జిన్నారం మున్సిపల్ కేంద్రంలో ప్రభుత్వ ఆసుపత్రిలో మెరుగైన వైద్య సేవలు జిన్నారం మున్సిపల్ కేంద్రంలోని ప్రభుత్వ ఆసుపత్రిలో ప్రజలకు మెరుగైన వైద్య సేవలు అందిస్తున్నట్లు డాక్టర్ కోమల్ తెలిపారు. ఆసుపత్రికి వచ్చే రోగులకు వైద్య పరీక్షలు నిర్వహించి అవసరమైన చికిత్స అందిస్తున్నామని చెప్పారు. ప్రజలు ప్రభుత్వ ఆసుపత్రి సేవలను సద్వినియోగం చేసుకోవాలని సూచించారు. ఈ సందర్భంగా కొర్లకుంట గ్రామానికి చెందిన గర్భిణి తనకు ఆసుపత్రిలో అందిన వైద్య సేవలపై తన అనుభవాన్ని పంచుకున్నారు.

మనంతాయిపల్లి గ్రామపంచాయతీలో చేయూత పెన్షన్ల వెరిఫికేషన్ ప్రక్రియ కౌడిపల్లి మండలం మనంతాయిపల్లి గ్రామపంచాయతీలో మంగళవారం చేయూత పెన్షన్ల వెరిఫికేషన్ ప్రక్రియ నిర్వహించారు. ఎంపీడీవో శ్రీనివాస్ గ్రామపంచాయతీ పరిధిలోని లబ్ధిదారుల వివరాలు, అర్హతలను పరిశీలించారు. అనంతరం గ్రామస్తుల సమక్షంలో నూతన చేయూత పెన్షన్లకు అర్హులుగా గుర్తించిన వారి జాబితాను చదివి వినిపించారు. అర్హత ఉన్న ప్రతి ఒక్కరికీ పెన్షన్ అందేలా వివరాలను పరిశీలించినట్లు తెలిపారు. కార్యక్రమంలో సర్పంచ్ చెన్యా నాయక్, పంచాయతీ కార్యదర్శి, సిబ్బంది పాల్గొన్నారు.

కాప్రా, కుషాయిగూడ, నేరేడ్‌మెట్‌లో ఉరుములు మెరుపులతో కూడిన భారీ వర్షం కాప్రా, కుషాయిగూడ, నేరేడ్‌మెట్ ప్రాంతాల్లో మంగళవారం సాయంత్రం ఉరుములు, మెరుపులతో కూడిన వర్షం ప్రారంభమైంది. ఒక్కసారిగా వాతావరణం చల్లబడటంతో పాటు పలు కాలనీల్లో రోడ్లపై వర్షపు నీరు చేరి రహదారులు జలమయంగా మారాయి. గణేష్ నవరాత్రి ఉత్సవాలు కొనసాగుతున్న నేపథ్యంలో ఆయా ప్రాంతాల్లో ఏర్పాటు చేసిన గణనాథుల మండపాల వద్దకు వచ్చిన భక్తులకు వర్షం కారణంగా ఇబ్బందులు ఎదురయ్యాయి. మండపాల వద్ద భక్తులు తడవకుండా నిర్వాహకులు అదనపు ఏర్పాట్లు చేసుకోవాల్సి వచ్చింది. వర్షం కారణంగా రోడ్లపై రాకపోకలకు కూడా కొంత అంతరాయం ఏర్పడింది.

మిషన్ భగీరథ నీటి మురికిని అరికట్టి పరిశుభ్రం నీరు అందించాలని ప్రజలు కోరుతున్నారు మిషన్ భగీరథ నీరు మురికిగా వస్తుంది పరిశుభ్రంగా అందించాలని పట్టణ ప్రజలు కోరుతున్నారు. వికారాబాద్ జిల్లా కేంద్రంలోని ఎన్నెపల్లి సమీపంలో మిషన్ భగీరథ నీరు ఎర్రగా మురికిగా కంపువాసన వస్తుందని కాలిన ప్రజలు ఆవేదన వ్యక్తం చేస్తున్నారు. మున్సిపల్ అధికారులు వెంటనే చర్యలు తీసుకొని మురికి నీరు కాకుండా పరిశుభ్రమైన నీరు అందించి ప్రజల ఆరోగ్యాన్ని కాపాడాలని పట్టణ ప్రజలు కోరుతున్నారు.

యెన్నేపల్లి–వికారాబాద్ మెయిన్ రోడ్డుపై ప్రత్యేక దృష్టి అవసరం. వర్షం పడితే రోడ్డు మీద నీళ్లు చేరడం కాదు… రోడ్డు ఎక్కడుంది, నది ఎక్కడుంది అని వెతుక్కోవాల్సిన పరిస్థితి! రోజూ ప్రజలు, విద్యార్థులు, ఉద్యోగులు, ద్విచక్ర వాహనదారులు ఈ రోడ్డుపై ఎన్నో ఇబ్బందులు పడుతున్నారు. చిన్న వర్షానికే రోడ్డు పరిస్థితి ప్రమాదకరంగా మారుతోంది. ప్రమాదాలు జరిగే అవకాశం కూడా ఎక్కువగా ఉంది. ఇదే రోడ్డుపై మన ప్రజాప్రతినిధులు, రాజకీయ నాయకులు కూడా ప్రయాణిస్తూనే ఉన్నారు. కానీ ఆశ్చర్యం ఏమిటంటే… రోడ్డు మాత్రం అందరికీ కనిపిస్తోంది, సమస్య మాత్రం ఎవరికీ కనిపించడం లేదు! రాజకీయ కార్యక్రమాలు ఎంత ముఖ్యమో, ప్రజల ప్రాణాలకు సంబంధించిన రోడ్లు, డ్రైనేజీ, మౌలిక వసతులు కూడా అంతే ముఖ్యం. ప్రజల కష్టాలు ఎన్నికల సమయంలో మాత్రమే కనిపించకుండా, వర్షం పడినప్పుడూ కనిపిస్తే బాగుంటుంది! సంబంధిత ప్రజాప్రతినిధులు, అధికారులు యెన్నేపల్లి–వికారాబాద్ రోడ్డును పరిశీలించి, శాశ్వతంగా డ్రైనేజీ మరియు రోడ్డు సమస్యను పరిష్కరించాలని కోరుతున్నాను. ప్రజలకు కావాల్సింది హామీలు కాదు… వర్షం వచ్చినా ప్రయాణించగలిగే రోడ్డు.

వికారాబాద్ మహావీర్ మెడికల్ కళాశాలలో ర్యాగింగ్: బాధ్యులపై చర్యలకు SFI, CPM డిమాండ్ వికారాబాద్:వికారాబాద్ జిల్లా కేంద్రంలోని మహావీర్ మెడికల్ కళాశాలలో ఎంబిబిఎస్ (MBBS) మొదటి సంవత్సరం చదువుతున్న మహారాష్ట్రకు చెందిన రోహన్ ఖాన్ అనే విద్యార్థిపై తోటి విద్యార్థులు ప్రాంతీయ విభేదాలతో ర్యాగింగ్, దాడికి పాల్పడటం పట్ల SFI, DYFI, CPM ప్రజా సంఘాలు తీవ్ర అభ్యంతరం వ్యక్తం చేశాయి.సహచరుల అవమానాలు, దాడులు భరించలేక రోహన్ ఖాన్ రాత్రికి రాత్రే మహారాష్ట్రకు వెళ్ళిపోగా, తాజాగా తన తల్లిదండ్రులు, బంధువులతో కలిసి తిరిగి కళాశాలకు వచ్చారు. ఈ సందర్భంగా విద్యార్థి కుటుంబ సభ్యులు, ప్రజాసంఘాల నాయకులు కళాశాల యాజమాన్యం మరియు పోలీసులను కలిసి, దాడికి పాల్పడిన వారిపై తక్షణమే కఠిన చర్యలు తీసుకోవాలని డిమాండ్ చేశారు. ప్రజాసంఘాల ప్రధాన డిమాండ్లు: అవగాహన సదస్సులు:కళాశాలలో చదువుతున్న 300 మందికి పైగా విద్యార్థులకు ర్యాగింగ్, దాడులు, దౌర్జన్యాలు, అలాగే గంజాయి, డ్రగ్స్ దుష్పరిణామాలపై నిరంతరం అవగాహన సదస్సులు నిర్వహించాలి. కఠిన పర్యవేక్షణ: విద్యార్థుల మధ్య ప్రాంతీయ తగాదాలను అరికట్టేందుకు, బాలికలు మరియు బాలుర హాస్టళ్లపై యాజమాన్యం, పోలీసులు నిరంతరం నిఘా ఉంచాలి. యాజమాన్య బాధ్యత: కళాశాల యాజమాన్యం నిర్లక్ష్యం వీడి విద్యార్థుల భద్రతకు పూర్తి పూచీకత్తు వహించాలని SFI జిల్లా ఉపాధ్యక్షులు తేజా బాయ్, CPM జిల్లా కార్యదర్శి ఆర్. మహిపాల్ డిమాండ్ చేశారు. چنین ఘటనలు పునరావృతం కాకుండా చూడాలని హెచ్చరించారు.

రైతుల పంటలకు వెంటనే సాగునీరు విడుదల చేయాలి బిజెపి నేత శ్రీ వర్ధన్ రెడ్డి పాలమూరు జిల్లాలోని రైతుల పంటలకు వెంటనే జూరాల ప్రాజెక్టు నుంచి సాగునీరు విడుదల చేయాలని బీజేపీ రాష్ట్ర నాయకుడు శ్రీవర్ధన్ రెడ్డి డిమాండ్ చేశారు. రైతుల సమస్యలపై పర్యటనకు వెళ్తున్న బీజేపీ నేతలను జడ్చర్ల వద్ద పోలీసులు అడ్డుకుని అక్రమంగా అరెస్టు చేయడాన్ని ఆయన తీవ్రంగా ఖండించారు. ఈ సందర్భంగా ఆయన మీడియాతో మాట్లాడుతూ.. ఎన్నో ఏళ్లుగా కష్టాలు అనుభవిస్తున్న పాలమూరు రైతులను కాంగ్రెస్ ప్రభుత్వం మరింత ఇబ్బందులకు గురిచేస్తోందని మండిపడ్డారు. సన్న వడ్లకు ఇవ్వాల్సిన రూ.500 బోనస్‌ను ఎగ్గొట్టేందుకే ప్రభుత్వం కుట్రపూరితంగా వ్యవహరిస్తూ రైతులను ఎండబెడుతోందని తీవ్ర స్థాయిలో ఆరోపించారు. జూరాల ప్రాజెక్టులో 10 టీఎంసీల పూర్తిస్థాయి నీటి నిల్వ ఉండాల్సి ఉండగా, ప్రస్తుతం కనీసం 6 నుంచి 7 టీఎంసీల నీరు కూడా లేని దుస్థితి ఏర్పడిందని పేర్కొన్నారు. దీనివల్ల కొత్తకోట, మదనాపురం నుంచి కొల్లాపూర్ వరకు వేలాది ఎకరాల్లో పంటలు ఎండిపోతూ రైతులు తీవ్రంగా నష్టపోతున్నారని ఆందోళన వ్యక్తం చేశారు. ప్రభుత్వం తక్షణమే స్పందించి పంటలను కాపాడేందుకు సాగునీరు విడుదల చేయాలని డిమాండ్ చేశారు. రైతుల పక్షాన క్షేత్రస్థాయికి వెళ్తున్న రామచందర్‌రావు, ఆచారి తదితర జిల్లా నేతలను అప్రజాస్వామికంగా అడ్డుకుని అరెస్టు చేయడం ప్రభుత్వ నియంతృత్వ వైఖరికి నిదర్శనమని ధ్వజమెత్తారు. ప్రభుత్వం వెంటనే రైతుల సమస్యలను పరిష్కరించకపోతే బీజేపీ ఆధ్వర్యంలో పెద్ద ఎత్తున ఆందోళనలు చేపడతామని హెచ్చరించారు.

శ్రీ ఏడుపాయలు మన దుర్గా భవాని అమ్మవారి ప్రత్యేక మంగళహారతి శ్రీ ఏడుపాయల మండల దుర్గ భవాని అమ్మవారిని మంగళవారం ప్రత్యేకంగా అలంకరించారు. మెదక్ జిల్లా పాపన్నపేట మండల పరిధిలోని నాగసానుపల్లి గ్రామంలోని ప్రముఖ పుణ్యక్షేత్రం శ్రీ ఏడుపాయల వన దుర్గ భవాని అమ్మవారి ఆలయంలో అమ్మవారిని ప్రత్యేకంగా అలంకరించి, ప్రత్యేక పూజలు, అభిషేకాలు, ఆరుతులను నిర్వహించిన అనంతరం భక్తులకు దర్శనం కల్పించారు.

39 ఏళ్లుగా కృపానంద్ అపార్ట్‌మెంట్స్‌లో ఘనంగా వినాయక పూజలు మల్కాజిగిరిలోని కృపానంద్ అపార్ట్‌మెంట్స్‌లో 39 ఏళ్లుగా గణేష్ ఉత్సవాలను అంగరంగ వైభవంగా నిర్వహిస్తున్నట్లు నిర్వాహకులు తెలిపారు. తొమ్మిది రోజులుగా పిల్లలు, మహిళలతో కలిసి భక్తిశ్రద్ధలతో పూజలు, భజన కార్యక్రమాలు నిర్వహించారు. శ్రీ మాత అమృతానందమయి దేవి ఆశ్రమం నుంచి శ్రీమాత స్వామి సువిద్య ప్రాణ ముఖ్య అతిథిగా హాజరయ్యారు. మహాదేవి పూజ, మెడిటేషన్, భారీ భజన కార్యక్రమంతో పాటు దీపాలంకరణ నిర్వహించగా, పెద్ద సంఖ్యలో భక్తులు పాల్గొని దేవి ఆశీర్వాదం పొందారు.

తూప్రాన్ పట్టణంలో బస్సు నుంచి జారిపడి యువకుడికి తీవ్ర గాయాలు తూప్రాన్ పట్టణంలో ఆర్టీసీ బస్సు ప్రమాదంలో యువకుడు తీవ్రంగా గాయపడ్డాడు. అల్లాపూర్‌కు చెందిన చిన్న మన్నె నాగరాజు (35) గజ్వేల్ వెళ్లేందుకు తూప్రాన్ ఆర్టీసీ బస్టాండ్‌లో సంగారెడ్డి డిపోకు చెందిన బస్సు ఎక్కాడు. బస్సు బస్టాండ్‌ నుంచి బయటకు వస్తున్న సమయంలో నాగరాజు ప్రమాదవశాత్తు కిందపడిపోయాడు. ఈ క్రమంలో బస్సు వెనుక చక్రం అతడి కాలుపై నుంచి వెళ్లడంతో తీవ్ర గాయాలయ్యాయి. సమాచారం అందుకున్న పోలీసులు ఘటనపై వివరాలు సేకరిస్తున్నారు.