत प्रमाणपत्रांचे वाटप करण्यात आले.