చిన్నశంకరంపేటలో కార్డుల పంపిణీ, లబ్ధిదారులకు స్మార్ట్ రేషన్ కార్డులు అందజేత చిన్నశంకరంపేటలో స్మార్ట్ రేషన్ కార్డుల పంపిణీ కార్యక్రమం నిర్వహించారు. మెదక్ ఎమ్మెల్యే మైనంపల్లి రోహిత్ లబ్ధిదారులకు కార్డులను అందజేశారు. ఈ సందర్భంగా ఆయన మాట్లాడుతూ.. పేదల సంక్షేమమే లక్ష్యంగా కాంగ్రెస్ ప్రభుత్వం పలు చర్యలు చేపడుతోందన్నారు. నూతన రేషన్ కార్డులతో పాటు అర్హులైన ప్రతి ఒక్కరికీ స్మార్ట్ కార్డు అందేలా చర్యలు కొనసాగుతున్నాయని తెలిపారు. కార్యక్రమంలో తహశీల్దార్ మాలతి, కాంగ్రెస్ మండల అధ్యక్షుడు మోహన్ తదితరులు పాల్గొన్నారు.

1 hr ago

Sraya

నర్సాపూర్, మెదక్, తెలంగాణ•

1 hr ago

లింగంపేట్ హత్య కేసును ఛేదించిన పోలీసులు నిందితుడి అరెస్ట్.. ఇనుప రాడ్, సెల్‌ఫోన్, రక్తపు మరకలున్న దుస్తులు స్వాధీనం ఎల్లారెడ్డి: కామారెడ్డి జిల్లా లింగంపేట్ మండలం నాగారం గ్రామ శివారులో జరిగిన మహిళ హత్య కేసును పోలీసులు ఛేదించారు. సాంకేతిక పరిజ్ఞానాన్ని వినియోగించి కేసు దర్యాప్తును వేగవంతం చేసిన పోలీసులు నిందితుడిగా గుర్తించిన కొరుపోలు గ్రామానికి చెందిన గుట్టమీది సాయిలు (48)ను అరెస్ట్ చేశారు. హత్యకు ఉపయోగించిన ఇనుప రాడ్‌తో పాటు OPPO సెల్‌ఫోన్, రక్తపు మరకలున్న దుస్తులను పోలీసులు స్వాధీనం చేసుకున్నారు. ఈ కేసుకు సంబంధించిన వివరాలను ఎల్లారెడ్డి డీఎస్పీ ఎస్. శ్రీనివాస్ రావు సోమవారం వెల్లడించారు. పదేళ్లుగా సహజీవనం పోలీసులు తెలిపిన వివరాల ప్రకారం.. లింగంపేట్ మండలం కొరుపోలు గ్రామ శివారులోని నాగారం గ్రామానికి చెందిన చింతకుంట చంద్రవ్వ కుమార్తె గత పదేళ్లుగా కొరుపోలుకు చెందిన గుట్టమీది సాయిలుతో సహజీవనం చేస్తోంది. వీరికి ఒక కుమారుడు ఉన్నాడు. కొంతకాలంగా మృతురాలు హైదరాబాద్‌లోని గుండ్లపోచమ్మ ప్రాంతంలో ఉంటున్నట్లు పోలీసులు తెలిపారు. ఈ క్రమంలో సాయిలు తన గ్రామానికి రావాలని ఆమెను పలుమార్లు కోరినట్లు, రాకపోతే చంపేస్తానని ఫోన్‌లో బెదిరించినట్లు మృతురాలి తల్లి పోలీసులకు ఇచ్చిన ఫిర్యాదులో పేర్కొంది. పొలానికి వెళ్తున్నట్లు చెప్పి.. భూమికి సంబంధించిన డబ్బులు వస్తాయని, పొలానికి మందు చల్లించాల్సి ఉందని చెప్పి సెప్టెంబర్ 18న మధ్యాహ్నం సుమారు 2 గంటలకు మృతురాలు గుండ్లపోచమ్మ నుంచి బయలుదేరినట్లు పోలీసులు తెలిపారు. అనంతరం నాగారం గ్రామ శివారులో ఆమె తలకు బలమైన గాయాలతో రక్తస్రావమై మృతి చెందినట్లు సమాచారం అందింది. దీంతో మృతురాలి తల్లి చంద్రవ్వ లింగంపేట్ పోలీస్ స్టేషన్‌లో ఫిర్యాదు చేయగా పోలీసులు హత్య కేసు నమోదు చేసి దర్యాప్తు ప్రారంభించారు. సాంకేతిక పరిజ్ఞానంతో దర్యాప్తు జిల్లా ఎస్పీ ఎం. రాజేష్ చంద్ర, IPS ఆదేశాల మేరకు ఎల్లారెడ్డి డీఎస్పీ ఎస్. శ్రీనివాస్ రావు పర్యవేక్షణలో, ఎల్లారెడ్డి సీఐ డి. రాజారెడ్డి ఆధ్వర్యంలో ప్రత్యేక దర్యాప్తు బృందాన్ని ఏర్పాటు చేశారు. పోలీసులు సాంకేతిక పరిజ్ఞానాన్ని వినియోగిస్తూ వివిధ కోణాల్లో దర్యాప్తు చేపట్టారు. ఈ క్రమంలో సాయిలుపై అనుమానం రావడంతో అదుపులోకి తీసుకుని విచారించినట్లు తెలిపారు. విచారణలో మృతురాలిపై ఇనుప రాడ్‌తో దాడి చేసినట్లు నిందితుడు అంగీకరించినట్లు పోలీసులు వెల్లడించారు. భూమి డబ్బుల విషయంలో ఘర్షణ దర్యాప్తులో వెల్లడైన వివరాల ప్రకారం.. సెప్టెంబర్ 19న ఉదయం సుమారు 11 గంటలకు భూమికి సంబంధించిన డబ్బుల విషయమై నిందితుడు మృతురాలిని తన ద్విచక్ర వాహనంపై కామారెడ్డికి తీసుకెళ్లాడు. అక్కడ జుబేర్ అనే వ్యక్తితో ఆమెను మాట్లాడించినట్లు పోలీసులు తెలిపారు. అనంతరం ఇద్దరూ తిరిగి మృతురాలి పొలం వద్దకు చేరుకున్నారు. సాయంత్రం సుమారు 5 గంటల సమయంలో పొలం వద్ద ఇద్దరూ మాట్లాడుకుంటుండగా నిందితుడు తన వెంట తెచ్చుకున్న ఇనుప రాడ్‌తో మృతురాలిపై దాడి చేసినట్లు పోలీసుల దర్యాప్తులో వెల్లడైంది. తలకు బలమైన గాయం కావడంతో తీవ్ర రక్తస్రావమై ఆమె అక్కడికక్కడే మృతి చెందినట్లు పోలీసులు తెలిపారు. కీలక ఆధారాలు స్వాధీనం నిందితుడిని అరెస్ట్ చేసిన పోలీసులు అతడి వద్ద నుంచి ఒక OPPO సెల్‌ఫోన్, హత్యకు ఉపయోగించిన ఇనుప రాడ్, రక్తపు మరకలున్న అంగి (దుస్తులు) స్వాధీనం చేసుకున్నారు. అనంతరం నిందితుడిని రిమాండ్ నిమిత్తం జైలుకు తరలించినట్లు పోలీసులు తెలిపారు. కేసు ప్రస్తుతం నేర విచారణలో ఉందని వెల్లడించారు. పోలీసు బృందానికి ఎస్పీ అభినందనలు కేసును సాంకేతిక పరిజ్ఞానంతో వేగంగా ఛేదించడంలో కృషి చేసిన ఎల్లారెడ్డి సీఐ డి. రాజారెడ్డి, లింగంపేట్ ఎస్సై పి. దీపక్ కుమార్‌తో పాటు పోలీసు సిబ్బందిని జిల్లా ఎస్పీ ఎం. రాజేష్ చంద్ర, IPS అభినందించారు. కేసు దర్యాప్తును సమర్థవంతంగా పూర్తి చేసి చట్ట ప్రకారం తదుపరి చర్యలు తీసుకుంటామని పోలీసులు తెలిపారు.

Vukkalkar Rajendernath

ఎల్లారెడ్డి, కామారెడ్డి, తెలంగాణ•

3 hrs ago